Read Khiamniungan Naga Mongsaiu 1 Bible Online

Mongsaiu 1 - Khiamniungan Naga bible

Mongsaiu 1

¹Yirusalem titi aodangkü noi-an, ataojam khaiunia nou meankü noitsün! Ataojam goumchi nou apa wesankü noitsün, loto apa jihi tsak khekkü noin. Noknio ongko noknio nou sua aküo nai napaniu.

²Asoh chikü apa shapji; apa ondong nouso ai niochekhiam tsangkü saoji. Apa ün paiukeng nouso chikü, loto apa lodangau tsaktso tsünoishi. Apa haiso chikü, apa sapthiokiukü ta loto ngüso chikü, apa thako akhengshi iula-iu.

³Yihuda khaiunia nouso angja omhe, naiuso sua au kankei, ngüso tsam ainou ngüso kankü khuwaniu. Ngüso tengkhaiu ün ta ngio au tsünoi, ahaiulouau yam titso tsünoi, ehoi nou lemjeikü me goumchi ai ngüso kihji.

⁴Loto asio ajekhaiu nousoko Amkham Tsamai sautso tsüshiji. Jih hangtsün menyiuthso nouso omheji, naiuso meson nouso ngetji. Noknio bekhan nouso akeng, naiuso Zion amongsaiu nai noin.

⁵Apa ehsoüh apa shiolouwaniu; eh nousoüh apa ngüso oukong nai thalou. Apa angei piakü noitsün shioko APAOU nou apa omhe-in; nungti apa thsoso thaloukü kankü khuwan.

⁶Yirusalem alengmei apa ainou punge-aniu. Apa aheihoi jinchai nouso anaiu nai outsükongkünli, liuhom hai khako khulükhunau tsüshiokün khekkü noin.

⁷Apa angja omhetsün ajekhaiu nai, Yirusalemüh penai tsüomei oumeitsün apem yangsanji. Apa ehso pha nai napantsün taoko, apa halouau sau tsünoiküla; apa saliantsün tü apa ehoiso nyailut.

⁸Yirusalemüh apa chija athsüoting angei sunhe nou, apa lomsantsün mowan; nungshioko apa tsosa naiuso atheau tsünoikü iula. Apa ngetkü meshen kha amiam nai tsangjei.

⁹Apa tsüyanthsüokün siudekü epan-in, lüko apa aküo thaiutha apaüh ayang titso tsühan. Sauüh apa lotsam kiuau tsüshiokü, apa loiantsün nung thatü thsüokü noiküla. Apa ehsoüh apa shiolouwan, naiuso APAOU tü atsüojinyang thaiutha apaüh weji.

¹⁰Apa ehsoüh apa chaiou jengtsaiu chikü kankü khuwan. APAOU nou melemaohai tsünapikü kiaptsün Amkham Tsam, nai ngüso napkü apaüh ep.

¹¹Ngüsoüh eheshiu yam taoko ngüso nget; Ngüso aa noiau thaiutha ngüsoüh chaiou nouso eheshiu nouko li-elou. “APAOU, ngü tü athap,” “Jü aküothe tü athaplu,” ta noknio nou weji.

¹²Ayanlükhuntsünso pungkü tü apaüh wekü ngioji, “Ngü tü athaplu!” Apa mongmat sungtsün ajekhaiu nouko nai, APAOU nou ngü kia-itsün khekkü sau da kia-ikü tsünoi.

¹³“Apaüh koiyai nou in hong, nungüh jümongkhei ai jek. Apaüh jü thaiutha jin tsak jintaiu, naiuso nungko ngü monan. Nungphiai apaüh ngü le-ankü, akia adang tsüyangkü nai wanan.”

¹⁴“Apaüh jü angei chikü yamchu, naiuso nungso apem keshiküta, apaüh jüsang lemkü kelut, nung tsangkü ngü outsükongkü iula. APAOU nou ngü jü ehso hau kiuwan, nungtiphe ngü tsaau tsüshio.”

¹⁵“APAOU nou jü akong süpaihoi tü lochikü nyailut; jü oumhoiso ngamthiowanau Apaüh süpaihoi tsak hong. Sainaoshep noipektsün khekkü, Apaüh jü khaiuniaso noinyoman.”

¹⁶“Nungshioko jü niovei niochekhiam nou meankü ngü shap. Ngü mongtsamiau naiuso lomongsongkiuau sauüh tsüshioji. Jü khaiuniasoüh titso tsüpoishi, tiautenai eh nousoüh ngü shiolouwaniu.”

¹⁷“Jü pha chinphu lüko, sauüh tsühalou. APAOU nou ngü lemkü noitsün ehoi joniu; Naiuso ngüsoüh ngü tü achinyan jengtsaiuli kankeiji.”

¹⁸“Lüko APAOU asio noin, tiautenai ngü apa ngio tsü-angkü chhianiu. Khaiunia pungkü nou ngü tü a-anglu; ngü angjatsün tü athap. Jü pühe mesohoi thaloukü khuwaniu.”

¹⁹“Ngü mei-etsünso tü jon, lüko ngüsoüh ngü halouau tsümongchio. Mesonhoi naiuso ahei nouso ngüso thaiutha, chihsikhiam yamkü tsakei taoko noknio yamkheng nousoko mowan.”

²⁰“Jü onthso amongkia mongsaiu nai, noitsün tü athap, O APAOU! Jü angei nouso thaiutha jümongpem thsüokü alothe nai noin. Sonkeng nousoko naiuso tsammongai aloat naiuso a-e nou noin.”

²¹“Jümong ngettsün tü anglu; nungko ngü aalou-iau sautso tsünoi. Ni jükhako aküothe kankü shikiutsün nou, jü ehso monglingji. Ni thaloutsün ajekhaiu nou kankü shiküta, jü ehso ngü omhetsün khekkü nai anoi-i.”

²²“Ngüso meshen angei chhi thaiutha aphio nai anoi-i; Jü angei thaiutha angja kiutsünli ngüso angja lükiu. Tiautenai ngü angja nai ngetji, naiuso jü mongpemai akia noin.”