Read Khiamniungan Naga Yeremia 5 Bible Online

Yeremia 5 - Khiamniungan Naga bible

Yeremia 5

¹Yirusalem khaiuniaso, asam yampun nouso ai lütsakei! Lemkü lüthaplu! Asam thaiutha lüthaplu! Chaijanthang nouso ai lüyam! Goa ko mongkiukü noiau kowetsün, naiuso ayamtha nou chhitsün ni khaiunia tsak epsanau shio-e süne? Ni nung epsanau shionaito, Yirusalem, APAOU nou nihau awan kiu-e.

²Ni APAOU amji ta ngio lüko, ni titi ngioji ni nung tsüchhi.

³Atsüoteng APAOU nou amongkiutsün tü yamji. Apaüh nitü shiuh lüko ni ti athaisan tsünoi; apaüh nitü thut, lüko ni angelouau tsü-aiu. Ni mongkong nou ni angei ainou phokleau tsüaiu.

⁴Nungaih ngü ngiom, “Nungso tsosilu naiuso tsüngekünsolu noin. Ngüsoüh maingahaili saiji; Ngüso Goa APAOU nou ngüso hau ti chhi-iau aiuji nung ngüsoüh tsünge.

⁵Ngo oukong suntsün khaiuniahoi dongai khu-e, küta ngüsoko chite-e, tiautenai ngüsoüh Goa mongchiotsün naiuso APAOU nou ngüso hau chhi-iau aiutsün nung ngeji.” Lüko ngüso chikü nou APAOU ün oukong tsülou, naiuso apa ngio a-ngau shanan.

⁶Nung shioko liutsa langnai noitsün chongkhao nousoüh ngüso loate, naiuso singtso goh ainou chio nousoüh ngüso nelangkü chipekke. Tsong nousoüh ngüso noksong tü homkei-e. Nung khaiunia nouso pechiai shikhu naito, ngüso nelangkü chipekke; tiautenai ngüso angei tsüwekhem naiuso atao pungkü ngüso Goa ainou pungekü khu.

⁷APAOU nou sangkü ngiom, “Tiauta Ngü jü khaiuniaso angei wankiu-e? Ngüsoüh Ngo leanküta atsüotsüdekün goa nouso amkham. Ngü jü khaiuniaso thatukkü tsad, lüko ngüsoüh tsütsamtsütsüokü kankeiküta ngüso atao ajisiwop chhitsünsoko wanan.

⁸Ngüso eheshiu amei nou tsadtaiutsün mokthsopong nouso khekkü, ngüso apemüh meshen phaosipo tsammongnyiu tü chinekkü thap.

⁹Nungtin chhisiya thaiutha ngü ngüso hau angja tsükiukü, naiuso nungtin mele tsaktü phaosan tsüsane süne?

¹⁰Ngü jü khaiuniaso sainaoshep eiu lotheanau ehoi honge, lüko ngüso moisemkü to tsülomoe. Ngo ngüso tü paikia nouso chaowanau ngio-e, tiautenai nung paikia nouso Ngü nou tsüde.

¹¹Israel naiuso Yihuda khaiuniahoi nousoüh Ngo thsüokü kaosaiat-iu, ta Ngo, APAOU, nou ngiowaniu.”

¹²APAOU ün khaiuniahoi nousoüh apa shanan küta ngiom, “Apaüh atsüoting to ti tsüchhi-e. Sam khako tsümeikü ti tsüshi-e; tsüdekünai samüh ehli si naiusile tsüphete-e.”

¹³E-po nouso atheau ti tsünoi, lüko ahsheih nekong, ngüsoüh APAOU ainou ngiongem tsükan ta ngiom. Akongteng APAOU Goa nou ngo tü ngiom, “Yerimia, nung khaiuniahoi nousoüh nungtin ngio ngionou shioko Ngü jüngio nouso asonkuo ko injek khekkü noi-i-e. Nung khaiunia nouso paili noi-e, küta nung in nou chethe-ane.”

