Read Khiamniungan Naga Yeremia 42 Bible Online

Yeremia 42 - Khiamniungan Naga bible

Yeremia 42

¹Nungai süpai ahei nouso chikü, Karea thso Yohanan naiuso Heshaia thso Azaria naiuso khaiunia ahoi asongteng ainou ehenteng saokü

²shikü ngo tü ngiom, “Tsüojinyangkü samüh nitü sangtsün achhikiu! APAOU sam Goa tü sam thaiutha misao asaokiu. Sam aasankü noitsün chikü thaiutha asaokiu. Ataojam sam piakü noiküla lüko lo sam thsaothsaokülu poikü noin, ta ni epji.

³Sam khuau yam naiuso samüh chhiau APAOU sam Goa tü yam ahan ta misao asaokiu.”

⁴Ngü thalan, “Thatü mein, asamüh sangtsünli ngü APAOU sam Goa tü misao sao-e, naiuso apaüh tilüsong ngioji, ngü asam hau chite-e. Ngo asam ainou titso kiapkü tsütaiu-e.”

⁵Nungai ngüsoüh ngo tü ngiom, “Sam thaiutha APAOU sam Goaüh ni hau kiutsün athoilut nouso chikü samüh tsükankei naito, sam thako ngiotsüo naiuso amonglam mitha tsak nung APAOU lüthe.

⁶Sam tü pouthaba tsüpouthaba samüh ni hau sau tü misao asaokiu ta sangji nung APAOU sam Goa tü samüh angio ang-e. Samüh apa ngio angnaito, samko akuo apem meikü noi-e.”

⁷Ajekhaiu chenyi noiküta APAOU ngo ko chitekü ngiom,

⁸nungtiphe ngü Yohanan naiuso apako noitsün süpai ahei nouso naiuso amaohai chikü jonkam

⁹küta ngüso tü ngiom, “Asam akoja kankü ngü hongluttsün APAOU Israel Goa nou ngioji,

¹⁰‘Asam nung gohthang nouko kihkü khuau mongchio naito, ngü asam lekchu-e naiuso tsüphattan-e; ngü asam thome naiuso tsüshekkane. Ngü asam khako alothe kankü shitsün nou ngo mong thakü lokia-iu.

¹¹Babilonhai nokpao lon hattsün alaowan. Ngo asamko noin, naiuso ngü asam apa oukong ainou kipsane.

¹²Ngü apa hau asam khako atsüojinyang kiu-iküta asam goh ai laokü ya-i-e. Tiautenai ngo atsüojinyang kiutsün noin, ta Ngo, APAOU nou ngiowaniu.’

¹³“Lüko asam sauhai Yihuda nai poikü noin, APAOU asam Goa angio tsü-angkü tsütheau naiuso nung gohthang nouko kih au tsünamnamau noin. ‘Asamüh ehlitsün tsüepau naiuso naiukü tsünoiau sam Ijip nai khuküta kih-e ta tsüngioau noin.’ Asamüh nung ngio naito, APAOU Akongteng Israel hai Goa nou ngioji, ‘Asam khukü Ijip nai kihshiau thatlou-iutünaito,

¹⁶asam hattsün ehli nou asam shiolouwane, naiuso asam hattsün naiusile nou asam tü hoilutte, küta asam nung Ijip nai eane.

¹⁷Ijip nai khukü kihshiau yangtaiu nouso chikü ehli nai, naiusile nai, tsüdekünai imkia nou eane. Ngüso tsaktso tsü-asane, naiuso ngüso khako ngü kanjikanau noitsün akuothe ainou tsaktso tsüthakhu-e.’

¹⁸“Asam Ijip nai khunaito, ‘jü amongkia mongmat Yirusalemhai tü kheplutkü shitsünli, asam da lüko kheplutte, ta APAOU Israelhai Goa nou ngioji. Asam lekkatkü thapheau tsak noi-e; khaiuniahoi nou asam alochi lotsaoau kankei-e, naiuso asam nian athesan tsakli kankei-e. Asamüh nung athang loüh tilaitso tsüepshi-e.’”

¹⁹Loüh ngü tsülaokü ngiom, “Asam khaiunia sauhai Yihuda nai poikü noin, Ijip nai tsükhuau APAOU nou ngo tü ngiom. Nungtiphe asamüh thatü thsüokü phiowanji

²⁰ta ngü lo asam lotsüoji. Asamüh ngo tü APAOU asam Goa tü asam thaiutha misao asaokiu ta sang, naiuso apaüh thoiluttsün alum asamüh chhi-e ta asamüh thalou.

²¹Naiuso lo ngü asam hau chite-iu, lüko APAOU asam Goaüh asam hau chiteau ngü mongkü ngiotsün alum asamüh angio tsü-ang.

²²Nungtiphe nung lüyangshi: Asam khukü kih-au aiutsün gohthang nai asam ehli nai, naiusile nai, tsüdekünai imkia nai asam eane.”