Read Khiamniungan Naga Yeremia 7 Bible Online

Yeremia 7 - Khiamniungan Naga bible

Yeremia 7

¹APAOU nou ngo Yihuda hai amkhamau khukü noitsün Amkham Tsam bekhan nai hong. Nungaih Akongting APAOU, Israel hai Goa nou ngüso tü welutau ngo tü nungti ngiom: “Asam saisile naiuso chhisiya nouso lüli-e, naito Ngü asam nungko kih-i-e.

⁴Sam ‘Aloukü noin! Nung APAOU Amkham Tsam noin!’ ta yaang ngio nouso tü asamüh lamonglam.

⁵“Asam kihtsün naiuso chhitsün saisile nouso lüli-e. Asam tsaküh tsak khako ngiotsüo lükankei.

⁶Mesanhai, mejet hai, naiuso jihi hoi tü angja kiutsün lülaolou. Nung goh nouko aphio tsüsunkün khaiuniahoi loattsün lülaolou. Amao goa nouso tü amtsün lülaolou, tiautenai nungüh to asam lothe-ane.

⁷Asam li-eshi- etünaito, Ngü sübao asam paosipo so asaita tengkam thaiutha kiutaiutsün goh nai asam kihlutkü noi-e.

⁸“Athaplu, asapat nai yaang ngio tü asamüh monglamji.

⁹Asamüh kao nou kaoji, khaiunia loatji, naiuso tsütsamtsütsüokü chhiji, naiuso atsüotsüdekünai ngiomong shinge shanji, Baal hau aloat chaithio thioji, naiuso asamüh nung khako tsüngedekün goa nouso tü amji.

¹⁰Nungso Ngü chinyantsün asamüh chhiküta, jü tsamai shikü jü khako tsakü ngioji, ‘Sam aloukü noin!’

¹¹Jü tsam kaohoi thaiutha asoloutsün thang ta asamüh yangjiso? Asamüh ti chhiji nung ngü epiu.

¹²Ayateng nai Ngo tü amkham kiuau Ngü chosantsün athang Shiloh nai lükhu, küta jü khaiunia Israel angei thaiutha ngü ti chhikü noin nung lüthaplu.

¹³Asamüh nungso angei chikü sunlou-iu, naiuso Ngü asam tü laoshi laoshikü chite lüko, asamüh nungtü anglu au tsümongchio. Tilai Ngü asam jon, asamüh tsüthala.

¹⁴Nungtiphe asam amonglam taiu- tsün Jü tsam tü Shiloh nai chhitsünli Ngü chhi-e. Nung Ngü asam paosiposo naiuso asam hau kiutsün athang tü lüko Shiloh nai chhitsünli wekülu chhi-e.

¹⁵Israel hai, asam deisinioso komantsünli, jü khako nou Ngü asam komane; ta Ngo, APAOU, nou ngiowaniu.”

¹⁶APAOU nou ngiom, “Yerimia, nung khaiuniahoi thaiutha mi nou lasao. Ngüso thaiutha lawekiu, lasaokiu, ngo tü lakoja, tititenai ngü ni tü tsü-anglu-e.

¹⁷Yihuda noknio nouso naiuso Yirusalem yamkheng nouso ai ngüsoüh ti-in chhisiyaji ni tsüepso?

¹⁸Methsohoi nousoüh ajahpai kamshiji, po nousoüh in nou jahji, naiuso menyiuhoi nousoüh Aün hai Menyiu Nokpao ta jontsün goa thaiutha themtsai tsai au wonne laopekji. Ngo mongmat sung-iau ngüsoüh amao goa nouso tü theng thsalutji.

¹⁹Lüko atsüoting nung ngüsoüh Ngo mongmat-itsün süne? Tsüde, nung ngüsoüh ngüso chija mongmatloji naiuso ngüso khaioko chija amiam kanlutlouji.

²⁰Nung- tiphe Ngo, Akhengting APAOU nou jü amongmat atsüoting nouto nung Amkham Tsam chiai kheplut-e. Jü amongmat nung khaiunia sauüh lonyatau tsüshiokün innyai tsak khekkü noin.

²¹“Jü khaiuniaso, aloat chaithio ajantso amthang nai thumkü lüjah, naiuso asamüh ajantso heau shio-e. Lüko Ngo APAOU nou ngiotsün to, asamüh nungso chikü henai mei.

²²Tilai ngü Ijip ainou asam niasan, ngü asam paosiposo hau ajah chaithio thaiutha tsüdekünai amao aloat chaithio thaiutha athoilut titso tsükiu.

²³Lüko Ngo ngüso Goa theau naiuso ngüso jü khaiuniaso theau ngo tü angio ang-au thoilut. Naiuso ngüso thaiutha meikü khuau, Ngü ngüso tü thoiluttsünli kih au ngiom,

²⁴Lüko ngüsoüh angio tsü-ang, tsüdekünai mongtsükiu. Nung liko ngüso mongkong naiuso angei mongpem nou ngiotsün chhiji, naiuso ngüso amei liko tsümeikü iula.

²⁵Asam paosiposo Ijip ainou shikhutsün ajekhaiu ainou lonyiteng shisaokü, Ngü jü tsamkiso, e-pohoi nouso asam dongai hongdekü noin.

²⁶Lüko tsakühtso tsü-anglu, naiuso mongtsükiu. Nungliko asam paosiposo chiai asam tekkü mongkong naiuso akhengshi iula.

²⁷“Nungtiphe Yerimia, ni nung ngio nouso jü khaiuniaso tü chite-e, lüko ngüsoüh ni tü tsü-ang-e, ni ngüso tü jone, lüko ngüsoüh tsüthala-e.

²⁸Ngüso meleüh Ngo APAOU, ngüso Goa, tü tsü-ang, tsüdekünai ngüso angja eptsün ko tsüngelou ta ni ngüso hau chite-e. Amongkiutsün mowaniu; loto nung thaiutha lüko tsüchiteshi.

²⁹“Yirusalem hai, asam lümongsaiu; asam khaiu lü-iuwan, naiuso nung lüyakkan. Kingkhaiu nouso ai amongsaiu jih tsak lühang, tiautenai Ngo, APAOU nou mongmatkü noin, naiuso jü khaiunia tsüloukü yakkaniu.

³⁰“Tiautenai Yihudahaiüh jükhako tsümeikü chhin. Ngü chinyantsün ngüso sotsom nouso ngüsoüh Jü tsamai taiuküta nung lochinyanan.

³¹Ngüso melothso naiuso menyiu- thso so in nai aloat chaithio kiuau ngüsoüh Hinom Tsamei nai Topheth ta jonkü amthang tsak shan. Nung chhiau Ngü ngüso tü tsüthoilut, nung jü mongyang ai ashi lüko tsüshi.

³²Nungtiphe nung athang nou tü Topheth tsüdekünai Hinom Tsamei ta tsüjonshiau atao nou shi-e; lüko Achaoattsün Tsamei ta jone. Ngüsoüh khaiuniahoi nouso nungko khanane, tiautenai ngüso khanau athang tsünoishi-e.

³³Naiuso nung khaiuniahoi mea nouso koi-waio naiuso goumchi thainian thaiutha eheshiu au noi-e, naiuso tiühtso ngüso tsülekkat-i-e.

³⁴Nungaih Ngü Yihuda noknio nouso ai, naiuso Yirusalem yamkheng nouso ainou anyaitsün naiuso amonglingtsün sangh, ajonloutsün naiuso akiha au khutsün sangh laolouwan-i-e; tiaute- nai goh nouso wailiangkü iula-e.