Read Khiamniungan Naga Mongsaiu 4 Bible Online

Mongsaiu 4 - Khiamniungan Naga bible

Mongsaiu 4

¹Sam chaiou tülinglingkü noitsün aleng danganiu; Amkham Tsam ainou lung nouso sonkeng nai yakpengpengkü noin.

²Zion hai pühe nouso sam thaiutha chaiou apiamaili noiküla, lüko loto ngüso awesan tsünoikün pulak ko wekülu kankeiji.

³Chio anyiu nou lüko apa thso hau anyao nou chepikü thashesanji, lüko jü khaiuniaso to Ostrich waio nousoüh ngüso thsoso tü, atsüojinyang tsühantsün khekkü noin.

⁴Ngüso ün nionyaothso nouso anaiusile nou eanji; methsohoi nousoüh eheshiu nou tü saoji, lüko ngüso hau sauühtso tsükiu-e.

⁵Khaiunia sauhaiüh ataojam eheshiu ameiting nou hekü noiküla, ngüso naiusile nou sonkeng nouso ai eanji; alum tsükhemkü nai shejikantsünso chünyup kamshi noitsünko yamhekü noin.

⁶Jü khaiuniaso hau Sodom nai noitsünso tü simkü angja kiu. Goa khako amowantsün alekta thawaotsünli angja kiu.

⁷Sam nokpao nouso nyinli sangkü, naiuso alochinyan tsühakü pem thaiutha oukong noitsün jangnyaoli noiküla.

⁸Loto ngüso khakheng inthioli nyachingkü nou ngüso sonkeng nouso ai tsüngeshi; ngüso khun nung paili waikü ngüso uo nousotü leplutkü noin.

⁹Anaiusile nou wonlakü aa noi au eheshiu tsütaiukü eantsünko naito, ehli taoko loatkü eantsün chentso.

¹⁰Jü khaiunia tü aküothe shithawaotsün nou alekkat kankü shin; tiautenai atsüojin nyiu nousoüh ngüso thsoso metkü heshiuji.

¹¹APAOU nou apa athsüoting amongmat sung-iu; küta apaüh Zion nai in jeklutkü gohthang saokü jekthiowan.

¹²Yirusalem bekhan nai akomhe-anau naiuso ehoi nape ta mele nouso tsüdekünai nokpaohoi nouso sauüh tsümonglam.

¹³Lüko nung apa e-po nouso angei, naiuso nung aphio tsünoikün khaiuniahoi eantsün, apa mesonso aphio shioko thawaokü noiküla.

¹⁴Apa aheihoi she nou lepkü sonkeng nai niopek haili, tsakeitsün shioko ngüso tü sauüh thantanau tsüshio.

¹⁵Khaiuniahoi nousoüh ngüso tü wekü ngiom, “Lükhuwan!” “Asam lochinyankü noin! Ngü tü lathantan!” Nungtiphe sauüh ngüso monglingkü tsünialoukü, naiuso mele tsak ainou mele tsak aita atsakeitsün tsak iula.

¹⁶APAOU nou ngüso thaiutha amongkiutsün tsünoishi; apaüh ngüso pengpun-i. Apaüh sam meson naiuso ahei nouso hau awesan ti tsühan.

¹⁷Sam nioaukiakü samüh yaang ahalou thaiutha taiuwelat. Ahalou kiuau ti tsünoikün mele tsak ainou tübao sam taiuwelatkü noikü shi-iu.

¹⁸Sam sonkeng nai lüko tsakei au tsüshio, tiautenai ehoi nousoüh sam tü jiokü noiküla. Sam ajekhaiu nouso yanlükhunankü athon nou shi-aniu.

¹⁹Maou ainou letche tsak khaolaokü phengkü naptsünli, ngüsoüh sam tü kum. Ngüsoüh sam king nouso ainou kumi-an, küta sam liutsa nai thalouwan.

²⁰APAOU nou tsomkiukü chosantsün nokpao sam aa sübaoüh sam kipsane ta monglamküla nung ngüsoüh thalouwan.

²¹Edom naiuso Uz khaiuniaso nyailutkü lünoi; ni shio naito lümonglingat. Tiautenai asam dongaiüh aküothe nou shiji; asam lüko lekkatkü amiam nai tsosa noi-e.

²²Zionüh apa angei mai thamaniu; Loto APAOU nou sam akhothio nai tsütaiushi-e. Lüko Edom, APAOU nou ni hau angja kiu-e, apaüh ni nou aphio chhi nouso achiai sungi-e.