Read Khiamniungan Naga Yeremia 51 Bible Online

Yeremia 51 - Khiamniungan Naga bible

Yeremia 51

¹APAOU nou ngioji, “Ngü Babilon naiuso nungko noitsün khaiuniahoi nouso thako alotheantsün ahsheih tsak kankü shiji.

²Ahsheih tsaküh tsokap shipkü khuwantsün khekkü Babilonhai lotheau ngü gohmao khaiunia nouso kankü shiji. Tilai nung alotheantsün ajekhaiu nou shi-e, ngüso tü ano pungkü nai eh nou shipo-e, naiuso nung gohthang akeng leane.

³Nungko noitsün süpaihoi hau ngüso uokopchon koppau tsüdekünai ngüso ehli sheitho tholouau atao lakiu. Pühe nouso poikü lawan! Süpaihoi athum lomokü lüwan!

⁴Ngüso noknio yamkheng nouso ai tawaikü eane.

⁵Ngüsoüh Israelhai ün Asio Tsak nou ngo thako angei sunlüko Ngo APAOU Akongteng Goa nou Israel naiuso Yihuda tsüleane.

⁶Babilon ainou lükhulou! Asam aa thaiutha lükhulou! Babilonhai angei shiokoto laloatan-i. Apa tü omtso ngo lo jü phao sanji naiuso angja kiuji.

⁷Babilon nung goumchi athum tukkatitsün chaiou thengkam tsak jü phako noiküla. Mele nousoüh nung theng shiuküta ngüso mongyang mowan.

⁸Babilon hai alekta loian naiuso lomowan! Nung thaiuthako lümongsaiu! Nung mou nouso lomeiau moushe nou lütuh, tsüngean, nungüh meilakütso noi-esao.

⁹Nungko kihtsün gohmao khaiunia nousoüh ngiom, ‘Samüh Babilonhai halouau kowe, lüko nung thatü tsangankü noiküla. Nungtiphe lo samüh apa leanko küta tsamai laokü khuwanko. Tiautenai Goa nou Babilonhai tü apa oukong moishemkü lomokü angja kiu-iu.’”

¹⁰APAOU nou ngioji, “Sam ayamtha nai noin ta APAOU nou haniu. ‘Sam khukü Yirusalem khaiuniahoi hau APAOU sam Goaüh chhitsün chiteko ta khaiuniahoi nou sang songkü wekü ngiom.’”

¹¹APAOU nou Media hai nokpao nouso lothsümoniu, tiautenai apaüh Babilon lotheanau ayang noin. Nungti apaüh APAOU ün Amkham Tsam lothekü phao sanau thaiutha noiküla. Ashipotsün ahei nousoüh nungti ngiokhem kiukü ngioji, “Asam ün uokopchon nouso lüshimonlou! Shikhao nouso khemloukü ataiu!

¹²Babilon hai lungpe tü pha po-au ii nou ahan. Ehü nouso oulülokong! Ehü nouso lütaiu! Khaiuniahoi nou ehjio nai lütaiu!” Babilon hai tü apaüh ti chhi-e ta ngiokü noiküla, nung APAOU nou chhianiu.

¹³Nung goumchi ün haiu naiuso memei jengtsaiu nouso piakü noiküla, lüko atao nou khemaniu, naiuso aakih ashiyam nou chananiu.

¹⁴Akongteng APAOU nou meshen aa tsangkü ngiomongshing shaniu, nung apaüh Babilonhai komau jongku hoi apiatengli khaiuniahoi piakü nialoukü shi-e, naiuso ngüsoüh ashioloutsün sang asong nou we-e.

¹⁵APAOU nou apa oukong tsangkü goum shan, apa mongthat mongsai tsangkü goum shanküta aün nouso sapeng.

¹⁶Apa ngiokhem kiunai khiam nouso maou khüthanai ngaoji; apaüh goum athon ainou thengmia nouso kankü shiji. Apaüh ah-uo taonai ahsalap nouso shanji naiuso akamtaiutsün tsampai ainou apaüh ahsheih nou hongji.

¹⁷Nung khako khaiuniathso nou a-aiu naiuso ayangloutsün tsüha ta yangji; sauhaiüh sotsom saiji ngüso amiam noin, tiautenai ngüsoüh saitsün goa nouso oujei naiuso ilo tsünoi.

¹⁸Nungso atheau tsünoi, naiuso chinyanau noin; APAOU shinai ngüso hau angja kiu-e naiuso lomokü wane.

¹⁹Yakob Goa to ngüso khekkü tsüde, apato alum shantsün tsak nou noin, naiuso apaüh Israel nung apa tengkamau chosan. Apa nian APAOU, Akongteng noin.

²⁰APAOU nou ngioji, “Babilon, ni jü shenhopkai, jü ehli sheitho. Ngo ni mele naiuso nokshing nouso lonyomanau,

²¹mokthso nouso naiuso nung chiai moknoitsünso lonyomanau, ehli tsamkei naiuso aniakeitsünso lonyomanau,

²²melohoi naiuso menyiuhoi loatanau, petchehoi naiuso methsohoi chaoatanau,

²³onnemok jimhoi naiuso onnemok hoi; eiu-atsünso naiuso ngüso mokthsoso chaoatanau, nokpaohoi naiuso apa khemko asonghoi nouso lonyomanau kankeikü shin.”

