Read Khiamniungan Naga Ezekiel 13 Bible Online

Ezekiel 13 - Khiamniungan Naga bible

Ezekiel 13

¹APAOU nou ngü tü ngiom,

²“Khaiunia thso” “meshen chija shanloukü khapiam ngio kiutsün Israel hai e-po nouso thako khapiam lüngio. Ngüso tü APAOU ngio lü-ang ta lüchite.”

³Akhengting APAOU nou nungti ngioji: “Mainga e-po nouso inyate! Tiautenai ngüsoüh titso tsüepkün nung meshen mongyang ainou e-po nouso ngio chiteji ngüso tü lüngio.

⁴Israel khaiuniaso, asam e-pohoi noknio lotheankü noitsün ongko kihtsün chio nousoli noin.

⁵Ngüsoüh lungpe loiankü noitsün athang nousoko tsüjim, tsüdekünai ngüsoüh lungpe lüko tsüpe, nungti APAOU ajekhaiu nouko tilai ehli nou shi-e Israel kiplouau tsüshio-e.

⁶Ngüso ün atsangshei atsüo nou tsüde, naiuso khapiam ngio nou yaang. Ngüsoüh jü ngiongem chiteji ta ngioji lüko ngo ngüso hongkü tsünoi. Nungti lüko ngüsoüh ngüso ngio atsüoting thawao-iau yangji!

⁷Asamüh eptsün atsangshei nouso tsütha, naiuso asamüh khapiam ngio chitetsünso yaang ta ngo ngüso tü ngioji. Naiuso nung jüngio nouso noin ta asamüh ngioji, lüko ngo asam ko chitekü tsünoi!”

⁸Nungtiphe Akhengting APAOU nou ngüso tü ngioji, “Asam ngio atsüotsüde, naiuso asam atsangshei nouso yaang. Ngo asam tü kheng- shikü noin.

⁹Asam atsüotsüdekü atsangshei eptsün naiuso ayam tsü- thakünai nialükhuntsün khapiam ngio kantsün e-po nouso ngo angja kiuao noin. Tilai jü khaiuniasoüh kamshiküta athalou lou-e asam nungko tsüha-e, Israel hai paopung- ling nai asam nian tsühoilute; asam tilaitso asam gohthang ai laokü tsüshi-e. Nungaih asamüh ngo Akhengting APAOU ta nge-e.

¹⁰“E-po nousoüh aalou nou noin ta ngiokü jü khaiunia ayam tsütha- künai nialükhunji. Apem atsüoting to aalou tsünoi! Jü khaiuniasoüh lungshe nouso kamsanküta be nou beji, naiuso e-po nouso shiküta nung tü athaiu nou chulutji.

¹¹E-po nouso tü ngüso pe loiane ta lüngio, nung chiai ah-ou nou honge, san nouso saolute, naiuso nung tü ah-ou-ahsheih nou thoi-e.

¹²Be nou loithiowane, naiuso aleng athaiu chuluttsün nung ti alesan noin ta khaiunia pungkü nou sange.”

¹³Nungti Akhengting APAOU nou ngioji: Ngü mongmatkü be nou lotheau ahsheih honge, ah-ou thsüokü naiuso san nou honge.

¹⁴Ngüsoüh aleng athaiu nou chutaiutsün be, thiopekau, naiuso athanya lung nouso pengane; nung loikü asam apem thioate. Nungaih khaiunia pungkü nou ngo APAOU noin ta nge-e.

¹⁵“Lungbe naiuso nung da aleng athaiu chuluttsünsoüh jü amongmat oukong ngesane. Nungaih ngo asam hau nung be naiuso achuluttsünso mowani-e ta nge-i-e,

¹⁶nungko Yirusalem thaiutha apem aalou tsünoikünai-aalou noin ta ngiotsün e-po nouso lüko khuwane!” Nung akhengting APAOU nou ngioji.

¹⁷APAOU nou ngiom, “Khaiunia thso, lo, akhaiuniaso ongko nyiuhai sauhaiüh meshen mongyang nou khapiam ngio ngioji nungso tü lüthap, küta ngüso lüsanan,

¹⁸naiuso Akhengting APAOU nou ngüso tü ti ngioji, nung lüchite:” “Asam nyiuhai nouso inyate! Tiautenai asamüh khaiunia pungkü hau phakek nai khi-ao alonga ne naiuso alonga sangwoi ngüso khaiu ai kekü me chiai alonga oukong epau thaiutha chhiküla. Asamüh jü khaiuniaso khako ee naiuso aa khaiuko oukong epau mongchioji naiuso nung asam tengkhaiu alesan thaiutha kankeiau aiuji.

¹⁹Barli tso intso naiuso themtsai lop intso epau thaiuthako jü khaiuniaso khako asamüh ngü lomiamkiu-iu. Asamüh eao maikü tsünoikün khaiunia loat, naiuso akih ao maikü tsünoikün khaiunia nouso kih-i. Nungti asamüh jü khaiuniaso tü yaang nou chite, naiuso ngüsoüh asam da monglam.”

²⁰Lo, Akhengting APAOU nou nung ngioji: “Aa naiuso ee lolaoau asamüh alonga ne asam phakek ai kankeitsün ngo chinyanji. Asamüh thajeikü taiutsün khaiunia nouso ngo sokthamkü khaiuniatsüo nai honge.

²¹Ngo asamüh khojeitsün ne lowane, naiuso asam oukong ainou jü khaiuniaso hau alo-i-e. Nungaih asamüh ngo APAOU noin ta nge-e.”

²²“Asamüh yaang chitetsün tsangkü ngo tsümonglingji. Tsümei- kün khaiuniahoi hau asamüh tsümeikün chhi laoloau tsüngio lüko ngüso aa nou kipsankiu.

²³Nung- tiphe loto asam ün yaang atsangshei nouso naiuso khaiunia atsüotsü- dekünai nialükhuntsün khapiam nouso yananiu. Asam oukong ainou ngo jü khaiuniaso kipsane. Nungtiphe asamüh ngo APAOU noin ta nge-e.”