Read Khiamniungan Naga Yeremia 50 Bible Online

Yeremia 50 - Khiamniungan Naga bible

Yeremia 50

¹Babilon noknio naiuso nungko kihtsün khaiuniahoi thaiutha APAOU nou ngo hau kiutsün ngiongem:

²“Mele nouso hau ngiongem lüchite! Nung lüwelut! Ii tsak lükiu naiuso nung ngiongem lüwelut! Nung akau-ai tsangkü lawan! Babilon loianiu! Apa ün Marduk goa nyomaniu! Babilon ün sotsom nousoüh amiam epiu, Apa ün alochinyan sotsom nouso noipek-iu!

³“Ajenapki ainou mele tsak Babilon komau shikü nung gohthang aodangkü iula-i-iu. Khaiunia naiuso thainian nouso khuwane, küta nungko sautso tsükihshi-e.”

⁴“Tilai nung atao shi-e, Israelhai naiuso Yihudahai nemtsoüh ngüso Goa Ngo tü shapkü yamkü shi-e ta APAOU nou ngioji.

⁵Ngüsoüh Zion ai khutsün yam tü sange, küta nung yam tü khu-e. Ngüsoüh ngüko asaita hau athalou-e tsak shan-e naiuso nung tilaitso tsülouthe-e.

⁶“Jü khaiuniaso, onnemok jimtsün tsaküh onnemokhoi hau king nai yam phiowanikü niakeitsün khekkü noin. Ngüso onnemok hoi king tsak ainou amao king tsak ta tsakeikü ngüso tsam pe-ankü tsakeitsün khekkü noin.

⁷Ngüso eptsün chikü nou ngüso tü pha poji. Ngüso ehoisoüh ngioji, ‘Ngüsoüh APAOU thako angei sunhe, nungtiphe samüh ti chhin nung aphio tsüde. Ngüso paosiposoüh APAOU da amonglam taiu, naiuso ngüso lüko apa da mongkiukü noiau noiküla.’

⁸“Israelhai, Babilon ainou lükhu- louwan! Shingkhannio nou lüle-an! Nung leantsünko chongtingau lüthe!

⁹Ajenapki ainou ngü akongteng mele tsak lothsümonküta ngüso hau Babilon komi-e. Ngüso nung shing- khannio thako ehlithang nai ahoi yangkü tsa-e küta nung shiolou-e. Nung khaiunia nouso uokop montsün uokop-poteng ngüso watthat tilaitso tsüphioji.

¹⁰Babilonhai kamheane, nung kamhetsünsoüh ngüsoüh aiutsün alum lowan-e ta, Ngo, APAOU nou ngioji.”

¹¹APAOU nou ngioji, “Babilon khaiuniaso, asam jü mele kamhetsünso, asam mongleng lüko, monglengekü kamsan lüko, tsonyak nyaau jangtso tsak tsatsünli, naiuso mokthso apong tsak ngaotsünli,

¹²ni naiuso anoknio lochikiukü lomiam-e. Babilon nung ateng chikü ongko aphitengau the-e, nung khiam tsünoikün goumchi iula-e.

¹³Jü amongmat shioko Babilon nai saulüko kih au tsüshio-e; nung alothe nai le-ane, naiuso nung yankü khutsünso chikü lekkatkü ngawane.

¹⁴“Uokoppai loktsünso, Babilon thako ehliau asam tsaloukü nung noknio lülemlou. Asam ün uokopchon nouso apem Babilon tü lükoplut, tiautenai apaüh Ngo APAOU nou thako angei sunlou-iu.

¹⁵Noknio lemjeiküta ehkhong nou lükhong! Lo eh nouso phamongai Babilon nappaniu. Dio-ai nou lotheküta nyomaniu. Ngü Babilon ta phao sanji. Nungtiphe ngüso tü phao lüsan, ngüsoüh amaohai tü kankeitsünli ngüso tü lükankei.

