Read Khiamniungan Naga Ezekiel 12 Bible Online

Ezekiel 12 - Khiamniungan Naga bible

Ezekiel 12

¹APAOU nou ngüko chitekü ngiom,

²“Khaiunia thso,” “Ni angio tsü-angkün khaiuniahoi ongko kihji. Ngüso tü niovei nou poh, lüko titso tsüep, noukhan nou poh, lüko titso tsülula, tiautenai ngüso angio tsüangkün khaiuniahoi noin.”

³“Nungtiphe, khaiunia thso, akhothiotsün khaiunia tsakli thsa tsak lükhemlou, naiuso ngüsoüh epkü ah mongekü nai tsaloukü lükhu. Athang tsak ainou athang tsakai ta ngüso khako ni thaloukü khuwantsünli lükhu. Tsüngean, nung angio tsü-angkün mele lüko, ngüsoüh ngela-au shiom.

⁴Ahnge awon noitsün taoko, akhothiotsün nai khuaoli ni thsa lükhemlou, nungaito ngüsoüh ni eppe naiuso ngüso hau asham akhothiotsün nai ni tsaloukü khuwanji ta lütsande.

⁵Ngüsoüh thapkü noinai, atsam dioai nou lülosat, naiuso dio ai nou thsatkü ajengtsaiu lüloshi.

⁶Athsa asangdongkhaiu ai loklutkü aniovei khojeikü anyakhem nai khuwantsün ngüso hau lüeppi; nungti ni tiai khuwanji ni nung tsüeppe. Ni ti chhiji nung Israel hai thaiutha hau alotsüo tsak noi-e.”

⁷APAOU nou ngü tü ti chhiau ngiom, ngo nung chhikü noiküla. Nung nyi ngo akhothio ainou khaiunia tsakli thsa tsak khemsan; naiuso nung nyi asham ahnya- khemantsün taoko jüphaüh dioai nai khan tsak losat küta nungai shikü khu. Khaiunia pungkü nou thapkü noinai ngo jü thsa jüsangdongkhaiu ai kanlut küta khuwan.

⁸Nungthan nyap nai APAOU nou ngü tü ngiom,

⁹“Khaiunia thso,” “lo nung ngio tsüangkün Israel haiüh ni ti chhiji nung tü sangji,

¹⁰ngüso hau ngo, Akhengting APAOU nou ngiotsün nung lüchite, Nung ngiongem nou Yirusalem shingtsün nokpao naiuso nungko kihtsün khaiunia chikü thaiutha noin.

¹¹Ni ti chhin nungh ngüso tü thawaoau nou ii tsak noin ta ngüso hau lüchite- nung ngüso akhuluttsün naiuso suahoi noi-e.

¹²Nokpao sauüh ngüso da nokshingkü noin ngüsoüh apa thsa sangdongkhaiu nai lokloküta anyakhem nai dioai losat taiutsün nai khulükhune. Apaüh meshen niovei loijeikü apa tiai khuji nung tsüeppe.

¹³Lüko ngo nyao khong- penge naiuso nungko apa thalou-e Nungaih ngo apa Babilon noknio nai kankü khu-e, nungko apa tsüepkü eane.

¹⁴Ngo apa mikhem nai noitsün mepemhoi chikü, apa hau ayam hantsünso naiuso apa pem ehühoi chikü yam pungkü nai hongpenge, naiuso khaiuniahoi nousoüh ngüso loatkü wanao ngüso tü yame.”

¹⁵“Tilai ngo ngüso amao mele naiuso gohmao shingkhannio nouso nai kompenge, ngüsoüh Ngo, APAOU noin ta nge-e.

¹⁶Ehli nai, naiusile nai, naiuso imkia nai, ngo ngüso thsaothsaokülu aasani-e, nungti ngüsoüh me goumchi ai ngüso chhisiya titi achinyan noiküla ta tsangshei-e naiuso Ngo, APAOU noin ta mitha kiu-e.”

¹⁷APAOU nou ngü tü ngiom,

¹⁸“Khaiunia thso,” Apaüh ngiom, “ni ngaoangaokü lühe, naiuso ni shiunai saiukü hatkü lüshiu.

¹⁹Sauhai losaokü meshen goumchi nai kih Yirusalem khaiuniahoi nouso tü nung ngiongem Akhengting APAOU ün ta goumchi mele apem hau lüchite. Ngüsoüh henai ngaongao-e naiuso shiunai ahat nou saiusaiu-e. Ngüso goh akeng wanane, tiautenai nungko noitsün khaiunia pungkü ngiokhem tsünoikü kihji.

²⁰Lo khaiunia nou miankü noitsün noknio nouso lomowane, naiuso goh nou liutsalang iula-e. Nungaih ngüsoüh Ngo APAOU noin ta nge-e.”

²¹APAOU nou ngü tü ngiom,

²²“Khaiunia thso,” “Tiauta Israel khaiunia nousoüh ‘Atao yanji, naiuso khapiam ngio nouso titso tsüshithawao’? ta ngiopung ngiothi ngio laoshikü ngioji.

²³Nungtiphe, Ngo Akhengting APAOU nou nungh thaiutha ti ngioau noin nungh ngüso hau lüchite. Ngo nungh ngiopung ngiothi lothonane. Loto Israel nai nung tilaitso tsüchiteshi-e. Nungliko ngüso hau nung lüchite: Atao nou shikü noin, naiuso khapiam ngio nouso thawaokü shiji!

²⁴“Israel khaiunia ongko yaang atsangshei tsüdekünai yam aphio nai niatsün khapiam ngio nouso tsünoishi-e.

²⁵Ngo, APAOU nou ngüso tü ngioji, naiuso ngo ti ngioji nung chhi-e. Nungko titso tsangkü tsünoishi-e. Asam angio tsü-angkünso, asam aa noitsün taokolu, thawao-e,” ta Akhengting APAOU nou ngioji.

²⁶APAOU nou ngü tü ngiom,

²⁷“Khaiunia thso, Israel haiüh asam atsangshei naiuso khapiam nouso alaiukü noiküta thawao-e ta yangji.

²⁸Nungtiphe ngo, Akhengting APAOU nou ngiotsün ngüso hau lüchite: Ngo ti chhi-au noin, nung tsangkü tsünoishi-e ta ngo, Akhengting APAOU nou ngioji!”