²⁴APAOU nou ngioji, “Ngüsoüh Yirusalem tü tsümeikü chhikü shitsün chikü thaiutha ngü Babilon naiuso apa khaiuniaso hau laokiu- shitsün asamüh eppe.

²⁵Babilon hai goumchi athum lotheantsün king tsak khekkü asam noin, lüko ngo, APAOU nou, asam eh noin. Ngü nitü jü phaüh thalou-e, naiuso goh ai thoiloi-e, naiuso ni pu au iulakü leane.

²⁶Ni lotheantsünko nou lung tilaitso loüh tsamla thaiutha tsükankeiha shi-e. Ni asaita singtso goh tsak khekkü wanane, ta ngo, APAOU nou ngioji.

²⁷“Eh-po au iilotsün alat tsak akiu! Mele nousoüh lula au jangong nou amatngao! Babilon hai thako ehli au thaiutha mele nouso lükhemlou! Ararat hai, Minii hai, naiuso Askenaz hai nokshing nouso tü pha puo au lüngio. Nung komtsün ko ahei au asonghai tsak lüthio. Jongkuhoi tsak tsapjeikü shitsünli mokthso nouso akamshi.

²⁸Babilon hai thako ehliau mele nouso lükhemtaiu. Media hai nokpao nouso, ngüso ahei naiuso asonghoi nouso, ngüso nokshing khemko mele pungkü lükhemlou.

²⁹Babilon nung sau kih au tsüshiokü shanau APAOU nou apa ayangtaiu chhilükhun nai, goum nou ngaongao naiuso haiuhaiu.

³⁰Babilon hai süpai nouso ehlitsün laokü meshen ehüthang nai noi. Ngüso mong tsünyanshikü menyiu- hoi tsakli iula. Noknio bekhan nouso lothean, naiuso tsam nouso tü in jeklut.

³¹Babilon hai nokpao hau apa noknio ano pungkü nai lotheantsün ngiongem chiteau ngiongem kantsünso tsakjam tsakjam ta jingkü shikhuji.

³²Ehoi nousoüh haiu yantsün athang thalowaniu, naiuso ehüpuo nousotü in jekluttaniu, loto Babilon hai süpaihoi henyikü noin.

³³Shakta ehoi nousoüh ngüso tsonyak nyatsün nai tsonyak ngamthiokü nyatsünli ngamthio-e ta ngo, APAOU, Akongteng Israelhai Goa nou ngioji.”

³⁴Babilonhai nokpaoüh Yirusalem sapsan küta mioli-an. Apaüh noknio nou pulak tsak khekkü lokengkü wan, naiuso nung dragon pao nouli miolikü liowan. Apaüh aiutsün apaüh louküta apoi nouso yakkan.

³⁵“Sam tü pha potsün thaiutha, Babilon hai chiai thsale lünoi!” ta Zion khaiuniahoi hau lüngio-i. “Sam omhetsün thaiutha, Babilon hai chiai thsale lünoi!” ta Yirusalem hai hau lüngio-i.

³⁶Nungtiphe APAOU nou Yirusalemhai tü ngiom, “Ngo asam phao sane, naiuso asam tü ngüsoüh chhikü shitsün thaiutha ngüso hau thami-e. Ngü Babilonhai khiamngan wai-ani-e, küta nung haiu nouso ap-ani-e.

³⁷Nung goumchi liuthai- nian kihtsün alothe nou meankü iula-e. Nungko sau tsükih-e, naiuso nung eptsünso chikü ahat naiuso alekkat nou meane.

³⁸Babilonhai chikü chongkhao nousoli ngao-e naiuso khaothso nousoli hami-e.

³⁹Ngüso chinek müjeiji süne? Ngü ngüso hau sümai tsak khemsane küta ngüso monglingkü tokkati-e; nungko ngüso asaila ainou tilaitso tsüchushi-e.

⁴⁰Ngü ngüso onnemok- thso, wonthso, naiuso onnemokpong- thsoli aloatau kankü khu-e, ta APAOU nou ngioji.”

⁴¹APAOU nou Babilon thaiutha ngioji: “Goumchi athum nou lomsantsün noknio ehoi nousoüh thalouwaniu! Babilon nung mele nouso khako alekkatau tsak iulakü noin!

⁴²Babilon khütha nai khiamnok nou lailoukü shikü khiampek ngem nou apa loijei-an.

⁴³Noksong nouso khaiunia sau kih au tsüdekünai tsakei au tsüshiokün naiuso khiam tsünoikün singtso goh tsak khekkü alekkat iula.

⁴⁴Ngü Babilonhai goa Bel hau angja kiu-e, naiuso apaüh kauloutsün jengtsaiu apa hau le-ani-e; küta loto mele nouso hau apa tü tsü-amkhami-shi-e. “Babilon ün lungpe nouso loi-an.

