Read Khiamniungan Naga Yeremia 49 Bible Online

Yeremia 49 - Khiamniungan Naga bible

Yeremia 49

¹Ammon hai thaiutha APAOU nou nungti ngioji: “Israel khaiuniahoi nouso tiai noin? Ngüso goumchi kiplouau tsaktso tsünoiso? Ngüsoüh Molek goa tü amtsün khaiuniaso hau Gad kau ün goh haoson thalou-iküta nungko noilou-i.

²Lüko ngo tilai Rabba noknio ateng nai kihtsün khaiunia nouso hau noknio nou naiuso nok nouso jekthiowankü noin, ehli ngem lula-iau atao nou shiji. Nungaih Israel haiüh ngüso goumchi lowantsünso ainou ngüsoüh müjam laoküloushi-e.

³Hesbon khaiuniaso, lashap! tiautenai Ai lotheaniu! Rabba menyiuso lümongsaiu! Nethe tenkü lümongsaiu; akhu ashi ta jingkü lütsakei, tiautenai asam goa Molek apa ün meson naiuso nokpao nousoko hakü akhothiotsün nai kankü khuwane.

⁴Asam mongtsü- kiukün khaiunia nouso tiauta bülomji? Asam oukong loianji. Sauüh ngü komsome ta ngiokü tiauta ni a-oukong da amonglam taiuji?

⁵Ngü asam khako aniokün pungkü nai alekkat kankü shi-e. Nungko asam apem khulükhunane. Khaiunia pungkü meshen aa thaiutha khu-e, naiuso asam süpaiso aikü kamshi shiau sau tsünoishi-e.

⁶“Lüko phiküto ngo Ammonhai akuo lomeishi-e, ta Ngo, APAOU nou ngiowaniu.”

⁷Edom hai thaiutha APAOU nou nungti ngioji; “Edomhai ün mongthat mongsai mowaniu süne? Ngüso hau ayam hantsünsoüh loto ngüsoüh chhiau ti ngioshiau tsüshio süne? Ngüso mongthat mongsai apem mowaniu süne?

⁸Dedanhai, asam phokleküta lükhulou! küta pamkü lünoi! Ngo Esau ün thsaosithsoso lomowane, tiautenai ngü ngüso hau angja kiuau atao shikü noin.

⁹Tilai khaiuniahoi nousoüh sainaoshep panji, ngüsoüh shep auo nou tü thsaothsaokü poitaiuji, naiuso tilai anyakhem nai kauhai shiji, ngüsoüh aiutsünlu kanlükhunji.

¹⁰Lüko ngü loto ngüso pamloshiau tsüshiokü hau Esau thsaosithsoso moisemkü lomowaniu, naiuso ngüso pamlotsün athang nouso sopkü wan. Edomhai tsaktso tsüpoishikü lomowaniu.

¹¹Asam mejetthso nouso ngoko ataiu, ngo ngüso paotsange. Asam jihi nousoüh ngo da noilutau shio-e.

¹²“Angja epau tsümaikünsoüh lüko angja kiutsün thengkam ainou shiuaulu noin, nungaito asam angja tsükiukü wane ta yangji süne? Asamüh titilünou nung thengkam ainou shiuau noin!

¹³Bozra hai noknio nung khaiuniahoi khako ahattao naiuso aodangkü wantsün athang tsak iula-e; naiuso nungtü thapnai apa nian athesan tsak hau kankei-e, nung ngo jüpemüh lüko ngiomongshingkü alothe nai noi-e, ta Ngo, APAOU nou ngiowaniu.”

¹⁴Ngü ngiom, “Edom, ngü APAOU ainou ngiongem tsak epkü noin. Apaüh mele nousotü ngüso süpaihoi kamloukü ni komanau khemloukü anoi ta ngioau ngiongem kantsün tsak hongkü noin.

¹⁵APAOU nou ni oukiakü iula-i-e, naiuso asam tü tsakühtso asuhat tsünoi-e.

¹⁶Asam abülom nou asam sapthio-iu. Asamüh yangkü noitsünli sauüh tso asamlon tsühate. Asam king atsok lungken nousoko kihji, nungti asam letche tsakli atsokteng nai kihlüko, APAOU nou ni goh ai kankü sao-e, ta ngioji.”

¹⁷APAOU nou ngiom, “Edom lotheanau noitsün nungto yankü khuau noitsün khaiunia pungkü alekta thatü thsüokü lekkatau lümeikü noi-e.

¹⁸Shimkü noitsün noksong naiuso khaiuniahoi nouso Sodom naiuso Gomorra nai lotheantsün khekkü Edom tü thawao-e. Loto nungko saulüko müjam kihshiau tsüshio-e, ta Ngo, APAOU nou ngiowaniu.

