Read Khiamniungan Naga Ezekiel 11 Bible Online

Ezekiel 11 - Khiamniungan Naga bible

Ezekiel 11

¹APAOU Onthso nou ngü loksan küta Amkham Tsam tü ajepek dongai sheikü noitsün bekhan dongai niakü khu. Nungko bekhan shimkü mele nai aheihoi Azzur thso Jaazania si Benaia thso Peletia ne lüko hakü khaiunia kheikü pungo ngo ep.

²Goa nou ngü tü ngiom, “Khaiunia thso, nung khaiuniahoi nousoüh nung noknio nai ayang tsümeikün naiuso ayamhan tsümeikü kiu.

³Ngüsoüh ngioji, ‘Samüh tsam nouso loüh liukü laloshi-e. Nung noknio nou athenghetsün lak khekkü, naiuso sam nung lak mong nai nyih khekkü, lüko sam nung lak nou in ainou intsoto suojeiji.’

⁴Nungtiphe Oh, Khaiunia thso, ngüso thako khapiam ngio lüchite.”

⁵APAOU Onthso ngü da shikü, Apaüh nung ngiongem khaiuniahoi hau lükiu ta ngiom: “Israel khaiuniaso, asamüh ti ngioji naiuso ti chhiji nung ngo ngeji.

⁶Asamüh nung noknio nouko khaiunia piakü loatiu, naiuso nung mea nou sonkeng nouso mianiu.

⁷“Nungtiphe, Ngo Akhengting APAOU nou asam tü nung ngioji. Atsüoting nung noknio athenghetsün lak khekkü noin, lüko nyih nou ti nyih? Asamüh loattsün mia nouso süne! Asam nungko tsünoi-e ngo asam nung noknio ainou lowane!

⁸Asam sah lon hatji süne? Ngo asam komau sah kantsün khaiuniahoi niakü shi-e.

⁹Ngo asam noknio ainou komanküta gohmao khaiuniahoi phamongai kiuwane. Ngo asam eao kiuwaniu,

¹⁰naiuso asam meshen singkhannio nai ehli taoko loatkü wane. Nungaih khaiuniahoi nou Ngo, APAOU noin ta nge-e.

¹¹Lak nou in ainou nyih sojeitsünli, nung noknio nou asam tsüsojei-e. Israel goumchi ko tiailünou ngo asam hau angja kiu-e.

¹²Asamüh ngo APAOU noin ta nge-e, naiuso asamüh chenpa mele nouso ngiokhem kankeikü noitsün tao, jü ngiokhem nouso lothean naiuso jü athoilut nouso angio-tsüang.”

¹³Tilai ngo khapiam ngio nou ngiom, Benaia thso Pelatia ean. Nungaih ngü tsükha kauthio küta wekü ngiom, “Tsüde, Akhengting APAOU! Ni Israel nai apoitaiutsünso chikü lomowane süne?”

¹⁴APAOU nou ngü tü ngiom,

¹⁵“Khaiunia thso,” apaüh ngiom, “Yirusalem nai noitsün khaiunia nouso athaiutha naiuso Israel hai akhothio nai noinso thaiutha chiteji. Ngüsoüh ngioji, ‘Akhothio nai noinso APAOU tü amkhamao thatü laiukü nai noian, naiuso apaüh sam hao gohthang nou tengkamau kiuwankü noin.’”

¹⁶“Nungtiphe ngo ngiotsün nung meshen khaiunia Israel tü lüngio, mele laiukü nai ngüso hongantsün naiuso amao shingkhannio nouso nai hongpengantsün nung ngo noin, külüko ataojam thaiuthalu ngüso khupengkü noitsün goumchi nouso ai ngo ngüso ko ha-e.”

¹⁷“Nungtiphe Ngo, Akhengting APAOU nou ngiotsün ngüso hau lüchite. Ngo ngüso ti shingkhannio nousoai kompengkü noin, ngüso ngo lokam shi-e, naiuso Israel hai goh ngüso hau laokü kiushi-e.

¹⁸Tilai ngüso laokü shi-e, ngüsoüh achinyan, sotsom nouso ngüsoüh eptsün apem lowanao noin.

¹⁹Ngo ngüso hau mongpem ayan naiuso mong ayan kiu-e. Ngo ngüso ün lungli ajüoche mongpem lowane küta angio angtsün mongpem thiokiu-e.

²⁰Nungaih ngüsoüh jü ngiokhemso, jü athoilut nouso chikü mongkiukü kankei-e. Ngüso loto jü khaiunia iula-e, naiuso ngo ngüso Goa the-e.

²¹Lüko achinyanao lümeikün sotsom nouso tü amkhamtsün khaiuniahoi hau ngo angja kiu-e. Ngüso chhi thaiutha ngo ngüso hau angja kiu-e,” ta Akhengting APAOU nou ngioji.

²²Nungaih akoi potsün thainian nouso ajei-ao tsalounai tsamkei hok nouso ngüso ko khuha. Israel hai Goa hatsün ajinka awon nou ngüso khütha nai noi.

²³Nungaih ajinka awon nou noknio nou leankü ajepek nai noitsün king dongai soikü khuwan.

²⁴Atsangshei nai Goa Onthso nou ngü loksanküta Babilon akhothiotsün nai laokü kankü shin. Nungaih ngo eptsün atsangshei nung khuwan,

²⁵naiuso ngo akhothiotsün nai noinso tü APAOU nou ngü hau hantsün alum chite.