¹⁶Nung goh nouko lelo lalethio tsüdekünai be-eiuyam lüko layamheshi. Nungko kihtsün gohmao khaiunia pungkü süpaihoi nousoüh kumtsün lon hatkü ngüso tsamai laokü yawanshi-e.”

¹⁷APAOU nou ngioji, “Israelhai nung chongkhao nou kumkü khupengtsün onnemok hoi khekkü noin. Chongting nai ngüso Asiriahai nokpao nou kom, naiuso nungthanko Babilonhai nokpao Nebukadnezarüh ngüso uo tü chio.

¹⁸Nungshioko ngo APAOU, Akongteng Israelhai Goa nou Asiriahai nokpao hau angja kiutsünli Nokpao Nebukadnezar naiuso apa goumchi hau angja kiu-e.

¹⁹Ngü Israel hai ngüso gohthang ai müjam noi-ishi-e. Ngüsoüh Karmel King ai sungtsün naiuso Bashan Khiamkhan ai sungtsün chihsikhiam heshiu-e, naiuso Efraim si Gilead goh ai samsantsün chihsikhiam ngüsoüh aiutsünli heshiu-e.

²⁰Tilai nung atao shi-e, Israel nai angei naiuso Yihuda nai akausai titso tsüepsane, tiautenai ngü poitaiutsün khaiunia nouso hau ngü wankiu-e, ta Ngo APAOU nou ngioji.”

²¹APAOU nou ngioji, “Merathaim naiuso Pekodhai lükum, küta ngüso loatkü lüwan. Asam tü ngü thoiluttsün alum lüchhi, ta ngo APAOU nou ngioji.

²²Goumchi nai ehli ngem sungkü noin, naiuso nungko alothetsün songkü noin.

²³Babilon haiüh goumchi athum nelangkü thiopek, naiuso lo nung athiopektsün nelangkü thipekkü noin! Nung goumchi tü ti thawao nung lulakü mele chikü lekkatkü noin.

²⁴Babilon hai, ni jü thako ehli, naiuso ngü athaiutha jin taiukiutsün ni tsüngekü ni monlouwankü noin.

²⁵Ngü jü sahsingiu taiutsün athang sopsat, küta nung jü amongmat nouko losan, tiautenai ngo Akheng- teng APAOU Akongteng, nou Babilon nai chhiau noin.

²⁶Nungtü aniokun pungkü nai lüpo küta khülam taiutsün athang nouso lothekü lüwan. Khülam kamsantsün khekkü akamloutsün jengtsaiu lükamsan! Goumchi nou lothekü lüwan! Titso poikü lataiushi!

²⁷Ngüso süpaihoi chikü lüloat! Ngüso chaoatkü lüwan! Babilonhai inyate! Ngüso angja kiuau atao shikü noin!”

²⁸(Akhulut noitsünso Babilon ainou khulükhunküta Yirusalem ai shiji, küta ngüsoüh APAOU sam Goaüh Babilonhai tü Apa amkham Tsam lotheantsün thaiutha ti chhikü phaosan, nung ngüsoüh chiteji.)

²⁹“Uokoppai loktsünso tü Babilon tü po au lüngio. Uokoppai kankeiau montsün khaiunia pungkü ahong ta lüngio. Noknio nou lülemlou naiuso khaiunia tsaktso lakhulükhun-i. Chhikü shitsün chikü thaiutha laokü lükiushi, naiuso amaohaitü kankeikü shitsünli lüchhi, tiautenai Ngo Israelhai ün Asio tsak nou thako ngüsoüh abülom nou chhin.

³⁰Nungtiphe nungko noitsün pühe nouso yamkheng nousoko loate, naiuso nung ajekhaiu kolu nungko noitsün süpaihoi nouso chikü lomo-e, ta Ngo, APAOU nou ngioji.

³¹“Babilon hai, asam abülom nou meankü noin, nungtiphe ngo Akhengteng APAOU Akongteng, asam thako noin! Asam angja kiuau atao nou shikü noin.

