Read Khiamniungan Naga Yeremia 40 Bible Online

Yeremia 40 - Khiamniungan Naga bible

Yeremia 40

¹Süpaihoi ahei Nebuzaradanüh ngo Rama nai sokkütün phiai APAOU nou ngüko chitekü ngiom, Nungko ngo Yirusalem naiuso Yihuda ainou Babilon akhothiotsün nai son auo nou keloukü khowantsün khaiuniahoi ongko hakü noiküla.

²Süpaihoi ahei nou ngo nialoukü khuküta ngiom, “APAOU a Goaüh nung goh lotheanau lohatkü noiküla,

³naiuso lo apaüh ngiotsünli apaüh chhi aniu. Nung chikü thawaotsün tiautenai akhaiuniasoüh APAOU thako angei sunlou naiuso apa ngio tsü-ang.

⁴Lo, ngü apha nai phantsün sonkhiang nou sokkanji küta ni jashiji. Ni Babilon nai ngoko hakü khuao aiunai, ni khuhaau shio-e, naiuso ngü ni paotsange. Lüko ni khuau tsüaiu naito, ni tsükhu-e. Shingkhannio athum ainou ni cholouau noin, naiuso ni tilüsongai khuau aiuji nungai khuau shio-e.”

⁵Tilai ngü athalatsün tsükiu, Nebuzaradanüh ngiom, “Babilonhai nokpao nou Yihudahai nokshing nouso khako sau nokshingpaou shankium nung Shafan thsao Ahikam thso nou Gedalia dongai ni laokü lükhu. Ni apako noikü khaiunia nouso ongko kiha au shiom, tsüdekünai ni yangtsün alumai ni khuau shio.” Nungai apaüh ngü hau paopei tsak naiuso ngü kanau eheshiu intso kiuküta ngo khu-i.

⁶Ngo Mizpa nai Gedalia ko noiau khu naiuso nung goh nai leankü khuwantsün khaiuniahoi ongko kih.

⁷Yihudahai asonghoi naiuso süpaihoi ajantso Babilonhai phamongai tsükhulutha. Nung goh nouko tsosilu khaiuniahoi akhothio nai tsükanlükhunhakü poian nouso khako Babilonhai nokpaoüh Gedalia nung nokshingpaou theau shankiukü noin ta ngüsoüh lula.

⁸Nungtiphe Nethania thso Ismael, Karea thso Yohanan, Tanhumat thso Seraia, Netofa hainou Efai thsoso, naiuso Maaka ainou Jezania so Mizpa nai ngüso khaiuniako hakü Gedalia dongai khu.

⁹Gedaliaüh ngüso tü ngiom, “Babilonhai phamongai nappantsün thaiutha hat au asam tsüpoh ta ngü asam hau jüngio kiuji. Nung gohthang nai noiloukü Babilonhai nokpao lüyathsüo, nungaito asam thaiutha akuo apem meikü khu-e.

¹⁰Ngo Mizpa nai noikü Babilonhai tilai nungai shi-e nungko asam liko tsa-e. Lüko asamto asamüh thaloutsün nok nouso nai noikü, theng, shep-khiam, naiuso Olip-khiam kamsanau shio-e.”

¹¹Nungtaoko Moab nai, Ammon nai, Edom nai, naiuso amao shingkhan- nio nouso nai noitsün Israel hai chikü nou Babilonhai nokpaoüh Israelhai ajantso Yihuda nai noi-iau ayam sopkiuküta ngüso nokshingpao hau Gedalia shankiu ta lula.

¹²Nungti- phe ngüsoüh ngüso pengpunkü noitsün athang nouso leankü Yihuda ai laokü shin. Ngüso Mizpa nai Gedalia dongai shin, naiuso ngüsoüh nungko theng naiuso shep-khiam piakü kamshin.

¹³Nungphiko Yohanan naiuso Babilonhai phamongai tsünappan hakü noitsün süpai ahei nouso Mizpa nai Gedalia dongai

¹⁴shikü apatü ngiom, “Ammonhai nokpao Baalisüh ni heat au Ismael hongiu ta ni tsünge süne?” Lüko Gedaliaüh nungtü mongtsülam.

¹⁵Nungai Yohananüh Gedalia tü akau ai ngiom, “Ngo khukü Ismael loatko, naiuso nung sauüh tsünge-e. Tiauta ni apa hau heati-e? Nungüh ni lemkü kamshikü noitsün Yihudahai pengpuni-e, naiuso Yihuda nai poikü noitsünso chikü khako akuothe kankü shi-e.”

¹⁶Lüko Gedaliaüh thalakü ngiom, “Nung lachhi! Ismael thaiutha ni ti ngioji nung atsüo tsüde!”