¹⁵Israel khaiuniahoi, APAOU nou gohmao laiukü ainou mele tsak kankü shiji. Nung akong naiuso akeng mele, ni ngio tsüngetsün mele tsak noin.

¹⁶Ngüso uokoppai loktsün khaiuniahoi, atsüojinyang tsülepkü loattsün akong süpai nouso noin.

¹⁷Ngüsoüh ni nou chihsam khiam- sam lotheane, ngüsoüh athsoso loate, ngüsoüh a-onnemok naiuso ajanghoi chaoat-e, naiuso sainaoshep naiuso phiupai nouso lotheane. Peh mongkü pehtsün noknio nouso sübao tü ni monglamkü noiküla ngüso süpaisoüh lotheane.

¹⁸APAOU nou ngioji, “Nungti lüko nungso ajekhaiuko nai ngo jü khaiuniaso moisemküto tsülomo-e.

¹⁹Ngü tiauta nungso chikü chhikü noiküla ta tilai ngüsoüh sange, Yerimia, ni ngüso hau nung lüchite: ngüso meshen goumchi ai nai ngo ainou pungeküta gohmao goa nouso yathsüokü shitsünli, nungti ngüsoüh me goumchi ai mesanhai yathsüo-e.”

²⁰APAOU nou ngioji, “Yihuda khaiunia sauhai Yakob thsaosithsoso noin ngüso hau nung lüchite:

²¹Asam mainga naiuso mongyang tsüpung- kün khaiuniahoi nung anglu, asam niovei puo lüko epau tsüshio naiuso asam noukhan puo lüko tsülula.

²²Ngo APAOU nou noin, asam tiauta Ngo lon tsühat? Asam tiauta jü khako tsüngaongao? Asoisoiau tsü- shiokü asaichi elung theau khiamnok nai Ngo singtso nou taiukiu. Khiamnok nouto haiuhaiu lüko, nung yanau tsüshio, khiampek nou ngaoau shiom, lüko ngüsoüh nung lopaiau tsüshio.

²³Lüko asam khaiunia nouso da mongkong naiuso akhengshitsün mong sunkü noin, asamüh Ngo le-anküta phoklekü khuwan.

²⁴Pon pungkü be-eiuyam ah-tao naiuso chihle khiamle sam- sanau ah-uo, naiuso pai-eiu auo-eiu nyansanau auo nou Ngü hong lüko, ngüsoüh mongai Ngo lomsanau tilaitso tsüyanglu.

²⁵Nungliko asam angeiüh amei nouso asam ainou loyangkü wanan.

²⁶“Jü khaiuniaso ongko khaiunia tsümeikünso kih hakü epji, ngüsoüh waio nouso thalouau jin jintsün khekkü, khaiunia thalouaulu jinji.

²⁷Liuhom khaiunia tsaküh apa jitsom waio nousoüh meankü thaloutsünli, ngüsoüh ngüso tsam a-aploutsün jengtsaiu nou thameankü noin. Nung shioko ngüso oukongkü naiuso memei noin,

²⁸naiuso ngüso tsahkü naiuso meikü heshiukü noin. Tsümeikün chhi nai ngüso ayanglou tsünoi. Ngüsoüh mejetthso nouso hau ayamtha nou tsükiu, tsüdekünai athangmang nai noinso hau ngiotsüo nou tsühan.

²⁹“Lüko Ngo, APAOU nou, nungso chhisiya thaiutha ngüso hau angja kiu-e, ngü nung mele tü phao shane.

³⁰Ahatau naiuso alekkatau tso tsak goumchi nai thawaokü noin:

³¹E-po nousoüh khapiam ngio yaang kiuji; mesonhoi nousoüh e-pohoi athoilut nouko chhiji, naiuso jü khaiuniasoüh nungtü khengshikü titso tsüngioji. Lüko nungso chikü athon shinai ngüsoüh ti chhisane?”