Read Khiamniungan Naga Yeremia 41 Bible Online

Yeremia 41 - Khiamniungan Naga bible

Yeremia 41

¹Nung pon alei chinyat nouko nai, Elishama thsao, Nethania thso nou Ismael, sau nokpao tsamkhaiuko mepemwe tsak naiuso nokpao khemko asonghoi ongko ateng tsak noiküla, apako khaiunia che hakü Gedaliako eppe au Mizpa ai shin. Ngüso chikü thaisam tao tsak ko kamshikü noinai,

²Ismael naiuso apako hatsün khaiunia che nousoüh ngüso sah tensanküta Gedalia loat.

³Ismaelüh loüh Mizpa nai Gedalia ko hakü noitsün Israelhai chikü naiuso Babilonhai süpaihoi nungko noikü thatsünso loatkü wan.

⁴Nungthan nyi Gedalia heattsün thaiutha sauüh mongelakün khako,

⁵Shekem, Shilo, naiuso Samaria ainou khaiunia aopetjeiüh shingoi. Ngüsoüh sonpon iuwankü, nethe tenkü, naiuso ngüso pem tsangnekü amkham tsam nai eheshiu chaithio naiuso angannyam chaithio kankü shin.

⁶Nungtiphe Ismael Mizpa ainou ngüsoko pheteau shapkü khu. Tilai apa ngüso dongai shin, apaüh ngiom, “Tsüojinyangkü Gedalia tü thapau ashi.”

⁷Ngüso noknio nai napküta, Ismael naiuso apa khaiuniasoüh ngüso loatküta ngüso mea temkhao tsak ko yakthiowan.

⁸Lüko hoi nouko, “Tsüojinyangkü sam laloat! ta ngiotsün khaiunia che noiküla. Samüh eiu nouso ai tsangkü taiutsün whet tso barli tso, olip khiam, naiuso liu-khiam nouso taim.” Nungtiphe apaüh ngüso poikü wan.

⁹Ismaelüh khaiuniahoi nouso loatküta mea yakthiowantsün temkhao asong nung Nokpao Asaüh apa tü Israelhai nokpao Baashaüh komtsün taoko thaiutaiutsün tsak noiküla. Ismaelüh nung temkhao mea nousoüh thamean.

¹⁰Nung- thankü apaüh nokpao ün menyiuthso nouso naiuso süpai ahei Nebuzaradanüh Gedalia apaotsang khemko taiukiutsün Mizpahai chikü khothiokü wan. Ismaelüh ngüso thalouküta Ammonhai goh dongai khuau tsalou.

¹¹Yohanan naiuso apako noitsün süpai ahei nousoüh Ismaelüh chhi tsümeikü chhisaniu ta lula;

¹²nungtiphe ngüso apa dongai ngüso khaiuniako hakü Gibeon temkhao asong shimkü khuküta apa thalou- wan.

¹³Tilai Ismaelüh thaloukü khuwantsünsoüh Yohanan naiuso süpaihoi ahei nouso apako hakü ep, ngüso monglingkü,

¹⁴ngüso dongai jingkü shi.

¹⁵Lüko Ismael naiuso apa khaiunia petjei nouso Yohanan ainou khukü Ammonhai goumchi ai khuthio.

¹⁶Nungai Yohanan naiuso apako hakü noitsün süpaihoi ahei nousoüh Ismaelüh Gedalia loatküta Mizpa ainou akhothio nai nialoukü khuwantsün süpaihoi, menyiuhoi, methsohoi, naiuso athsülem khaiu- niahoi nouso nialoukü laokü shin.

¹⁷Ngüso Babilonhai lon hatkü noiküla, tiautenai Babilonhai nok- paoüh nung goumchi nai nok- shingpaou the-itsün Gedalia nung Ismaelüh loat. Nungtiphe Babilonhai ainou pungekü noiau ngüso tsaloukü Ijip ai khuwan. Ngüso khunai, Betlehem shimkü noitsün Kimham nai ngüso laowan.