Read Khiamniungan Naga Mongsaiu 2 Bible Online

Mongsaiu 2 - Khiamniungan Naga bible

Mongsaiu 2

¹APAOU mongmat sungnai anyakhem nou Zion pokjei. Nung alengmei atsokting Apaüh nyomani-iu. Apa mongmat sungtsün taoko nai, meshen Amkham Tsam lüko le-an.

²Yihuda nai nok apem atsüojinyang tsühakü Apaüh lothe-an, naiuso nung gohthang hüjeitsün pe nouso nyomani. Nokshinghoi khako Apaüh amiam kankü shin.

³Apa amongmat nou Israel oukong somani. Ehoi shi taoko apaüh sam halouau nan. Apa sam thako inli sungkü alum lotheaniu.

⁴Ehoi tsakühli apaüh sam tü uokopchon nousoüh watthat that; sam koitsün naiuso mongchiotsünso apem apaüh loatkü wan. Apa mongmattsün apem samüh Yirusalem nai tsangsheiji.

⁵Eh tsak khekkü, APAOU nou Israel lothe-an; apaüh nokpao tsam naiuso pe nouso lothekü wanan. Yihudahai chiai Apaüh athontsüyangkün amongkia kankü shikiu.

⁶Tiko samüh Apa amkhamkü noiküla, nungh amkham tsam Apaüh lothekü wan. Apaüh asio ajekhaiu naiuso chinyatnyi nouso lolaowaniu. Nokpao naiuso mesonhoi nousoüh Apa mongmat sungtsün ngesan.

⁷APAOU nou Apa ün amthang wanan, naiuso Apa asio Amkham Tsam le-an; nung lungpe nouso lothean-iau apaüh ehoi hau ayam sopkiu. Samüh monglingkü amkhamtsün liko, eh nousoüh ashioloutsün sangh asong nou wekü noiküla.

⁸Zion lungpe lothean au APAOU thatloukü noiküla. Apaüh nungso thumkü lothean au thatlouwaniu. Loto ehüpuo naiuso lungpe nouso aikü alothe nai noin.

⁹Bekhan nouso beisikin au iula, naiuso koukhop nouso nelangkü thiopekkan. Nokpao naiuso asonghoi nouso akhothiotsün nai noin. Loto Ngiokhem nouso tsütsandeshi, naiuso A-Eptsünsoüh APAOU ainou khapiam ngio tsüepshi.

¹⁰Yirusalem petche nousoüh pem naiuso khaiu nai pu lolutkü, nethe nousoüh loijeikü goh ai nyankü moknoi-an. Naiuso mesohoi nousoüh amiam nou ngüso kha thaothiokü noin.

¹¹Ashappe noi nou jü niovei kiakü jümong lothe-iu. Jü khaiuniaso mowanitsün amongkia nou ngü tü jei-aniu. Methsohoi si nionyaothso nouso noknio sonkeng nai aiula-ankü noin.

¹²Anaiusile nou ngüsoüh meshen nyiuso tü wekü, ngüso atawai haili yamkheng nai loi-anji, ngüso nyiu phamongko yamlukü ngüso eanji.

¹³O Yirusalem, atsüojintsün Yirusalem, athaiutha ngü ti ngioau shio-e? Ngü ni titi lodangau shio-e? Tiautenai nung khekküto sau omhekü moshi! Ni nou aküothe khiamnok loyangau tsüshiotsünli noin. Nung sauüh lomei-e?

¹⁴Ni nou E-po nousoüh ni hau yaang ngio, nou tü simkü amao ti chite au tsünoi; ngüsoüh chimtsün nou ni ün angei tsüpheksankün tsangkü ni kausaiat-iu. Ngüsoüh ni mong phokle au pohkü noin ta tsüyange.

¹⁵Nung noknio yankü tsakeitsün khaiuniahoi nousoüh ni tü thapküta lochilotsaoji. Yirusalem lotheantsün tü thapkü, ngüsoüh ngüso khaiu satkü nyaikiuji. “Aleng amei noknio nou nung so? nung goumchi apem monglingitsün noknio ta jontsün ni so?”

¹⁶A-ehso chikü nou ni lochilotsao naiuso, ni tü thsüokü chinyankü thapji. “Nung samüh lothekü noin! Samüh nung ajekhaiu tü taiukü noiküla!” ta ngüsoüh khaiu monkü lotsao.

¹⁷Apaüh sam lohatkü lotsüotsünli APAOU nou aphiteng nai chhin: atsüojinyang tsülepkü apaüh sam lomowaniu. Apaüh sam ehso hau ashioloutsün kium, Apaüh sam ehso sam loiantsün tü monglingi.

¹⁸O Yirusalem, alungpe nouso hau sangh songkü lüwelut-i! Aniochekhiam asoh si anyi haiuli tsangkü lüsao-i. Asam mongkiakü shaptsün ko tanatkü lü-iula!

¹⁹Asoh chikü APAOU tü welutau loüh loüh ta lüchu; athsoso thako atsüojinyang hanau thaiutha, amongpem sopkü apa tü lüsao. Methsohoi naiusile nou yamkuk pungkü nai eanji!

²⁰Athaplu O APAOU, Ni omhe-itsünso tü athap! Menyiu nousoüh ngüsoüh tsüojintsün thsoso nyih heji! Mesonhoi si E-pohoi nouso Amkham Tsam mongko loatkü noin!

²¹Yamkheng nousoko petche si methsohoi eankü noin, Pühe meso nouso ehoi salaiu nou loat. Ngüso ni mongmattsün ajekhaiu ko, atsüojinyang tsüsunkü chaoat.

²²Ahat asongting, ahe-anau jü ehoi ni ngü lemkü jonkam, Naiuso ni mongmattsün ajekhaiu nouko nai, khaiunia tsaktso thakhuao tsüshio. Ngüsoüh ngü tsüojinkü naiuso paotsangkü thashetsünso jü thsoso chaoatkü wan.