Read Khiamniungan Naga Yeremia 38 Bible Online

Yeremia 38 - Khiamniungan Naga bible

Yeremia 38

¹Mattan thso Shefatia, Pashur thso Gedalia, Shelemia thso Jehukal, naiuso Malkia thso Pashur soüh Yerimiaüh,

²“Sau nung noknio nai noi-e, sah nou, naiu nou, naiuso imkia nou eane; lüko sau khukü Babilonhai tü khuluttane nungso tsülouate; apa aa nouto ehli nai paopei tsak khekkü noi-e, naiuso aa kih-e ta khaiuniahoi nouso tü chitekü noitsün lula,

³nai ngü nung noknio Babilonhai süpaihoi hau kiuwane naiuso ngüsoüh nung thalouwane,” ta APAOU nou ngiotsün lüko ngüso hau chitekü noiküla.

⁴Nungai asonghoi nouso Nokpao dongai khukü ngiom, “Nung khaiunia to loatkü wanau noin. Tiautenai nungti chitetsün tsangkü apaüh noknio nai noitsün süpaihoi mong lohenji, naiuso noknio nai noitsün khaiuniahoi nouso mong lüko nungtilu lohenkiuji. Apaüh khaiuniahoi nouso haloau tsükowe lüko ngüsobao tawai au koweji.”

⁵Nokpao Zedekiaüh thalan, “Nungaito thatü mein, asamüh apatü ti chhiau aiuji lüchhi, ngü asam loyangau tsüshio.”

⁶Nungtiphe ngüsoüh ngo nialouküta nokpao pe- mongko Nokpao Malkia ün temkhao nai auo nou lethio. Nung temkhao nai khiam tsünoikü puchetlu noiküla, naiuso ngo nungko limkü nappan.

⁷Tilai Sudanhai nou nokpao tsamai chitetsün Ebedmelek nung sau ashantsün khaiunia tsak noiküla, apaüh ngo temkhao nai lokthiowaniu ta lula, nung tao tengko nokpao nou Benjamin Bekhan nai mikhem kiukü noiküla.

⁸Nungtiphe Ebedmelek nungai khuküta nokpao tü ngiom,

⁹“Asuhatkü noitsün Nokpao, nung khaiunia nouso chhi tsütha. Ngüsoüh Yerimia temkhao nai lokthiowankü noin, loto noknio nai eheshiu tsünoishiphe, apa nungko naiu nou eane.”

¹⁰Nungtiphe nokpao nou ngo moeankün khako temkhao ainou tensanau Ebedmelek ko khaiunia süme hakü hong.

¹¹Nungai Ebedmelek nung khaiunia nousoko hakü nokpao jengtsaiu taiu tsamai khukü nethe ajantso loküta apaüh nung jü dongai auo nou thunthio.

¹²Apaüh ngo auo nou tsütawaiau nung nethe nou jü sangdongkhaiu ai khilutau ngiom.

¹³Ngü apaüh ngiotsünli chhiküta ngüsoüh ngo temkhao ainou tensan, nungphiai ngo nokpao kamai taiukiu.

¹⁴Atao tsak ko Nokpao Zedekiaüh ngo jonshikü Amkham Tsamai naptsün Bekhan apat süme nou dongko waoloukü ngiom, “Ngü nitü ngio tsak sange, naiuso ni tsüphi taiukü chite-iau aiuji.”

¹⁵Ngü thalan, “Ngü ni hau ngiotsüo nou chitenai, ni ngo loatkü wane, naiuso ngü nihau ayam han nai, ni nungtü anglu au mong tsükiu-e.”

¹⁶Nungtiphe Nokpao Zedekiaüh ngo tü akau ai athalou tsak kium, “Sam hau aa kiutsün Goa nianko ngü ni tsüloate, tsüdekünai ni loat au aiutsün khaiuniahoi hau tsülethio-e.”

¹⁷Nungai ngü Akongteng APAOU Israel hai Goa nou ngiotsün Zedekia hau chiten, “Ni Babilonhai nokpao khemko asonghoi nouso oukong nai shian naito, ni aa poi-e, naiuso nung noknio tsüjekthiowane. Ni naiuso atsamkhaiu aasane.

¹⁸Lüko ni ngüso oukong nai tsüshiankü naito, nung noknio Babilonhai hau kiuwane, ngüsoüh nung jekthiowane, naiuso nungko nou ni tsüthakhu-e.”

¹⁹Lüko Nokpao nou thalan, “Jü khaiuniaso sauhai Babilonhai dongai khulutkü noin, ngo ngüsolon hatji. Ngü ngüso nungko hau kiukü jeiat-iau shiom.”

²⁰Ngü ngiom, “Ni ngüso hau tsükiuwane. Ngü nitü APAOU ün ngiongem angio ang-au kojaji, naito niko akuo meikü khu-e, naiuso ni tsülouate.

²¹Lüko ni ngüso oukong nai tsühalutankü nan naito, nitü ti thawao-e nung APAOU nou ngo hau tsangsheikü hananiu.

²²Nung atsangshei nouko ngo Yihuda nokpao tsam nai poiantsün menyiu chikü Babilonhai nokpao ün asonghoi nouso dongai nialoukü khuwantsün ep. Ngüso khutaoko ngiotsün ngio tü anglu: ‘Nokpao ün haimeiteng nousoüh apa yam chiai nokshing shing. Naiuso loto aphasihokso temchei nai limthiowan, apa haimeisoüh apa wanan.’”

²³Naiuso ngü ngioshin, “asam menyiu naiuso thsoso chikü Babilonhai dongai kankü khuwane, naiuso ni lüko nungko nou tsüthakhu-e, Babilonhai nokpaoüh ni sua au kankü khuwane, küta nung noknio jekthiowane.”

²⁴Zedekiaüh thashin, “Nung ngio chite thaiutha sauhau langela-i, naito ni aa nou angja nai tsünoi-e.

²⁵Asonghoi nousoüh ngo niko chite-iu ta lulanai, ngüso shikü sam ti ngio chite nung ni tü sange. Ni ngüso hau alum chite naito, ni tsü- loate ta thalou-e.

²⁶Ni akhotsamai laokü lahongshi ta ngo tü kojatsünlu ngüso hau lüchite.”

²⁷Nungai asonghoi nouso chikü shiküta ngo tü sang, naiuso ngü ngüso hau nokpao nou ngo tü ngiotsün tongtü chiten. Nungko ngüsoüh ti chhishiau tsüshio, tiautenai achitetsün sauüh tsülula.

²⁸Naiuso Yirusalem shiolouwantsün ajekhaiu mosaokün lektso ngo nokpao pemongai taiu.