Read Khiamniungan Naga Yeremia 44 Bible Online

Yeremia 44 - Khiamniungan Naga bible

Yeremia 44

¹Ijip goumchi noknio Migdol, Tahpanhes, Memfis, naiuso ajepekki nai noitsün goumchi nousoko kihtsünso Israelhai chikü thaiutha APAOU nou ngoko chite.

²APAOU, Akongteng Israelhai Goa nou ngiom, “Ngü Yirusalem naiuso Yihuda noknio amao nouso khako alothe kankü shitsün asamüh asam chija epiu. Losaokü lüko nungso alothean nai noin, naiuso nungko sautso tsükih

³tiautenai ngüsoüh angei nou chhin naiuso nungüh ngo mongmati. Ngüsoüh amao goa nouso hau aloat chaithio kiukü yathsüo, nung ngüso, asam naiuso asam paosiposoüh tilaitso tsü-amkham.

⁴Ngü, ngo yathsüotsün e-po nouso, asam tü nung ngü chinyantsün atsaoteng lachhi ta asam tü ngioau honglutkü noi.

⁵Lüko asamüh tsü-anglu, tsüdekünai mongtsükiu. Asamüh amao goa nouso hau aloat chaithio kiukü tsümeikü chhitsün asamüh tsülean.

⁶Nungtiphe ngü jü amongmat naiuso mongthe Yihu- dahai noksong naiuso Yirusalemhai yamkheng nouso ai kheplutkiu, naiuso ngü ngüso chiai in nou jeklut. Nungso lothekü lean naiuso athapnai alekkat au iula nung lonyi lüko noin.

⁷“Nungtiphe ngo, APAOU, Akengteng Israelhai Goa nou tiauta nungtin tsümeikün chhi asamüh chhiji ta lo asam tü sangji. Asam khaiunia tsaktso tsüpoishiau melo, menyiu, methso, naiuso nionyaothso nouso khako alothe kankü shiau asamüh aiujiso?

⁸Asam kih au shitsün nung Ijip nai amao goa sotsom nouso tü aloat chaithio tsangkü amtsün nou ngo tiauta mongmatiji? Goumchi nai mele pungkü nou asam lochilotsaokü naiuso asam nian athesan tsakli kankeiau asamüh nung asam chija lothelouau shanjiso?

⁹Asam paosipo Yihudahai nokpao nousoüh, naiuso ngüso tsammongnyiusoüh Yihudahai noksong nousoko naiuso Yirusalem yamkheng nouso ai akausai chhisiya nouso chikü asamüh beyaniuso?

¹⁰Lüko lonyi saokü nouko asam nyaplokü tsüshi. Asamüh Ngo tsülomsan, tsüdekünai ngü asam si asam paosiposo hau kiutsün ngiokhem nouso tsangkü asam tsükih.

¹¹“Nungtiphe ngo, APAOU, Akongteng Israelhai Goa nou asam ainou sheikü khukü Yihuda apem lothe-e.

¹²Yihudahai apoi nouso naiuso sauhai Ijip nai khukü kih au mongchiokü noin, ngüso chikü mowantsün tü ngü thapkü noi-e. Ehli tsüdekünai naiusile nou ngüso asong ehen chikü Ijip nai eane. Apin khako ngüso nian athesan tsakli kankei-e, naiuso khaiuniahoi

¹³Ngü Yirusalemhai ehli nou, naiusisile nou, naiuso imkia nou angja kiukü shitsünli, Ijip nai kihtsünso hau angja kiu-e.

¹⁴Poikü noitsün Yihudahai naiuso Ijip nai kih au shikü noitsünso tsaktso tsüthakhu-e, tsüdekünai tsü-aasane. Ngüso loüh kihshiau aiutsün Yihuda nai ngüso tsaktso laokü tsüshi-e. Ahaiuloutsün thsaothsaokü nou tü simkü tsaktso laokü tsüshi-e.”

¹⁵Nungai khaiunia sauhaiüh ngüso tsammongnyiuüh amao goa nouso hau aloat chaithio kium ta nge-e, naiuso nungko tsakü noitsün tsammongnyiu naiuso Ijip ajepekki nai kihtsün Israelhai hoi asong tsak nou ngotü ngiom,

¹⁶“APAOU nianko asamüh sam tü ngiotsün ta ang-au samüh nan.

