Read Khiamniungan Naga Yeremia 8 Bible Online

Yeremia 8 - Khiamniungan Naga bible

Yeremia 8

¹“Nung taoko Yihuda hai nokpao naiuso asonghoi, meson nouso, e-po nouso, naiuso Yirusalem nai kihtsün amao khaiunia nouso uo ngüso etam khan ainou lousane.

²Naiuso nungso aje, alei, naiuso maou nai kianthsüo chikü khako sukpenge, tiautenai ngüsoüh nungso tü tsüojin, yathsüo, hoilut, naiuso yamkü noiküla, naiuso loüh amkham: nungso tsü-amkhamshi-e, tsüdekünai tsükhane, lüko goh chiai beisikin iulakü wanane.

³Naiuso Ngü pengpun-itsün athang nouso chikü nai, nung mele tsümeikün apoitaiutsün chikü nou aah noukoto ean nou bao cholo-e, ta Ngo APAOU Akongteng nou ngioji.”

⁴APAOU nou apa khaiuniaso hau chiteau ngo tü ngiom, “Khaiunia tsak khia-an nai, apa tsütenchushiji süne? Tsaküh yam phiowan nai, apa müjam laokü tsüshi shiji süne?

⁵Nungaito, jü khaiuniaso, tiauta jü dongai tsülaoshikü phoklekü khuwanji? Sotsom nouso tü asamüh mongkü helouwan nou shioko asam jü dongai laokü shiau nanji.

⁶Ngü tsüokü anglu lüko ngüsoüh ngiotsüo nou tsüchite. Khaiunia sauühtso meshen tsümeikün thaiutha kiakü tsüyang; khaiunia tsakühtso ‘ngo ti aphio chhisiyakü noin?’ ta tsüsangh. Mokthso tsak ehli thang nai kopkü khuthiowantsün khekkü, khaiunia pungkü nou meshen yamai phokle-anji.

⁷Khiamwaio thaio nou apa ti taoko laokü shi-e nung ngeji. Lüko jü khaiuniasoüh Ngü shingtsün nokshing ngiokhem nouso tsüngeji.

⁸Sam mongthat mongsai noin, naiuso APAOU Ngiokhem samko noin ta asamüh titi ngioji? Athaplu, ngiotsüo tsüdekün ngiokhem tsan- detsünsoüh ngiokhem nouso li-eankü noin.

⁹Mongthat mongsai taiutsün khaiunia amiam nai noin, ngüso ngalakü naiuso lekkatkü noin. Ngüsoüh jüngio nouso le-aniu, ngüsoüh lo mongthat mongsai ti in taim?

¹⁰Nungtiphe ngü ngüso eiuthang ngüso shiolouwantsünso hau naiuso ngüso tsammongnyiuso amaohai hau kiuwane. Tiautenai asong si ehen khaiunia pungkü nou atsüotsüdekünai chaisiou yamji. E-pohoi si mesonhoi nousoüh lüko khaiuniahoi nouso kausaiatji.

¹¹Jü khaiuniaso muo nung khunyanli ngüsoüh lohekkü yangji. Amei to tsümeikün nung ngüsoüh ‘Mei-e, Mei-e,’ ta ngioji.

¹²Jü khaiuniaso, asam nung achinyan chhisiya nouso chhi nou shioko miamlümo? Tsüde, asam titso amiam tsünoiküla, tsüdekünai amiam ji-anlouau lüko tsüngelaküla! Nungtiphe tilai Ngü asam hau angja kiu-e, asam lüko amao haili loiane, naiuso asam thaiutha nung athon noi-e, ta Ngo, APAOU nou ngiowaniu.

¹³“Khaiunia tsaküh apa be-eiuyamkamtsünli; jü khaiuniaso lokamau aiuküla; lüko ngüso sainaoshep tsü-eiukün auo tsak, naiuso latshep tsü-eiukün paisha wonankü noitsün tsak khekkü noiküla. Nungtiphe Ngo nung gohthang amaohai hau louwan-iau ayamhanan.”

¹⁴“Losaokü sam tiauta mokkü noian?” ta Goa khaiunia nousoüh sangh. “Ashi samüh kokjeikü taiutsün noknio nouso ai khuküta nungko e-anko. APAOU sam Goaüh sam e-anau le-aniu; apaüh sam hau shiu-iau she nou kiu, tiautenai samüh apa thako angei sunlou.

¹⁵Samüh aalo naiuso alomei au atao tsak thaiutha yangküla, lüko ti amei tsüshi; nunglikoto alekkatau bao shin.

¹⁶Sam ehoiso Dan noknio nai noin; tititenai samüh ngüso mokthsoso ngaotsün luji. Ngüso mokthsoso shimkü shinai goh athum ngaongao. Sam gohthang naiuso nungko noitsün alum, sam noknio naiuso nungko kihtsün khaiuniahoi chikü lotheanau sam ehso shikü noin.”

¹⁷APAOU nou ngioji, “Jiokü lünoi!” Ngü asam ongko athaluau tsüshiokün she suntsün pao nouso honge, naiuso ngüsoüh asam tü jei-e.”

¹⁸Jü mongsaiutsün alomeiau tsüshio; Ngo mongai akia noin.

¹⁹Anglu! “APAOU nou Zion nai tsünoishi süne? Zion nokpao nungko tsünoishi süne?” ta goh thapekkü jü khaiuniasoüh wetsün ngü lulaji. APAOU, ngüso nokpaoüh thalakü ngioji, “Asamüh asapat gohmao goa nouso khako kauthiotsün, naiuso asam ün sotsom nouso amtsün tsangkü ngo tiauta mongmat-iji?”

²⁰Khaiuniahoi nou wekü ngiom, “Ahsaiu nou yananiu, be-eiuyam nou shilükhunaniu, lüko samto mokipsankü noian.”

²¹Jü khaiunia tawai nou shioko jümong tawaikü noin; ngo mongsaiuji, ngo thsüokü lekkatkü noin.

²²Gilead nai alomei au moushe tsünoiso? Nungko moushe ngepo tsünoiso? Nungaito tiauta jü khaiuniaso tsümeila?