Read Khiamniungan Naga Mongsaiu 3 Bible Online

Mongsaiu 3 - Khiamniungan Naga bible

Mongsaiu 3

¹Goa tsangkü angja-itsün nung ti thaiutha noin, ta ngetsün ngü tsak noin.

²Apaüh ngü anyakhem akheiting ai napi.

³Naiuso ngü tü loüh loüh ta atsüojinyang tsühakü shiuhkei.

⁴Apaüh jünyih naiuso jükhun chiankü wan, naiuso jü uo nouso longekkü wan.

⁵Apaüh ngü angja omhe akhotsam nai kiapkü wan.

⁶Eküta atao laiukü taiuwantsün khekkü, apaüh ngü anyakhem nai noi-i.

⁷Apaüh ngü sonkhiang nou kekü wan; athakhuau ayang tsünoikün akhothiotsün ngü tsak noin.

⁸Ngü ahalou-iau thaiutha sangh asong nou we, lüko Goa nou ngü tü anglu au nan.

⁹Ngü hatatkü tsakei, ngü tsakeitsün pungkü nai lungpe nou jüyam kiapjei.

¹⁰Shap khekkü apaüh ngü tü thaiuküla, naiuso chongkhao tsaküh jiotaiutsünli apa jü khako noili.

¹¹Apaüh ngü yamkheng ainou komshi-an, küta ngü nelangkü chipekkü le-an.

¹²Apaüh meshen uokop pai kenküta ngü apa thsamthopao the.

¹³Apa uokopchonüh ngü da aokü kopthio.

¹⁴Ajekhaiu thathonkü khaiuniahoi nousoüh ngü tü nyailutji; ngüso thaiutha ngü alonyai au tsak iula-iu.

¹⁵Apaüh asaita ngü heshiu au akhosak angja omhe nou kium.

¹⁶Apaüh jü kha puchet nou tsomjeikiu, naiuso jühou lung nou lothekiu.

¹⁷Ameilei aalou naiuso amongling nouso ngü pe-aniu.

¹⁸Naiuso ngü ngiom, “APAOU ainou jü oukong naiuso ayangtaiu mowaniu.

¹⁹Jü mongkhei kia naiuso omhe nou, nung akhosak sheh tsakli noin.

²⁰Ngü nung peanau tsüshiokü yangji, naiuso nungüh jü onthso mongkiaji.

²¹Külüko ngü tilai nung tsak nou yangshiji, ayangtaiu nou laokü shiji:

²²APAOU ün akeng tsü-iulatsün atsüojin, naiuso atsüojinyang asaita noiji.

²³Nungto ahom pungkü ayanlu, naiuso ajepek amei khekkü.

²⁴Ngü taiutsün apem nouko apem nung APAOU nou noin, nungtiphe jü ayangtaiu ngü apa da taiuji.

²⁵APAOU to apa da amonglam taiutsünso pungkü khako amei noin.

²⁶Nungtiphe apa tü mongau laiukü taiutsün nung sam thaiutha ameiting noin- apa tü taiutsün nung sam kipsanau-

²⁷Naiuso nung ajeilou nou sam oum taoko ngelouau ameiting noin.

²⁸Tilai sam tü omhe thawaoji, sam tsüsingiokü jeiloukü pemsatso noiau noin.

²⁹Sam apa khako kaukü napela, nungti naito sam thaiutha ayang noishikütso tha-e.

³⁰Woikü naiuso lochilotsao lüko, samüh nungso chikü waolou-ela.

³¹APAOU to atsüojinyang noin, naiuso apaüh sam asaita hau to tsüle-ane.

³²Apaüh sam hau angja kiuao shiom, lüko apa atsüojin asong nou sam thaiutha asaita noin.

³³Apaüh yaangto angja naiuso amongkia-iau tsükiuji.

³⁴Tilai sam onthso akhotsün nai noianji, APAOU nou ngeji.

³⁵Tilai apaüh sam hau kiutsün atha nou tsüwesanji nung apaüh ngeji.

³⁶Mikhem noikham nai ngiotsüo nou phokle-an nai apaüh ngeji.

³⁷Asaita APAOU mongchiotsün noulu kankü khuji.

³⁸Apa athoilut nouko amei si tsümei nemtso haji.

³⁹Tilai sam angei thaiutha sam angja-e, nungaih sam tiauta namname?

⁴⁰Samüh sam tsakeitsün nouso tü yamko küta APAOU dongai phokleko.

⁴¹Samüh aün nai noitsün Goa tü, sam mong sopko küta misao saoko.”

⁴²“O APAOU samüh ni tü khengshikü angei sunhe, naiuso ni sam hau angei tsüwankiu.”

⁴³“Ni sam tü komkei naiuso sam loat; ni nou atsüojinyang ni mongmat nou sojei.

⁴⁴Amongthe thengmia ateitham tsaküh sojeiphe, sam misaoüh nung thsatau tsüshio.

⁴⁵Goumchi ün chünyup naiuso beisikin au sam iula-i.”

⁴⁶“Sam ehso chikü nou lochi lonyaikü kankei.

⁴⁷Sam aküothe naiuso alothean nai, naiuso angja ahat nai noiji.

⁴⁸Jü khaiuniaso mowantsün thaiuthako, jü niovei ai niochekhiam nou haiuli tsangji”

⁴⁹“APAOU nou aün ainou thapikü sam moepkün lektso,

⁵⁰Jü niochekhiam haiu tsakli tsülaokü tsange.

⁵¹Noknio nai noitsün menyiuhoi nouso tü thawaotsün epnai, jümongpem kiakü noiküla.”

⁵²“Ngü tü chinyanao ti mi tsünoikün nung, jü ehsoüh ngü waiotso tsak khekkü kholouwan.

⁵³Ngüsoüh ngü khan tsakko aa yakthiowan, küta khan nou lung tsaküh kapjeikü wan.

⁵⁴Khiam nou ngü limlowanau yalou, nungaih ngü ean au atao shisao-iu ta yang.”

⁵⁵“Khanthanting ainou ngü ni tü jonji APAOU,

⁵⁶Naiuso ngü tilai ni tü jüsangh tü anglu au koja, nungaih ni lulakü noiküla.

⁵⁷Ni ngü tü thalakü ngiom, hatkü lanoi.”

⁵⁸“Ngü halouau ni shin APAOU, küta jü aa nou kipsan.

⁵⁹Ngü tü khengshikü aphio chhitsün ni ngeji, nungtiphe ngü haloukü nai mi lükhem.

⁶⁰Jü ehsoüh ngü titi chinyanji, naiuso ngüsoüh jü thako titi tsümeikün mongthat thatji ni nungh ngeji.”

⁶¹“O APAOU, ngüsoüh ngü lochitsün ni lula-iu, ngüso mongthat tsümeikün apem ni ngeji.

⁶²Ajekhaiu thathonkü ngüso jü thaiutha chiteji, naiuso ngüsoüh tsümeikü chhiau mongthat thatji.

⁶³Ahom ainou asoh tü thalutkü ngüsoüh ngü lochiji.”

⁶⁴“O APAOU, ngüso chhi thaiutha ngüso hau angja lükiu;

⁶⁵Ngüso athesan küta ngüso hatatkü lü-iula!

⁶⁶Ngüso homat küta goumchi ainou ngüso moisemkü lüwanan!”