Read Khiamniungan Naga Yeremia 48 Bible Online

Yeremia 48 - Khiamniungan Naga bible

Yeremia 48

¹Moab thaiutha APAOU, Akongteng nou nungti ngioji: “Nebo hai thaiutha inyate, tiautenai ngüso noksong lotheankü noin! Kiriathaim shiolouwaniu, ngüso ün amongteng pe nouso thapai-aniu, naiuso apa khaiuniaso amiam nai wananiu.

²Moab ün alengmei khuwaniu. Ehoi nou Hesbon shiolouwan naiuso Moab hai mele lomowanau akausai mongthat thatji. Süpaihoi nouso nung thako kamloukü shi-e, naiuso A-aiuhai noksong tsüngemikü losangkü wane.

³‘Angemsingem! Alotheantsün!’ ta Horonaim haiüh wekü ngiom.

⁴“Moab lotheaniu; methsohoi shaptsün tü anglu.

⁵Luhit ai sungtsün yam ainou Horonaim ai saotsün yam thathonkü ngüso amongkia nou shaptsün tü anglu.

⁶‘Asam aa thaiutha liukü lükhulou!’ ‘Singtso goh nai mothameloukü noitsün gado tsak khekkü lükhulou!’ ta ngüsoüh ngioji.

⁷“Moab, ni a-oukong naiuso amemei da monglam, ni lüko lo shiolouwane; asam goa Kemos lüko apa nokpao naiuso meson nousoko hakü akhothiotsün nai nappane.

⁸Noksong tsak lüko alothe ainou tsüthakhu-e; tsamei naiuso kingpun nemtso lotheane, ta Ngo, APAOU nou ngiowaniu.

⁹Moab thaiutha etam lung tsak lükitaiu, tiautenai nung shakta mowane. Nung noksong nouso lothekü leane, küta nungko müjam tsükihshi-e.”

¹⁰(APAOU ün chhi mongpem apem nou tsüchhikün khaiunia nung athesan lüthe! Naiuso khaiunia sauüh meshen sahlaiu sheloushitsün ainou laolouji, nung khaiunia athesan lüthe!)

¹¹APAOU nou ngiom, “Moab hai tilaitso thaloukü tsükhuwan hakü aaloukü noikü shin. Moab nung meng tsak ainou meng tsak ta tilaitso tsükhaiusandekün naiuso atsonjek tsüepkü poiantsün theng khekkü noin. Apa nung thaiuko nou tü anyaothing loüh ameilu noin.

¹²“Nungtiphe lo, ngo theng khaiusanau khaiuniahoi hongtsünli atao nou shiji. Ngüsoüh theng meng nouso lokeng küta nungso nelangkü thiopekke.

¹³Israel hai ngüsoüh monglamtsün goa tsak Bethel tü amiam eptsünli, Moab hai ngüso goa Kemos tü amiam eppe.

¹⁴“Moab hai, sam ehli nai thelukü taiutsün mongnyan süpaihoi, naiuso lenghoi ta asamüh tiauta ngioji?

¹⁵Moab thaiutha akuothe shimkü noin; apa ün pühemeiteng nouso chaoatkü waniu ta, Ngo, nokpao, Akongteng APAOU, nou ngiowaniu.

¹⁶Moab thaiutha akuothe shimkü noin; naiuso apa nyomanau nou liukü shiji.

¹⁷“Asam nung shimkü kihtsünso, naiuso apa niansong nianlom ngetsünso chikü nou nung mele thaiutha lümongsaiu. ‘Nung oukong nokshing pai-aniu; apa ajinka naiuso oukong nouso loto tsünoishi,’ ta lüngio.

¹⁸Asam Dibon nai kihtsünso, asam ün asuhat noithang ainou asao küta goh chiai pukhao nai lümoknoi. Moab lomowantsün nungko noin, apaüh asam ehüthang nouso lotheaniu.

¹⁹Asam Aroer nai kihtsünso, yamkuk nai tsakü taiukü anoi; akhulükhuntsünso tü sangkü ti thawaokü noin ta ngüso ainou lüyamsan.

²⁰‘Moab loianiu,’ ‘nung thaiutha lüshap; nung amiam noin ta ngüsoüh thala-e. Moab lotheaniu ta Arnon Haiusai nai lüwelut!’

²¹“Tsamei nai noknio nouso khako, Holon khako, Jaza khako, Mefat khako,

²²Dibon khako, Nebo khako, Bet Diblathaim khako,

²³Kiriathaim khako, Betgamul khako, Betmeon khako,

²⁴Keriot naiuso Bozra khako mikhem nou shikü noin. Alaiu nai naiuso ashim nai noitsün Moab hai noknio nouso chikü khako mikhem nou shikü noin.

²⁵Moab akong naiuso oukong sutnekü lotheaniu, ta Ngo, APAOU nou ngiowaniu.”

