Read Khiamniungan Naga Yeremia 6 Bible Online

Yeremia 6 - Khiamniungan Naga bible

Yeremia 6

¹Asam Benjamin thsoso, asam kipsanlouau thaiutha lükhulou! Yirusalem ainou lühaiulou! Tekoa nai jangong nou lümat naiuso Bet-Hakkerem nai iilouau in nou lüjahsan. Tiautenai akuothe naiuso alothe nou ajenapki ainou shiau noin.

²Zion noknio nung aleng ameiting noin, lüko nung lotheane;

³nokpao nousoüh ngüso süpaihoiko hakü nungko asaothang shane. Nung nok- nio lemkü ngüsoüh ngüso nejenkhio lahsane, naiuso ngüso pungkü nou momo tiai aiu nou ta asaothang shane.

⁴“Yirusalem komau lükhemlou! Khemloukü lünoi! Sam nung noknio tü anyiwem taoko pha poh-e!” ta ngüsoüh ngio-e. Lüko ngüsoüh thala-e, “Nung thatü phi- aniu, nung ajekhaiu yanlükhunan aulu noin; naiuso asham ah-khep nou laiuwaniu.

⁵Samüh nung noknio asoh kome, samüh noknio lungpe nou lothe-ane.”

⁶APAOU Akongteng nou nung nokpao nousotü Yirusalem thalouau thaiutha pai nouso sahongküta phansankü ashan ta ngiokü noiküla. Apaüh ngiom, “Ngü nung noknio hau angja kiu-e, tiautenai nung athang- mang nou meankü noin.

⁷Temkhao nai khiam sanglingkü noitsünli, Yi- rusalemüh meshen angei kamtaiuji. Nung noknio nouko angemsingem naiuso alothe Ngü lulaji; Ngü eptsün nung chikü akia naiuso atawailu noin.

⁸Yirusalem khaiuniaso, nung angja nouso tsangkü athaiutha a lo- tsüotsün tsak lüthe-i, tsüdekünaito, Ngo ni wanane, Ngo anoknio saulüko kih au tsüshiokün singtso goh tsak hau phokle-e.”

⁹Akongteng APAOU nou ngo tü ngiom, “Sainaoshep eiu ainou sainaoshep panlouwanküta paikeng le-antsün khekkü Israelhai shiowane. Nungtiphe atao motsangankünai ni shiotsün koto ngüso kipsanela.”

¹⁰Ngo thalan, “Ngü ngüso lotsüokü chite lüko sauüh ngotü anglu-e? Angiongem tü angluau ngüso mongkongkü nanji; amitha tü ngüso nyailutji.

¹¹Ngüso thako ni mongmattsün nou ngo tü lüko mongkiaji, APAOU, naiuso Ngü nung jeilouau tsüshioji.” Nungaih APAOU nou ngotü ngiom, “Yamkheng nai methsohoi nouso, naiuso pühehoi kamshikü noitsün chiai jüamongmat lühonglut. Tsam- mongpo naiuso tsammongnyiu nouso sonthe nouso lüko tsüpoitaiu kü kankü khuwane.

¹²Ngüso tsam, eiu naiuso tsammongnyiu nouso amao- hai hau kiuwane. Nung goumchi khaiunia nouso hau Ngü angja kiu-e.

¹³Asong naiuso ehen pungkü nou ayamtsüdekün tsangkü chaile au koweji; e-po nouso si mesonhoi nousoüh lüko khaiuniahoi nou kausaiatji.

¹⁴Jü khaiuniaso muo nung khunyanlilu ngüsoüh chhisiyaji. Lüko apem to momeikü taiukü, ‘Apem meikü noin,’ ta ngüsoüh ngioji.

¹⁵Nung achinyan chhisiya ngüsoüh chhitsün shioko ngüso miamkü noilümo? Tsüde, ngüso tilaitso miamkü tsünoi, loüh ngüso miamau ngüsoüh angetso tsünge. Nungtiphe Ngü ngüso hau angja kiunai, amaohaili ngüso lüko loi-ane, ngüso thaiutha nung athon noi-e ta ngo, APAOU, nou ngiowaniu.”

¹⁶APAOU nou apa khaiuniaso tü ngiom, “Asam yamjung nouko tsaküta lüthap. Naiuso peh ainou yam amei tiai noin nung lüsang; küta nungko lütsakei; asam aaloukü kih-e.” Lüko ngüsoüh ngiom, “Tsüde, nungko sam tsütsakei-e!”

¹⁷Nungaih APAOU nou jangongmat ngem jiokü ang-au ehü nouso taiukiu. Lüko ngü- soüh ngiom, “Samüh tsü-anglu-e.”

¹⁸Nungtiphe APAOU nou ngiom, “Asam mele nouso, jü khaiuniaso tü ti thawaoau noin nung anglu, naiuso angelou.

¹⁹Goum, anglu! Nung khaiuniahoi khako ngüso mongyang tsümeikün naiuso ngüso ayangtsün mai nou ngü ngüso dongai kankü shi-e, tiautenai ngüsoüh jüngio tsü-ang, naiuso jü ngiokhem nouso le-aniu.

²⁰Ngüsoüh angannyamtsün Sheba ainou kankü shikü, tsüde- künai goumchi laiukü ainou kankü shitsün laoshang thaiutha Ngü ti apaotsang noin? Ngü ngüso chaithio tsülo-e tsüdekünai aloat chaithio nouko tsümongling-e.

²¹Nungtiphe ngü nung khaiunia nouso henyi-ikü loi-i-e. Po naiuso melothso nouso, naiuso haimei nouso ti phaosipo nouso e-ane.”

²²APAOU nou ngioji, “Ajenapki goumchi tsak ainou khaiuniahoi tsak shiji, naiuso akongteng mele tsak ehli au khemlouji.

²³Ngüso uokoppai naiuso sah nouso semkü tsalou-iu, ngüso tü atsüojin tsülepkü thatü tsaokü noin. Ngüso mokthso chiai moknoi nai, ngüso sangngem khiampek ngem khekkü ngemji. Ngüso Yirusalem tü khengshikü ehli au khemloukü noin.”

²⁴“Samüh ngüso ngiongem lula-iu,” ta Yirusalemhaiüh ngiom. “Naiuso sam pha uochankü iulaji. Amonget nou methso chet taoko nyiuhai tsak angjatsün khekkü akuo nou sam tü shisao-iu.

²⁵Sam eiu ai tsüdekünai yamai tsakei-au tsüsom, tiautenai sam ehso sam lemkü noiphe ahat nou meankü noin.”

²⁶APAOU nou apa khaiuniaso tü ngioji, “O jü khaiuniaso, asamüh nethe tenlouküta luo ongnai lüchinkei. Melo thsosa tsak ean nai mongsaiutsünli niochekhiam saokü thatü lümongsaiu; tiautenai ni lomoau noitsün alekta shikü nitü pha poh-e.

²⁷Yerimia, ni son tsak tü thelutsünli jü khaiunia tü lüthelu, küta ngüso ti khekkü noin nung lüyamsan.

²⁸Ngüso chikü taosonli kongkü mongkongkü khengshitsün noin. Ngüsoüh ngio alumai lopengkü alothe nai tsakeiji.

²⁹Innyai nouto thatü thsüokü nyaiji, lüko atheau tsünoikün son nouso tsükhiam- lükhun. Jü khaiuniaso losangau ti pohkü tsünoi, tiautenai tsümeikün losanküta tsüwanankü noin.

³⁰Ngüso tü atheau tsünoikün sonkhop ta jone, tiautenai nung Ngo, APAOU nou ngüso le-aniu.”