¹⁷Samüh chhi-e ta ngiotsün alum samüh chhi-e. Sam naiuso sam paosiposoüh, sam nokpaoüh naiuso sam ahei nousoüh Yihuda noksong nousoko naiuso Yirusalem yamkheng nousoko chikü shitsünli, Aün hai menyiu nokpao tü theng chaithio nouso thsalute.

¹⁸Lüko Aün hai menyiu nokpao hau samüh aloat chaithio kiutsün naiuso theng chaithio thsaluttsün laowantsünko yangküto, sam alumko lu-at, naiuso sam khaiuniaso ehli nai naiuso naiusile nai ean.”

¹⁹Naiuso menyiuhoi nousoüh ngiom, “Tilai samüh Aün hai menyiu Nokpao khekkü themtsai saiküta, apa hau aloat chaithio nouso kiu, naiuso apa tü theng chaithio nouso thsalut, samüh chhitsünko sam tsammongposo mongchiokü noiküla.”

²⁰Nungai ngü athalatsün melo menyiu nouso chikü tü ngiom,

²¹“Asamüh asam paosiposoüh, asam nokpaosoüh, naiuso asam ahei nousoüh, naiuso Yihudahai noksong nouso nai nung goumchi nai noitsün khaiuniahoi nousoüh Yirusalem yamkheng nousoko chaithio kiutsün nungso thaiutha APAOU nou tsünge, tsüyang, naiuso beyaniu süne?

²²Nung ajekhaiu noukolu asam goumchi alothe nai noin naiuso nungko sau tsükiji. Nung athapnai alekkat au tsak iula, naiuso khaiuniahoi nousoüh nung nian athesan tsakli kankeiji tiautenai APAOU nou loto asam angei naiuso tsümeikün chhisiya jeitaiuau tsüshio.

²³Lo akuothe asam khako shitsün nung tiautenai asamüh amao goa nouso hau aloat chaithio kiu naiuso apaüh thoiluttsünso angio tsü-angtsün tsangkü APAOU thako angei sunlou.”

²⁴Mothikü menyiuhoi Yihudahai Ijip nai kihtsünso tü APAOU Akongteng Israelhai Goaüh ngiotsün ngü ngüso chikü hau chiten. “Asam si asam tsammongnyiusoüh Aün hai menyiu Nokpao noutü ngiomong- shingekü shan. Asamüh apa hau aloat chaithio naiuso theng thsaluttsün chaithio nouso kiuau thalou, naiuso nung athalou-e asamüh kankei. Naito, thatü mein! Asam athalou-e nouso lükankei! Asamüh ngiomong shingetsün chhikü lükhu!

²⁶Lüko lo, ngo APAOU nou jü nian oukong nai asam Ijip nai noitsün Israelhai apem tü ngiomong- shingetsün tü anglu: ‘Akhengteng APAOU nianko ngü ngiomong shingji, ta ngiokü asam sauhau lünou ngo jü nian kankeikü ngiomongshing tilaitso tsüshani-e!’

²⁷Asam shingkü tsükhu-e, lüko mowane, nungtü ngo thapkü noi-e. Asam tsak lüko momowankün lektso, ehli nai tsüdekünai imkia nai, asam chikü eane.

²⁸Lüko asam thsaothsaokülu eantsün ainou thakhu-e, küta Ijip ainou Yihuda nai laokü shi-e. Nungai jü ngio süne ngüso ngio sübao atsüo shithawao ta tsü-eankü aasantsünsoüh nge-e.

²⁹Ngo asam hau nung athang nouko angja kiu-e, naiuso asam khako alothe shi-e ta ngiotsün atsüo shithawaoau ngo APAOU nou asam hau mitha kiu-e.

³⁰Yihudahai Nokpao Zedekia Babilonhai Nokpao Nebukadnezar apa loatau aiutsün ehoi phamongai kiuwantsünli, ngo Ijip hai Nokpao Hofra, apa loatau aiutsün ehso phamongai kiuwane.”