⁴⁵Israelhai, asam nung ainou jingkü lükhuwan! Asam aa thaiutha jü athsüoteng mongmat ainou lükhu- lou.

⁴⁶Asamüh atenlam ngiongem lülatsün shioko asam mong lahen tsüdekünai hatkü lanoi. Goum nai pha po-etsün naiuso nokpao tsaküh nokpao tsak ko li-etsün atenlam ngio pon pungkü in amomo lopengji.

⁴⁷Naiuso ngü Babilonhai goa sotsom nouso hau angja kiuau ajekhaiu nou shiji. Nungko goumchi athum amiam nai wanane, naiuso nungko noitsün khaiuniahoi apem loatkü wane.

⁴⁸Ajenapki ainou khaiuniahoi shikü Babilon lomowan nai goumchi nai si aün nai noitsün alumtso nou sang asong nou we-e.

⁴⁹Goumchi apem nai khaiuniahoi eanau Babilonhaiüh losan, naiuso lo Israelhai apiateng eantsün shioko Babilonhai loiane, ta ngo, APAOU nou ngioji.”

⁵⁰APAOU nou Babilon nai noitsün apa khaiuniaso tü ngioji: “Asam eantsün ainou thakhuphe. Lo lükhu! Taiukü lanoi! Asam meshen tsam laiukü ainou lüko, Ngo asam APAOU, lüyangsan, naiuso Yirusalem labean.

⁵¹Asamüh ngioji, ‘Sam lomiam kiu-iu, ayam pungkü nai sam tsao- silao noin ta samüh yangji, tiautenai Amkham Tsam nai Asiothang nouso gohmaohaiüh thalouwaniu.’

⁵²Nung shioko Babilonhai goa sotsom nouso tü mikhemau, naiuso nung goumchi athum nai atawai anget nou noiau atao nou shiji ta ngü ngioji.

⁵³Nungti Babilonhaiüh maou nai sungkü tsam amongteng lah lüko, nungai ngü nung lomo-iau khaiuniahoi honge ta ngo, APAOU nou ngioji.”

⁵⁴“Babilon nai goumchi lotheantsün thaiutha mongsaiukü shaptsün sang tü anglu, ta APAOU nou ngioji.

⁵⁵Ngü Babilon lotheanji naiuso sang asong nou lonyapkü taiukiuji. Khiamtsang ngem khekkü süpaihoi nouso khaolaokü shiji, küta ehkhong sang asong nou wekü apa tü poji.

⁵⁶Ngüso Babilon lotheanau shin, naiuso süpaihoi nouso thalouwaniu, naiuso ngüso uokoppai nouso ngekkan. Tsümeikün hau angja kiutsün ngo Goa noin, naiuso Ngü Babilon hau apaüh epau maikü noitsün kiu-e.

⁵⁷Ngü nungko noitsün nokpao nouso, mongthat mongsai noitsün khaiuniahoi, aheihoi, naiuso süpaihoi nouso tukkati-e. Ngüso sai-e naiuso tilaitso tsüchushi-e ta Ngo APAOU, Nokpao nou ngioji; Ngo APAOU, Akongteng nou noin.

⁵⁸Babilon lungpe akongteng nouso goh nouko wekü iula-e, naiuso apa ün atsokteng bekhan nouso in nou jekthiowane. Nung mele nouso chhisiya alesan titso tsü-iula; ngüso oukong apem innyai nai khuwan, ta Ngo APAOU, Akongteng nou ngioji.”

⁵⁹Mahseia thsao nou Neria thso Seraia nung nokpao Zedekia ün tengkhaiu asat noiküla. Yihudahai nokpao Zedekia nokshing pon püle nouko nai, Seraia nung Babilon nai apako aikü khuhakü noitaoko ngü apa hau ayamhan ajantso kiu.

⁶⁰Babilon tü alothe shiau noitsün thaiutha loüh Babilon thaiutha alum athawao au noitsün thsam tsak ko satkü kiu.

⁶¹Ngü Seraia tü ngiom, “Tilai ni Babilon sao-iu-e, nungko sattaiutsün alum khaiuniahoi nouso hau sang asong nou wede au labean.

⁶²Nungai nungti misao lüsao: ‘APAOU, nung thangko ti aa thainian ti tsükihshi-e, tsüdekünai nung asaita aodangkün athang tsak iula-e, nungti ni nung athang lotheane.’

⁶³Seraia, tilai ni nung thsam khaiuniahoi hau wedetsün kheme, nungai nung lung tsak tü lükelut, küta nung Eufrates Haiumongai lüyakthio,

⁶⁴küta lüngio, ‘Nungti Babilon tü thawao-e, nung limkü nappan-e, naiuso nung loto tilaitso tsopkü tsüsungshi-e, tiautenai nung Babilon noknio khako alothe APAOU nou kankü shiji.’” Yerimia ngio nouso nungko thonji.