Read Khiamniungan Naga Yeremia 9 Bible Online

Yeremia 9 - Khiamniungan Naga bible

Yeremia 9

¹Jü khaiu nung temkhao tsak tünto, naiuso jü niovei nung niochekhiam chettsün haiungan tsak tünto, jü khaiuniaso loatantsün thaiutha ngo asoh si anyi shapkü noi-elüsao!

²Ngo noianau liutsa nai athang tsak noitünto, jü khaiuniaso ainou pungekü noiau shio-ela ta ngo yangji; tiautenai ngüso chikü ajisiwop chhitsünso, akausai hoi asong tsak noin.

³Yaang chiteau ngüso asaita khemkü noin; nung goumchi ngiotsüo nou shingau nou liko saitha tsüdekü nou nok-shingji. “Jü khaiuniasoüh tsümeikü ainou loüh tsümeikü chhiji, naiuso Ngo ngüso Goa tü tsüngesanji” ta APAOU nou ngioji.

⁴Khaiunia pungkü meshen hai thaiutha lütsüolou, naiuso sauüh meshen deisinioso da amonglam taiuau tsüshioji; tiautenai deisinio pungkü nou Yakobühli khematji, naiuso khaiunia pungkü nou meshen paiusihai lotsaoji.

⁵Ngüso apemüh ngüso paiusihai tsüthakünai niaji, naiuso ngiotsüo sauüh tsüngioji; ngüsoüh meshen lei hau yaang chite-iji; küta ngüsoüh angei sunhedekü noiji. Ngüsoüh alothe chhi tsak thanko alothe chhi tsak chhiji, naiuso akhemat chhi tsak ta chhi tsak hoilutji. Apa khaiuniasoüh apa tsülou ta APAOU nou ngioji.

⁷Nungshioko Akongteng APAOU nou ngioji, “Ngü jü khaiuniaso tü son khekkü chioshiküta thelu-e, tiautenai jü khaiuniasoüh tsümeikü chhi-iu ngü loüh ngüso tü ti chhi shiau shio-e?

⁸Ngüso leikhaiu uokopchon atsaoteng nouso khekkü noin; nungüh asaita yaang chiteji. Khaiunia pungkü nou meshen phaosipoko nyaothingkü chiteji, lüko mongaito apa thalouau jin nou jin taim.

⁹Nung chhisiya nouso thaiutha Ngü ngüso hau angja tsükiu-e süne? Nungtin mele tsak khako Ngü phao tsüsane süne? ta Ngo, APAOU nou ngioji.”

¹⁰“King nouso thaiutha ngü mongsaiu-e, naiuso thsanyan nouso thaiutha shappe, tiautenai khaiunia tsaktso nungh thsatkü keiau tsüshiokü nungso wailiangkü iula-iu. Loto jangtsohoi sang ngem tsülushi; waio naiuso liuthainian nouso khulükhunan khemiu.”

¹¹“Ngü Yirusalem lonyomkü wane, nung chio nouso kihtsün athang tsak iula-i-e,” ta APAOU nou ngioji.

¹²Ngo sang, “APAOU, khaiunia tsaktso nung thsatkü khuau tsüshiokün nung gohthang tiauta singtso goh tsakli wailiangkü le-an? Nung ngelaau mongthat mongsai suntsün khaiunia nou sau noin? Naiuso apaüh nung ngela-iau sau tü chitekü noin?”

¹³APAOU nou thalakü ngiom, “Tiautenai ngüsoüh jü ngiokhem sübao ngüso khako taiukiu nung tsükankeikü le-anphe nung thawao- kü noin. Ngü ngüso tü ngiotsün tsü-ang naiuso tsüchhi.

¹⁴Nungliko mongkong sübao paosipohaiüh ngüso hau tsande naiuso Baal sotsom tü ngüsoüh amkham.

¹⁵Nungtiphe ngo, Akongteng APAOU Israel Goa nou ti chhi-e nungtü anglu: Ngü jü khaiuniaso hau he-iau akhosak paisam nouso naiuso ashiu au sheh nou kiu-e.

¹⁶Ngüso tsüdekünai ngüso paosiposoüh tilaitso tsülukün mele nouso ongai ngüso pengpun-i-e, naiuso ngüso mothamokün lektso ngü ngüso thako süpaihoi honge.”

¹⁷Akongteng APAOU nou ngiom, “Ti thawaoji nung thaiutha lüyanglu! Amongsaiutsünso naiuso apunge jih hangtsün menyiuhoi nouso ashita lüjon.”

¹⁸Khaiuniahoi nousoüh ngiom, “Sam niovei niochekhiam nou meankü naiuso sam niokou nioche nou thapenkü mosungkün lektso ngüsoüh sam thaiutha amongsaiu jihang liukü ahang ta lüngio.”

¹⁹“Sam lotheaniu! Sam thumkü miammatiu! Samüh sam gohthang le-anau noin, tiautenai ngüsoüh sam kithang nouso lotheankiu,” ta Zion nai shaptsün sang tü anglu.

²⁰Ngo ngiom, “Asam menyiu nouso APAOU tü anglu, naiuso apa ngio nouso tü mong lükiu. Asam menyiuthsoso tü amongsaiu au, naiuso paiusihai tü amongsaiu jih hangau lütsande.

²¹Methsohoi nouso sonkeng nai naiuso pühehoi nouso chaikamthang nai chaothiowanau, E-antsün sam koukhanthso nai sungküta nung sam nokpao tsamai napkü noin.

²²Sauüh tsükamloukü taiuwantsün chonglampai, be-eiuyamtsünsoüh hehongkü le-antsünli naiuso sonkeng nai beisikin kamsankü taiuwantsün khekkü, E-mea nouso alumai sukpengkü noin ta ngioau ngü tü APAOU nou ngiom.”

²³“Mongthat mongsai naptsün khaiunia nou meshen ange nai labülom, tsüdekünai oukong khaiunia nou meshen oukong nai lakoi, naiuso memei khaiunia nou meshen jengtsaiu nai labülom ta APAOU nou ngioji.

²⁴Lüko khaiunia ajantso bülomau aiu nai, apaüh Ngo ngelatsün naiuso ngetsün nai lübülom, tiautenai jü onthso asai noiji, naiuso Ngü asio si ayamtha nou chhiji. Nungsoüh ngo mongtsamiji ta Ngo, APAOU nou ngiowaniu.”

²⁵“Khaiuo letkü iutsün liutsa khaiunia nouso, Ijip hai, Yihuda hai, Edom hai, Ammon hai, naiuso Moab hai tü Ngü angja kiuau atao nou shiji ta APAOU nou ngioji. Nung khaiunia nouso tippankü noin, lüko athalou-e athat ngüsoüh tsükankei. Nung khaiuniahoi naiuso jü khaiunia Israel hai tsakühtso jü athalou-e tsükankei.”