²⁶APAOU nou ngiom, “Moab theng nou tokkatkü lünoi-i, tiautenai apaüh ngo thako khengshi. Moab, apaüh phusantsün chiai munne, naiuso khaiuniahoi nouso nyai-e.

²⁷Moab, ni Israelhai tü titi lochi- loutsao, lüyangsan. Kau ahoi tsaküh ngüso thalouwankü kankeitsün khekkü ni ngüso tü kankei.

²⁸“Asam Moab nai kihtsünso, asam noksong nouso lülean! Khukü lungken nouso ai lükih! Goh atsotsan nai meshen a-ap shantsün chong- mükham khekkü lüthe.

²⁹Moab thatü bülomji! Ngüso titi bülomji, mongkong, ngüso thaiuthalu thatü tsokkü yangji, nung thaiutha ngü lula-iu.

³⁰Apa mongthe, ngo APAOU nou ngeji. Ngüso bülomtsün nou ti tsü-iula-e, naiuso ngüso chhisiya titso atheng tsüsao-e.

³¹Nungtiphe ngü Moab nai noitsün khaiunia pungkü naiuso Kir Heres nai noitsün khaiuniahoi thaiutha shappe.

³²Jazer khaiunia thaiutha shaptsün tü tekkü Sibma khaiuniahoi nouso thaiutha ngo shappe. Sibma hai noknio, ni Khiamnok naiuso Jazer saokü khutsün sainaoshep paikea tsak khekkü noin. Lüko lo ni nou asaiushep nouso naiuso sainaoshep nouso lotheankü noin.

³³Moab hai atsüomei goumchi ainou amongling naiuso amongtsün kankü khuwaniu. Sainaoshep ainou theng thippitsün theng nouso ngü laolouwaniu, nung- ko theng shantsün naiuso akoiheau thaiutha wetsün sau tsünoi.

³⁴“Hebron naiuso Elealeh khaiuniahoi nousoüh wenai, ngüso sang Jahaz saokü, naiuso Zoar nai noitsün khaiuniahoi nouso naiuso Horonaim si Eglat Shelishiya saokü lüh-e. Nimrim haiutso saokü apkü shian.

³⁵Ngüso ajah chaithio kiutsün amthang nouso naiuso ngüso goa hau aloat chaithio kiutsün ainou ngo Moab hai lolao-e, ta ngo, APAOU nou ngiowaniu.

³⁶“Nungtiphe khaiunia ajantsoüh poipoi mattsün ko eanhai jihangtsün khekkü, jümong Moab si Kiriat- Heres hai thaiutha mongsaiuji, tiautenai ngüsoüh taiutsün alum mowaniu.

³⁷Ngüso chikü nou ngüso khaiu naiuso sonpon iuwan. Ngüso chiküüh pha nai aokü laplou, naiuso khaiunia pungkü nou nethe ten.

³⁸Moab hai tsamson chikü naiuso nyong kamtsün chikü nai amao ti tsünoi lüko amongsaiu, tiautenai ngo Moab nung khaiunia sauüh tsüchinekkün pulak tsakli lopaikü wan.

³⁹Lüwe! Moab thiopekkaniu! Moab miamiu; nung alothe nai noin, naiuso nung lemkü noitsün mele nouso chikü nou apatü nyailutji ta, Ngo, APAOU nou ngioji.”

⁴⁰Moab chiai mele tsak, letche nou apa ekuk sapengkü langlutkü maptsünli,

⁴¹shiküta nung noksong si ehüpuo nouso thalouwane ta APAOU nou athalou tsak noin. Nung ajekhaiu ko nai Moab hai süpaihoi menyiu tsaküh methso chet taoko hattattsünli noi-e.

⁴²Moab lotheane, naiuso loto nung mele tsak ta tsünoishi-e, tiautenai apaüh ngo tü khengshin.

⁴³Alekkat, khan, naiuso jin nousoüh Moab hai tü taiukü noin, ta nung APAOU nou ngiowaniu.

⁴⁴Sauhaiüh alekkat ainou khulouau koweji ngüso nung khan nai sathio-e, naiuso sauhai nung khan nouso ainou sung khu-e, ngüso jin nai thalou-e, tiautenai Moab lotheanau atao nung APAOU nou thatsankü wan.

⁴⁵Akhulükhuntsünsoüh ataojam nokpao Sihonüh nokshingtsün noknio Hesbon nai asoloau yame, lüko nung noknioüh innyai nailu noin. Ehli tü tsüojin waniu.

⁴⁶Moab hai thaiutha atsüojinau tsak! Kemos tü amkhamtsün khaiuniahoi nouso lotheaniu naiuso ngüso melothso si menyiuthso nouso akhothiotsün nai thaloukü khuwaniu.

⁴⁷Lüko ashiau nou ajekhaiu nouko nai APAOU nou Moab loühjam akuomei nai kankü shishi-e. Nung chikü APAOU nou ngiotsünli Moab tü thawao-e.