³²Asam abülom mele thekkatkü loiane, naiuso asam lektsa au sau tsünoi-e. Ngo asam noknioso tü in jeklut-e, naiuso nung lemkü noitsün alum lotheane.”

³³“Israel naiuso Yihudahai athangmang nai noin ta, Akongteng APAOU nou ngioji. Ngüso thalouwan- tsünso chikü nou ngüso shimkü noikü ngüso tü hüji naiuso ngüso tsükhu-iji.

³⁴Lüko sauüh ngüso kipsanau noin, apa akong noin-apa nian APAOU Akongteng. Apa ngüso thaiuthako tsakiu-e, naiuso apaüh goumchi hau aalou nou kankü shikiu-e; lüko Babilonhai thaiutha to apülai noin.”

³⁵“Babilon hai, nungko noitsün khaiuniahoi, nokshing nouso naiuso nungko mongthat mongsai noitsün khaiuniahoi nouso thako sah tsak noin ta APAOU nou ngioji.

³⁶E-po yaang nouso thako sah tsak- naiuso ngüso mainga iula-e! Ngüso süpaihoi thako sah tsak- ngüso titengkü alekkat!

³⁷Ngüso mokthso naiuso ehli tsamkei nouso thako sah tsak- naiuso gohmaohai sauhai ngüso ongko kihakü noin, ngüso menyiuhoi iula-e! Apa chaitaiu thako sah tsak, naiuso nungso kamheane!

³⁸Nung goh khako khiam naiusile tsak kankü ashi, naiuso nung haiu nouso waikü lükhuwan. Tiautenai Babilon hai goumchi nung khaiuniahoi mainga iula-itsün alekkat sotsom goumchi tsak noin.

³⁹“Nungtiphe Babilon nung biya naiuso angei onthso nousoüh naiuso tsüsiokün waio nousoüh asaita sailutsün tsak iula-e. Loto nungko khaiunia tilaitso tsükihshi-e.

⁴⁰Ngü Sodom si Gomorra naiuso nungko shimkü noitsün noksong nouso lomowantsünli Babilon tü lüko chhi-e. Nungko tilaitso khaiunia tsükihshi-e ta ngo, APAOU nou ngioji.

⁴¹“Ajenapki goumchi tsak ainou khaiuniahoi tsak shiji, laiukü ainou akongteng mele tsak; naiuso nokpao piakü nou ehli au thaiutha khemlouji.

⁴²Ngüso pha ai uokoppai naiuso sah nouso semkü noin; ngüso mongthe naiuso atsüojin tsüsun. Ngüso mokthso chiai moknoi nai khiamnok khiampek sang khekkü noin. Ngüso Babilonhai thako ehli au khemloukü noin.

⁴³Babilon hai nokpaoüh nung ngem lulanai, apa pha ngaongao. Methso chettsün taoko menyiu tsak angjatsünli apa amongkia mongmat nou thalouwan.

⁴⁴“Chongkhao tsak Yordan liutsa langmong ainou shikü thsanyan asangnya noi nai sungtsünli, ngo, APAOU nou shikü Babilonhai ngüso noknio ainou alekta jingkü khu-i-e. Nungai ahei sübao ngü chosane, apaüh mele nou tü nok-shinge. Ngüko weluau sau tsüshio-e. Ngotü sauüh taisome? Ti nokpaoüh ngotü khengshiau shio-e?

⁴⁵Nungtiphe Babilon noknio thako ngo ti athattaiu noin, naiuso apa ün khaiuniaso tü ngo ti chhiau yangji nungtü anglu. Ngüso thsoso lüko tenkü khuwane, naiuso khaiunia pungkü lekkate.

⁴⁶Tilai Babilon loiane, goumchi athum haiuhaiukü ahngao nou sunge, naiuso alekkat nou wetsün sang amao mele nousoüh lula-e.”