Read Khiamniungan Naga Yeremia 39 Bible Online

Yeremia 39 - Khiamniungan Naga bible

Yeremia 39

¹Yihudahai nokpao Zedekia nokshing pon lükao alei che nouko nai Babilonhai Nokpao Nebukadnezar, apa süpai athum hakü shikü Yirusalem tü pha puo.

²Nokpao Zedekia nokshing pon chekü tsak alei püle nouko nai Yirusalem pe lothean.

³(Tilai Yirusalem thalowan, Babilonhai nokpao khemko noitsün asonghoi Nergal, Sarezer, Samgar Nebo, Sarsekim, naiuso amao Nergal Sarezer tsak nouso lüko apem hakü shiküta Awemteng Bekhan ta jontsün athang nou thalou.)

⁴Tilai Nokpao Zedekia naiuso apa süpaiso chiküüh nung thawaotsün ep, ngüso nung noknio ainou asoh khulükhunanau kowekü noiküla. Ngüso lungpe nime jippetsün Bekhan tsangkü nokpao aimong thsatkü khutsün yam tü Yordan Tsamei dongai khukü aalou.

⁵Lüko Babilonhai süpaihoi nousoüh ngüso komkü khukü nokpao Zedekia Yeriko shimkü tsamei nouko thalouwan. Küta ngüsoüh Nokpao Nebukad- nezar nung Hamathai goumchi Ribla noknio ko noitaoko apa dongai niakü shin, naiuso Nebukadnezarüh nungko nokpao Zedekia eau mikhem kiu.

⁶Ribla noknio nai Babilonhai nokpaoüh nokpao Zedekia thsoso apaüh thapkü noikü loat, naiuso apaüh Yihudahai asonghoi nouso lüko loat.

⁷Nungphiai apaüh nokpao Zedekia niovei lowankiu küta Babilon nai kankü khuwanau son auo nou kekü taiu.

⁸Nungtaoko Ba- bilonhaiüh nokpao tsam jekthiowan naiuso amao tsam nouso thiopeng küta Yirusalem pe lothean.

⁹Aphiteng nai Zedekia süpaihoi ahei Nebuzaradan, noknio nai poikü noitsün khaiunia nouso, naiuso apa tü khuluttsünso aikü akhothiowanau Babilon nai kankü khuwan.

¹⁰Apaüh tengkam tsütaiukün tsosilu khaiuniahoi ajantso hau sainaoshep aimong naiuso eiu nouso kiukü Yihuda goumchi ai lean.

¹¹Nokpao Nebukadnezarüh süpaihoi ahei Nebuzaradan tü nung ngiokhem kiuau thoilutkü ngiom,

¹²“Khukü Yerimia tü meikü lüpaotsang. Apa latawai, lüko apaüh aiutsün apa hau lüchhikiu.”

¹³Nungtiphe Nebuzaradan ko asong khaiunia Nebushazban naiuso Nergal Sarezer, naiuso Babilonhai nokpao khemko amao asonghoi nouso apemüh

¹⁴ngüsoüh Shafan thsao Ahikam thso nou Gedalia apaotsang khemko taiukiu. Nungti ngo apa khaiuniaso ongko noi.

¹⁵Ngo loüh nokpao pemong akhotsamai noikünai, APAOU nou ngo tü

¹⁶Sudanhai nou Ebedmelek tü APAOU, Akongteng Israel hai Goa nou ngiotsün chiteau ngiom, “Ngü, chhi-e ta ngiokü shitsünli, nung noknio khako atsüomei tsüde lüko alotheantsün kankü shiji. Naiuso tilai nung thawao-e, nungso ni eppe.

¹⁷Lüko Ngo, APAOU nou ni kiplou-e, naiuso ni hattsün khaiuniahoi nouso hau ni tsükiuwane.

¹⁸Ngü ni tsüloatkü kipsankü taiu-e. Ni eau noitsün ainou kipsane, tiautenai ni ngo da amonglam taiu, ta Ngo, APAOU nou ngiowaniu.”