Read Khiamniungan Naga Yeremia 43 Bible Online

Yeremia 43 - Khiamniungan Naga bible

Yeremia 43

¹Ngü khaiunia nouso hau APAOU ngüso Goaüh ngüso hau chiteau ngo hongtsün alum chitekhem.

²Nungai Hoshaia thso Azaria naiuso Karea thso Yohanan naiuso amao mongkong khaiunia chikü nousoüh ngo tü ngiom, “Ni yaang ngioji, APAOU sam Goaüh Ijip nai lakhu ta sam tü ngioau ni tsühong.

³Nungtiphe Babilonhaiüh sam khako a-oukong epau tsüdekünai sam loatau naiuso sam Babilon nai kankü khuwanau, Neria thso Baruküh sam thako tsalouau asam lotsüokiu.”

⁴Nungtiphe Yohanan lüko, süpai aheihoi lüko, tsüdekünai khaiuniahoi saulünou Yihudahai goumchi ai noiau APAOU ün athoilut angio tsü-ang.

⁵Nungai Yohanan naiuso süpai aheihoi chikü, pengpunkü noitsün mele nouso ainou laokü shitsün kamloukü naiuso Yihuda nai poitaiutsün so chikü Ijip ai nialoukü khu, nungko melo, menyiu, methso, naiuso nokpao menyiuthsoso noiküla.

⁶Ngüsoüh Baruk naiuso ngo mongloukü süpai ahei Nebuzaradanüh Gedalia apaotsang khemko taiutsün khaiuniahoi apem nialou.

⁷Ngüsoüh APAOU ün athoilut angio tsü-angkü Tahpanhes noknio thasaokü Ijip nai khu.

⁸Nungko APAOU nou ngo tü ngiom,

⁹“Lung asong ajantso loküta noknio nai nokpao tsamai naptsün khako nung saijeikü lütaiu naiuso nung shantsün Israelhai ajantso hau lüepi.

¹⁰Nungai ngo Akongteng APAOU, Israelhai Goa nou jü tsamki Babilonhai Nokpao Nebukadnezar nung athang nouko niakü shi-e, naiuso apaüh apa nokshing noikham nung lung ni sajeitaiutsün nouso chiai taiu-e, naiuso apa nokpao nejenkhio nungso chiai sapenge.

¹¹Nebukadnezar shikü Ijip shiolou-e. Imkia nou eau noitsünso imkia nou, thaloukü khuwanau noitsünso thaloukü khuwanau, naiuso ehli nai loatau noitsünso ehli nai loatkü wane.

¹²Ngo Ijip hai goa nouso tü amtsün amkham tsam nouso tü in jeklute, naiuso Babilonhai nokpaoüh lüko ngüso goa in nai jekthiowane tsüdekünai kankü khuwane. Onnemok jimtsün tsaküh apa neshe hiu ainou yathsüokü losantsünli Babilonhai nokpaoüh Ijip goumchi yanthsüokü losane naiuso ashioloutsün nai leane.

¹³Apaüh Ijip nai noitsün Heliopolis asio lungkheam nouso lotheane naiuso Ijip hai goaso tü amtsün amkham tsam nouso jekthiowane.”