Read Khiamniungan Naga Ezekiel 1 Bible Online

Ezekiel 1 - Khiamniungan Naga bible

Ezekiel 1

¹Pon aosam alei püle ajekhaiu pungonyi nouko nai, ngo Buzi thso meson Ezekiel, Kebar Haiu shimkü Babilon nai Yihuda hai akhothiotsünso ko hakü noi taoko aün sopsat, naiuso ngo nungko Goa atsangshei ep.

²(Nung Nokpao Jehoiakim akhothiotsün nai kanlükhun küta pon pungo nouko noiküla.)

³Babilon hai goumchi nai Kebar Haiu shimkü, APAOU nou chitetsün taoko, ngo apa oukong ngesankü noiküla.

⁴Ngo thapsankü lunai, ajenapki ainou ah-ou-ahsheih tsak shitsün ep. Nungko thengmia ateitham tsak ainou ahsalap naiuso nung lemkü ajin oukü, naiuso nung awem nouko daoson lung outsün khekkü ajin khakü noiküla.

⁵Nung ah-ou- ahsheih awemting nouko khaiunia sotsomli ngo aa noitsün thainian püle khekkü ep,

⁶naiuso nung püle nouso tü kha pülele naiuso akoi püle pokü noiküla.

⁷Nung hok nouso lukü, naiuso athsanjung nouso jangtso- pong thsanjung khekkü, naiuso nungso thashiakü jektsün daoson outsün khekkü noiküla.

⁸Naiuso ngüso kha püle naiuso akoi püle nouso pungkü tü khaiunia pha pülele nung akoi pungkü khemai tsaktsak pokü.

⁹Thainian pungkü akoi nouso athon athon nai jei-ekü, tilai ngüso tsakeiji, ngüso pem tsüsameshikü hoi tsak haulu thekü saitha khaai khu.

¹⁰Nung thainian pungkü tü athapao khaai khaiunia niosingan, uai nai chongkhao tsak niosingan, tsatai nai jangtsopong niosingan naiuso phiai nai letche niosingan pokü noiküla.

¹¹Nung thainian pungkü akoi nime khongpengkü nungthan akoi nime nou ngüso pem tü saplutkü noiküla.

¹²Thainian pungkü kha ayam püle ai sheikü, nungti ngüso ahoi nou tilai khuau mongchioji nungai khu, ngüso khutsün ko ngüsoüh tsüphokle.

¹³Nung thainian nouso ongko asaita akhu ashi ta lemlemkü noitsün athapau tsonthip outsün tsak khekkü tsotsak noiküla. Nung in nou okü jeekü noiküla, naiuso nung in ainou ahshalap tsak sung.

¹⁴Nung thainian nouso awon khaolaokü tsakei.

¹⁵Naiuso ngo nung thainian püle nouso tü thapkü noinai, nung thainian nouso ahok püle nou goh nou tü thankü tsak si tsak shimkü tsakü ngo ep.

¹⁶Nung ahok püle nouso athappao aleng tsaklu; nungso tsaktsak pungkü nou chaiou lung tsak khekkü jeekü noiküla, naiuso nung pungkü ta amao hok sübao nou uai sheikü jippekü,

¹⁷nungti nung ahok nouso ano püle nouso ai khuau shioküla.

¹⁸Nung tsamkei hok athun nouso aniovei nou miankü puo.

¹⁹Tilai nung thainian nouso tsakei-e, nungaih nung tsamkeihok nousoüh hakü lemlem, naiuso titaoko nung thainian nouso goh ainou loksan, nungti tsamkeihok nouso lüko loksan.

²⁰Thainian nousoüh mong- chiotsün nai khunai, nung tsamkei- hoi nouso thainian nouso oukong nai noiküla.

²¹Nungti atao pungkü tilai nung thainian nouso tsakei-e tsüdekünai lao-e, tsüdekünai koiai sunge, nung tsamkei hok nouso lüko nung khekkülu tongtü chhin.

²²Nung thainian nouso khütha nai athapao nyin lung leng khekkü asangling noiküla.

²³Nung athang nouko thainian nouso tsakü ngüso shimkü akoi nousoüh nung thainian nime nouta thankü naiuso amao nime nou apem nou khojeikü noiküla.

²⁴Khiamnok khiampek sangngemli, süpaihoi asong tsak ngemtsünli, Apemshiotsün epnai, ngo goh ai kha nou sheikü loian, nungai sangh tsak nou ngü tü chitekü lula. APAOU sang khekkü, ngo ngüso jeitsün sangh ngem lula. Tilai ngüso jeitsün laoji, nungai ngüso ekok lamshi,

²⁵lüko khütha ainou ngüso khaio chiai saotsün sang ngem tsülaokü noiküla.

²⁶Nung khütha nai Safir lung nou shantsün nokpao noikham tsak khekkü tso tsak noiküla, naiuso nung nokpao noikham nouko moknoitsün tsak nou athapau khaiunia shisileng tsak khekkü noiküla.

²⁷Nung sotsom nou innyai awemteng nai daoson khekkü otsün noiküla. Nungüh apemai awon thsüokü kiu.

²⁸Naiuso nung chikü aleng nou thengmiathsan lengli noiküla. Nung awon outsün nou APAOU hatsün hanji.