Read Khiamniungan Naga Yeremia 4 Bible Online

Yeremia 4 - Khiamniungan Naga bible

Yeremia 4

¹Israel, “Ni phokleau aiu naito, jü dongai laokü ashi, ta APAOU nou ngioji. Ni ngoko mong saitha theküta Ngü chinyantsün sotsom nouso lowanetünaito,

²ni jü nian tsangkü ngiomongshinge shanau ayam thakü noi-e. Nungaito mele chikü nou ngotü ngüso lü-oukkiu ta sange, naiuso ngüsoüh ngo lomsane.”

³APAOU nou Yihuda naiuso Yirusalem khaiuniaso tü ngioji, “Asam liusaiu nouso lü-a chu; asam lelu tsao nouso ongai lashiu.

⁴Asam Yihuda naiuso Yirusalem khaiuniahoi, asam athalou-e ngotü ataiu naiuso asam ngotü losiokü anoi. Asamüh nung tsüchhikü naito, asam tsü- meikün chhisiya shioko jü amongmat inli nyaikü sunge. Naiuso nung sauüh lonyatau tsüshiokü nyai-e.”

⁵Goumchi thapekkü jangong lümat! Sang asong nou tsangsheikü lüwe! Pejeikü taiutsün noknio nouso dongai jingkü khuau Yihuda naiuso Yirusalem khaiuniahoi tü lüngio.

⁶Zion dongai khutsün yam lühan! Akipsanau jingkü lükhu! Tsangkü lanoi! APAOU nou ajenapki ainou alothetsün akuothe asong kankü shiji.

⁷Chongkhao tsak apa jionoitsün athang ainou shikhutsün khekkü mele nouso lotheantsün tsak nou tsalouwaniu. Apa Yihuda lotheau shiji. Yihudahai noknio nouso thanyomkü lothekü wane. Naiuso nungko khaiunia sautso tsükih-e.

⁸Nungtiphe nethe tenloukü shapkü lümongsaiu, tiautenai APAOU athsüoteng amongmat sungtsün Yihuda ainou phoklekü mokhukü noin.

⁹APAOU nou ngiom, “Nungh ajekhaiuko nai nokpaohoi si asonghoi nouso mongsong saowane; mesonhoi nouso lekkate, naiuso e-po nouso thanga-an-e.”

¹⁰Nungai ngü ngiom, ‘Akhengteng APAOU, ni Yirusalem khaiuniahoi nouso thumkü sapthiokiu-iu. Tiautenai nokmei noi-e ta ni ngiom, lüko ngüso aiukhan ai sah nou shimkü noin.

¹¹Ajekting ahsheih liutsa lang ainou ngüso dongai sheikü shiji ta Yirusalem khaiuniahoi hau chiteau atao nou shiji. Nung achinyan losioau nyankü sheitsün ahsheih tsüde-

¹²nung ahsheih APAOU nou thoilut- tsün akongting tsak noi-e! Nungto meshen khaiunia khako mikhem veluttsün APAOU apa pem noin.’

¹³Athaplu, ehoi nouso thengmia khekkü shiji. Apa ün ehoi tsamkei nouso ahsheih tü khaolaokü naiuso mokthso nouso letchehoi tü khaolaokü noi-e. Sam inyate! Sam akuothe!

¹⁴Yirusalem, ni kipsanau thaiutha amongpem angei ainou lütsawan. Ni tilektso angei mongyang nai noi-e?

¹⁵Dan noknio naiuso Efraim king nouso ainou shikü ngiongem kantsünsoüh ngem tsümeikü nou thipeng.

¹⁶Mele nouso naiuso Yirusalemhai tü ehoi nouso goumchi laiukü ainou shiji ta lotsüokiuau ngüso shin. Nung ehoi nousoüh Yihuda hai noknio nouso thako sangh asong nou we,

¹⁷küta khaiuniahoi nou keng tsak jimtsün khekkü Yirusalem lemlou-e, ta APAOU nou ngiowaniu.

¹⁸Yihuda, ni kihkü shitsün saisile naiuso ni chhisiyatsün chhi tsangkü nung achija akhako kanküshikiu-iu. Ni angei nou nung kia-iji; nungüh among thsatkü lang-iu.

¹⁹Nung akia nou! Ngü nung akia jeitaiuau tsüshio! Jümong! Jümong kongkü thukthukji! Ngü jangongmat naiuso ehli ngem luji nungtiphe Ngo tsamkü noiau tsüshio.

²⁰Akuothe tsak phiai akuothe tsak ta shitsün nou goumchi athum lotheankü wanan. Alekta sam nejenkhio nouso lothean, naiuso ngüso ün nekhong nouso nelangkü chipekkankü noin.

²¹Ehli athsüoting nou ta ngü tilektso thape noi-e naiuso jangongmat sangngem nouso lu-e noi-e?

²²APAOU nou ngioji, “Jü khaiuniaso maingahoi; ngüsoüh Ngo tsünge. Ngüso maingatso hoi khekkü noin; ngüso angelatsün ti tsünoi. Ti tsümei nung chhiau ngüso thatü amonteng, lüko amei chhiau to tsümon.”

²³Ngü goumchi noutü thapnai-nung akeng naiuso alothe noiküla; maou noutü thapnai, nungko awon tsünoiküla.

²⁴Ngü king nouso tü thapnai-nungso haiuhaiukü noiküla, naiuso choi nouso tü thapnai-lung nouso akhu ashi khuo-ekü noiküla.

²⁵Ngü nungko khaiunia sautso tsüep; waio nouso lüko jeilükhunankü noiküla.

²⁶APAOU ün ahatteng amonglam shioko gohtsa goh nou singtso goh au naiuso noknio nouso lotheankü iula.

²⁷(APAOU nou ngiom, goumchi athum nung aodangkün tsak iula-e, lüko apaüh moisemküto tsüloutheane.)

²⁸Nung thaiutha goumchi nou mongsaiu-e; naiuso maou nou nyakhemkü iula-e. Naiuso apa mong tsühesoshi-e ta Apaüh ngiowaniu. Apaüh meshen mongthat thatsananiu, naiuso nung laokü tsüshishi-e.

²⁹Mokthso chiai noitsün süpaihoi, naiuso uokoppai loktsün khaiuniahoi sangh ngem nouko khaiunia chikü khulükhune. Ajantso liutsa nai khuthio-e, naiuso amao ajantso lungken nouso au sungkhu-e. Noksong nouso aodangkü akeng leane, naiuso loüh nungko khaiunia tsaktso tsükihshi-e.

³⁰Yirusalem, ni inyate! Ni tiauta sheitho aseng thoji? Ni tiauta chaiou jengtsaiu nouso tholouküta aniovei ai aleng tsomji? Ni apim aleng meikü shantsün nung ti tsünoi! Ni tsüojintsün nou ni wananiu, naiuso ni loatau aiuji.

³¹Menyiu tsak thso chetloutsün tao khekkü, sangh tsak ngo lula-iu, apaüh chongting thso chettsün tao ngettsün khekkü. Pha loksanküta, “Ngo inyate! Ngo loatau ngüso shiji ta ngiokü, ijapkü ngettsün nung Yirusalem shaptsün sang noiküla!”