¹⁹Yordan ainou thsanyan asangnya sungtsün goumchi saokü, anyakhem lang ainou chongkhao tsak sungtsün khekkü, ngo shi-e küta Edomhai ngüso goumchi ainou alekta khupeng-i-e. Nungai Ngü chosantsün ahei tsak nou nung mele chiai nokshinge. Ngoko welu au sau shio-e? Ngütü sauüh taisome? Ti nokshingüh ngo tü khengshiau shio-e?

²⁰Nungtiphe Edomhai thako ngü ti yangtaim, naiuso Temanhai noknio ai noitsün khaiuniahoi nouso tü ngü ti chhi-e nungtü anglu: Ngüso ün ehen methso nouso lüko tenkü khuwane, nungko khaiunia pungkü lekkate.

²¹Tilai Edom loiane, nungai goumchi athum haiuhaiu nai angem sungtsünli noi-e, naiuso alekkat ngem nou Aqaba Aoyan saokü lula-e.

²²Letche tsaküh apa ekuk khungpengkü nappotsün khekkü ehoi nousoüh Bozra komheane. Nung ajekhaiu ko nai Edomhai süpaihoi nouso, methso chet taoko menyiu tsak hattattsünli hattate.”

²³Damaska hai thaiutha APAOU nou nungti ngioji, “Ngüsoüh ngem tsümeikü lulatsün shioko Hamat naiuso Arpad noknio nai kihtsün khaiuniahoi nouso yangelatkü noin. Khiamnok khekkü ngüso atsamlouau tsüshiokü nou pokjeikü noin, naiuso ngüso aalouau tsüshioji.

²⁴Damaska nai noitsün khaiuniahoi nouso outsükongkü iulakü ngüso alekkat nai khulükhun. Menyiu tsak methso chet taoko akia sungkü angjatsünli ngüso angja nai noin.

²⁵Amonglingau kankeitsün noknio ateng nung moishemkü leankü noin.

²⁶Nung ajekhaiu ko nai noknio nai noitsün pühehoi nouso noknio yamkheng nai loate, naiuso süpaihoi nouso lomowane.

²⁷Ngü Damaska lungpe nouso tü in nou jeklute, küta nokpao Benhadad ün tsam jekthiokü wane ta Ngo, Akongteng APAOU nou ngiowaniu.”

²⁸Kedar mele naiuso Babilonhai nokpao Nebukadnezarüh shioloutsün Hazorhai khemko noitsün khiam- khan nouso thaiutha APAOU nou nungti ngioji: “Kedarhai komküta ajepek khaiunia nouso lomokü lüwan!

²⁹Ngüso ün nejenkhio, thainian, nejenkhio koukhan khong- jeitsün, naiuso nung nejenkhio nouko noitsün alum lülomowan. Ngüso ün ut nouso loküta ‘Asam lemkü nai alekkat noin!’ ta khaiuniahoi nouso tü lüngio.

³⁰“Hazorhai, ngo APAOU nou asam athang laiukünai khukü pamkü lünoi ta lotsüoji. Babilonhai Nokpao Nebukadnezarüh asam thako mongthat tsümeikü thatsaniu, küta apaüh nungti ngioji:

³¹‘Ashi! Samüh aalokü naiuso kipsankü noin ta yangtsün khaiuniahoi nouso komanko! Ngüso noknio tü koukhan naiuso koukiap tsüpo, naiuso nung tiühtso sojeikü tsünoi.’

³²“Ngüso ün ut naiuso thainian chikü lülouwan! Khaiu letletkü iutsünso ngü yampungkü nai kompenge, naiuso ngü ngüso khako aniokün pungkü ainou akuothe kankü shi-e.

³³Chiu nousolu kihtsün athang tsakli, Hazor nung asaita singtsogohthang au iula-i-e. Nungko sau müjam tilaitso tsükihshi-e ta Ngo, APAOU nou ngiowaniu.”

³⁴Yihudahai nokpao Zedekia nokshing tsaloukü thunkü Akong- teng APAOU nou Elamhai shingkan- nio thaiutha ngoko chite.

³⁵Apaüh ngiom, “Elam thatü oukongitsün uokoppai shankiutsünso chikü ngü loatkü wane.

³⁶Ngü Elam thako ahsheih yam pungkü nai shei-i-e, küta apaüh khaiunia tsükhothiokü shingkhannio tsaktso tsüpoikün lektso ngü apa khaiuniaso apemai pengpun-i-e.

³⁷Ngü Elamhai ngüso loatau aiutsün ehoi nouso lon hatkü noi-i-e. Ngü jü athsüoting amongmat nou Elamhai lomo-e naiuso ngü ngüso tsaktso tsüpoishikü mothakhemkün lektso ngüso thako süpaihoi honge.

³⁸Ngü ngüso nokpao naiuso ahei nouso lomo-e, küta nungko jü nokshing sungi-e.

³⁹Lüko aphiai ngü Elamhai akuo lomeishi-e ta Ngo, APAOU nou ngiowaniu.”