Read Khiamniungan Naga Yeremia 52 Bible Online

Yeremia 52 - Khiamniungan Naga bible

Yeremia 52

¹Tilai Zedekia Yihudahai nokpao tsalou, apa achetpon kheikü tsak noiküla, naiuso apaüh Yirusalem nai pon chekü tsak nok-shing. Apa nyiu nian Hamutal, nung Libnahai noknio nai kihtsün Yerimia thso noiküla.

²Nokpao Jehoiakimüh chhikü shitsünli, Nokpao Zedekiaüh lüko APAOU khako ti tsümei nung chhikü angei sunlou.

³Yirusalemhai si Yihudahai khako APAOU thatü mongmat, nungtiphe Apaüh ngüso apa kha ainou koman. Zedekiaüh Babilonhai Nokpao Nebukadnezar tü khengshi,

⁴nung- tiphe Zedekia nokshing pon lükao alei che naiuso ajekhaiu chenyi nouko nai Nebukadnezar apa süpaiso hakü shiküta Yirusalem tü poh. Ngüsoüh nung noknio phiko asao- thang shan, naiuso ngüso thalouau lungpe pe,

⁵küta nung Zedekia nokshing pon chekü tsak nou mokhemkün lektso nungti lemloukü wan.

⁶Nung ponkolu alei püle ajekhaiu lükaonyi nouko nai naiusile thsüokü tsaokü iulakü khaiuniahoi nousoüh eheau titso tsükishikü nai,

⁷nung noknio lungpe nouso lopek- kan. Nungko Babilonhaiüh nung noknio lemjeikü noi lüko, süpaihoi apem asoh taoko khulükhunan. Ngüso nokpao ün aimong yamai khuküta lungpe nime jei-etsün nai bekhan thsatkü khukü Yordan Tsamei ai khuwan.

⁸Lüko Babilon süpaihoi nousoüh Zedekia nokpao tü komkü khukü Yeriko shimkü tsamei nai apa thalouwan, nungai apa süpaihoisoüh apa wankü khuwan.

⁹Zedekia nung Hamat hai goh Ribla hai noknio sübaoko nokpao Nebu- kadnezar noiküla nungai kankü khu, nungko Nebukadnezarüh apa loatkü wanau ngiokhem kiu.

¹⁰Ribla noknioko Zedekia khako Nebukad- nezarüh apa thsoso loat naiuso apaüh Yihudahai asonghoi nouso loatkü wan.

¹¹Nungthanko Nebukadnezarüh Zedekia niovei lowanküta sonkhiang nou kekü Babilon nai kankü khuwan. Nokpao Zedekia Babilon akhotsamai apa etsün ajekhaiu saokü noi.

¹²Babilonhai Nokpao Nebukad- nezar pon chekü lükao alei pungo ajekhaiu chenyi nouko nai, nokpao hau ayamhantsün naiuso apa süpaiso khako asong Nebuzaradan, nung Yirusalemai nap.

¹³Apaüh Amkham Tsam, Nokpao tsam, naiuso atenghoi nouso tsam jekthiowan;

¹⁴naiuso apa süpaisoüh noknio lungpe nouso lothean.

¹⁵Nungai Nebuzaradanüh noknio nai leankü khuwantsün khaiuniahoi chhisiya nai waimonhoi, naiuso Babilonhai wankü khulükhuntsünso thaloukü Babilon nai kankü khu.

¹⁶Lüko apaüh tengkam tsütaiukün, tsosilu- teng nouso sainaoshep eiu nouso ai chhiau Yihuda nai ajantso poi-an.

¹⁷Babilonhaiüh daoson kheam nouso nelangkü thiopek, naiuso Amkham Tsam nai anoiluttsün daoson asong nouso, naiuso daoson nouso chikü Babilon nai kankü khuwan.

