Read Khiamniungan Naga Yeremia 46 Bible Online

Yeremia 46 - Khiamniungan Naga bible

Yeremia 46

¹Ijip tü yaloukü mele nouso thaiutha APAOU ngoko chite.

²Yihudahai nokpao Jehoiakim nokshing pon püle nouko Eufrates Haiumong shimkü Karkemis nai Babilonhai Nokpao Nebukadnezarüh shioloutsün nung Ijip hai Nokpao Neko süpai thaiutha apaüh nungti ngiokü noiküla:

³“Ijip hai asonghoi nousoüh, ‘asam shikhao lükhemlou küta ehlithang nai lükhu ta, sang asong nou we!

⁴Asam mokthso nouso lükhemlou, naiuso nung chiai mokkü lünoi! Asam son kandio nouso keiloukü tsapkü tsakü anoi! Asam lai nouso lüshimonlou! Asam ehli sheitho nouso lütholou!’

⁵“Lüko ngü ti epji?” “Ngüso lekkatkü phiai laokü shiji. Ngüso süpaihoi shiolouwan-iau; naiuso ahat nou meankü ngüso thsüokü jingkü khuwaniu loto phiai lapkü tsüthapshi, ta APAOU nou ngioji.

⁶Khaolaokü khutsünso khulükhunau tsüshio; süpaihoi nouso thakhuau tsüshio. Ajenapki Eufrates Haiu shimkü ngüso thongatkü loian.

⁷Haiukuk saokü meankü sungtsün haiu tsak khekkü, Nail khekkü sungtsün nung sau?

⁸Haiukuk saokü meankü sungtsün haiu tsakli Nail haiukuk nung Ijip noin. ‘Ngo meankü sungküta goumchi nou pukjei-e; Ngü noknio naiuso nungko kihtsün khaiunia nouso lomowane ta Ijipüh ngiom.

⁹Mokthso nouso si ehli tsamkei nouso khaolaokü jingau lüthoilut! Sudan naiuso Libya ainou khaiuniahoi nouso ehli shikhao nou kankü, Lydia ainou uokom-po nouso si süpaihoi nouso lühongpeng.’”

¹⁰Akhengteng APAOU ün Akongteng ajekhaiu nung noin: lonyi apaüh thamshi-e; lonyi apaüh meshen ehso hao angja kiushi-e. Apa ehli salaiuüh mongtsam mothasangkün lektso ngüso he-ate, naiuso mongtsam mothasangkün lektso ngüso she shiu-e. Lonyi Akongteng APAOU Goa nou ajepekki Eufrates Haiumong shimkü aloat chaithio tsak kiu-e.

¹¹Ijip khaiuniaso, Gilead ai khuküta alomeiau moushe lüyam! Tiüh lüko ni alomeiau tsüshio-e ta, ni nou moushe nung pohkü tsünoi yaang ta mitha epiu.

¹²Mele nousoüh ni miammattsün thaiutha lula-iu. Tiautenai süpai tsaküh amao süpai tsak thako tsalou nou ngüso aikü loian.

¹³Ijip goumchi tü shiuh au Babilonhai Nokpao Nebukadnezar shitsün thaiutha APAOU nou ngo tü ngiom,

¹⁴“Ijip hai noksong nouso nai, Migdol nai, Memfis nai, naiuso Tahpanhes nai nungso lüwelut: ‘Asam kiplouau lükhemlou; tsüdekünaito asam chikü ehli nai mowane!

¹⁵Asam oukong Apis goa tiauta loian? Apa nung APAOU nou lahongan!’

¹⁶Ni nou süpaihoi thekkat naiuso loian, naiuso ngüso tsaküh tsak tü ngioji, ‘Liukü! Sam goumchi sam khaiuniaso dongai khukü sam ehso ainou sam khulouko!’

¹⁷‘Atao phiowankü Angemlousantsün’ ta “Ijip hai Nokpao hau nian ayan lükiu.

¹⁸Ngo APAOU, Akongteng nokpao. Aa Goa nou Ngo noin. Amao king nouso tü Tabor King tsokkü noitsünli, naiuso Karmel King nung khiamnok chiai noitsünli; ni tü pohtsün tsak nou tü oukong nung noi-e.

¹⁹Akhothiotsün nai kankü khuwan-iau khemloukü lünoi, asam Ijip khaiuniahoiso! Sau kih au tsüshiokü alothe nai noitsün tsakli, Memfis nung singtsogoh iula-e.

²⁰Ijip nung thatü alengmei jangtso tsak khekkü noin, lüko ajenap ainou ajeitsün chinyi tsak tsangkü apatü jeiji.

²¹Apa da amai eptsün süpai nouso lüko oukong tsühakün jangtso nouli noin. Ngüso tsakü eh tsüli, ngüso chikü phoklekü jingkü khuwan. Ngüso lotheantsün atao tsümeikün ajekhaiu ngüso thaiutha shisaokü noin.

²²Pao tsak sheihkü khuwantsün khekkü, ehoi shimkü shinai Ijip jingkü khuwan, khaiuniahoi nou liutsa langnai pai nouso sahongtsün khekkü

²³ngüso apa tü uo semkü puo. Ngüso süpaihoi haowe au tsongkohoi tü phopkü ngüso mepem wesanau tsüshio.

²⁴Ijip hai khaiunia ajenap nai noitsünsoüh shiolouküta amiam nai wan ta ngo, APAOU nou ngiowaniu.”

²⁵APAOU Akongteng Israelhai Goa nou ngioji, “Ngo Ammon, Thabes hai goa, Ijip hai goa nouso, nokpao nouso hakü hau angja kiuau kankü shiji. Ngo Ijip hai nokpao naiuso apa da amonglam taiutsünso apem

²⁶ngüso loat au aiutsün Babilonhai Nokpao Nebukadnezar naiuso apa süpaihoi hau thumkü lethiowane. Lüko phikü, ngüsoüh yankü shitsün taoko chhitsünli, khaiuniahoi nouso Ijip nai müjam kihshi-e, ta Ngo, APAOU nou ngiowaniu.”

²⁷“Jü khaiuniaso, hatkü lanoi, Israel khaiuniaso, lekkatkü lanoi. Asam khothiotsün goumchi ainou ngü asam kipsane. Asam laokü yashi-e küta aaloukü kih-e.

²⁸Ngü asam dongai shikü asam kipsane. Ngü asam pengpunkü noitsün mele nouso apem lotheane, lüko asam to tsülouthe-e. Ngü asam angja tsükiuküto tsükhu-i-e, lüko tilai ngü asam hau angja kiu-e, ngü ayamtha nai chhi-e ta Ngo, APAOU, nou ngiowaniu.”