Read Khiamniungan Naga Ezekiel 10 Bible Online

Ezekiel 10 - Khiamniungan Naga bible

Ezekiel 10

¹Ngo aa thainian nouso khaio nai thapnai, nung khütha nai safir lung nou shantsün nokpao noikham tsak khekkü ep.

²Goa nou ashethop ne tenkü noitsün khaiunia tü ngiom, “Aa thainian khemai tsamkei hok montsün nai lünap, naiuso apha nemthso ainou inkaio nou lülou. Naiuso nung inthio nouso noknio nai lüsokpeng.” Ngo apa khutsün tü jiokü thapkü noi.

³Tilai apa tsammongai nap, aa thainian nouso Amkham Tsam nai ajepekki dongai sheikü tsakü noiküla, naiuso thengmiakhao nou nung tsampai akhei saokü mian.

⁴Naiuso APAOU hatsün ajinka nou aa thainian ainou sungkhu küta Amkham Tsam ai naptsün dongai soikü khu; naiuso tsampai nou awon ajinka ou nou mian.

⁵Aa thainian ekok ngem nung akhei tsampai nai lüko lulakü noiküla. Nung sangh nou Apemshiotsün Goa ün sang ii khekkü noiküla.

⁶Tilai APAOU nou ashethop ne tentsün khaiunia tü, akoi potsün thainian khemai noitsün tsamkeihok jetko nou inkaio intso alou ta thoilut, nung khaiunia nou napküta tsamkei hok tsak dongko tsa.

⁷Akoi potsün thainian ongko tsaküh nung in ngüso ongko noitsün nai apa pha tsatthio, küta inthio ajantso jünsan, naiuso nungh ashethop ne tentsün khaiunia phamongai taiukiu. Nungaih khaiunia nou inthio nou louküta khuwan.

⁸Nungh akoi potsün thainian nouso akoi pungkü khemai athapao khaiunia pha khekkü ngo ep.

⁹Ngo loüh tsamkei hok püle athapao tsaklu, thainian pungkü phiko tsak tsak ep. Nung tsamkei hok nouso chaiou lung khekkü jekü noiküla, naiuso nung pungkü tsamkei hok nou nungso uai nai jippekü noiküla.

¹¹Tilai nung akoi potsün thainian nouso tsakeiji, nungso akiangloshi tsünoikü ti yam thalünou ta khukü noiküla. Akiangloshi tsüyangkü nungso chikü aikülu ngüsoüh mongchiotsün yamai khu.

¹²Ngüso pem, khaiuphi, pha, akoi, naiuso ahok nouso apem niovei nou miankü noiküla.

¹³Nung tsamkei hok nouso ngü aya atsangshei eptsün khekkülu noiküla.

¹⁴Akoi potsün thainian tsak tsak pungkü tü kha pülele pokü noiküla. Chongting kha nou jangtsopong khali, müjam nou tü khaiunia khali, samjam nou tü chongkhao khali, naiuso püle noutü letche khali pokü noiküla.

¹⁵(Nung thainian nouso ngo Kebar Haiu shimkü eptsünlilu noiküla) Tilai nung thainian nouso koiai jeikü sungji,

¹⁶naiuso tsakeiji, nung tsamkei hok nouso ngüso ko khuha. Tilai ngüso jeikü khuau ngüso ekuk nouso khongpeng, nungaiüh tsamkei hok nouso ngüsoko khuha.

¹⁷Tilai nung thainian nouso tsütsakeikü noiane, tsamkei hok nouso lüko tsütsakeikü laowan; naiuso tilai thainian jeiji, tsamkei hok nouso lüko jeiha, tiautenai nung tsamkei hok nouso thainian nouso oukong khemai noiküla.

¹⁸Nungaih APAOU hatsün awon ajinka nou Amkham Tsam nai naptsün bekhan nou wankü khuküta akoi potsün thainian khütha nai noin.

¹⁹Ngo thapkü noinai, nung thainian nousoüh ngüso ekok khongpengkü goh ainou koiai jeikü sungh, naiuso tsamkei hok nouso ngüso ko aikü khu. Ngüso Amkham Tsam tü ajepek nai noitsün bekhan dongko tsa, nungaih APAOU awon ajinka ngüso khüthako noiküla.

²⁰Ngo Kebar Haiu nai Israel Goa khemko epkü shitsün ngüso nung thainianlu noin ta ngo tsangsheisan.

²¹Ngüso apem da kha pülele, ekuk pülele, naiuso nung ekok pungkü khemai athapao khaiunia pha khekkü noiküla.

²²Ngüso kha tü athapnai ngo Kebar Haiu shimkü eptsün tongtü khekkü noiküla. Nung thainian nouso saitha kha ai khuwan.