¹⁸Ngüsoüh loüh nung lak nouso, naiuso amthang tsaowan nai kankeitsün aleptsün, tson sontao kankeitsün jengtsaiu nouso, aloat chaithio nouko she thuloutsün chiutso nouso, angannyam jah au kankeitsün chiutso nouso, naiuso amkham tao kankeitsün daoson jengtsaiu nouso, chikü kankü khu- wan.

¹⁹Ngüsoüh chaiou si tangkason nou shantsün jengtsaiu alum: chiu ehentso nouso, inkaiu jektsün chai nouso, aloat chaithio ainou she loutsün chiutso nouso, lak nouso, tson taiutsünso, angannyam jahtsün chiutso nouso, naiuso theng chaithio nouso thsa-itsün chiutso nouso, alum kankü khuwan.

²⁰Nokpao Solomonüh Amkham Tsam thaiutha shantsün daoson nime, kheam nime, anoiluttsün chiukao asong, naiuso jangtsopong chekü nimeüh hachutsün nungso athatluau thatü lethsangkü noiküla.

²¹Kheam nime nungti: Kheam nemtso nung atsok nai meter 8, naiuso lemkü nai meter 5:3 noiküla. Nungso aokü, naiuso son nou milimeter 75 teithamkü noiküla. Kheam pungkü chiai daoson alengyamlutkü meter 2:2 tsokkü, naiuso nung lemkü nai sasashep leng yamlutkü nung chikü daoson nou sheithokü noiküla.

²³Nung kheam pungkü tü apem nai sasashep tsom tsak, naiuso aolükaokü luok to goh ai nai athapau tsangsheikü noiküla.

²⁴Loüh Nebuzaradan süpaihoi ongko ahei nou Akhengteng Meson Seraia, naiuso nung khemko nou Zefania, naiuso amkham tsam nai ateng asong amao süme lüko akhothiotsün nai kankü khuwan.

²⁵Noknio ainou süpaihoi ongko ahei tsak, noknio nai losaokü noitsün nokpao ün tengkhaiu ayamhanau thetsün khaiunia chinyat, süpai ahei nou tü hachutsün, süpaihoi thaiutha asat thetsün, naiuso amao ateng khaiunia aoluok apaüh nialoukü khuwan.

²⁶Nebuzaradanüh ngüso Babilonhai nokpao sau Ribla noknio,

²⁷Hamathai goumchi ai noiküla, apa dongai kankü khu. Nungko nokpao nou ngüso tü shiohküta loatkü wan. Nungti Yihudahai ngüso goh ainou akhothiotsün nai kankü khuwan.

²⁸Nebukadnezarüh akhothiotsün nai kankü khuwantsün khaiuniahoi thaiutha nungti satkü noin: apa nokpao tsalouküta pon chinyat nouko nai kankü khutsün 3, 023;

²⁹apa nokpao pon chekü petjei nouko nai Yirusalem ainou 832;

³⁰naiuso pon kheikü süme nouko nai kankü khutsün 745; Apem kamkü nai khaiunia 4600 kankü khuwan.

³¹Babilonhai nokpao Evilmerodak tsaloutsün pon nai, apaüh Yihudahai Nokpao Jehoiachin apa akhotsam ainou jashitsün tsangkü apa hau atsüojinyang han. Nung Yihudahai nokpao Jehoiachin akhothiotsün nai thaloukü khuwanküta pon aosamkü chinyat, alei chekü nime, naiuso ajekhaiu kheikü pungonyi nouko thawaokü noiküla.

³²Evilmerodaküh apatü tsüojinkü kankei naiuso akhothio nai noitsün amao nokpao nouso sauhai Babilon nai apako hakü noiküla, nungso chiai apa hau asuhat naiuso noikham asongtso nou kiu.

³³Nungtiphe Jehoiachin hau akhothiohai neshe sheitho li-ekiu küta nokpao thaisam puo nai apa apoi aakih thaiutha heshiuhaau ayam sopkiu.

³⁴Apa aa noitsün lektso ajekhaiu pungkü apa hau apotsün thaiutha asaita aleichai kiukü noiküla.