Read Khiamniungan Naga Ezekiel 14 Bible Online

Ezekiel 14 - Khiamniungan Naga bible

Ezekiel 14

¹APAOU ün amongchio thaiutha ngü tü sangluao Israel hai aheihoi nouso ajantso jü dongai shin.

²Nungaih APAOU nou ngü tü ngiom.

³“Khaiunia thso,” “nung khaiunia nousoüh ngüso mong sotsom nouso hau kiuwaniu naiuso nung sotsom nouso hau ngüso angei nai niakei-iji. Ngo ngüso tü thala-e ta ngüsoüh yangji süne?”

⁴“Nungtiphe ngo, Akhengting APAOU, nou ngüso tü ngiotsün ngüso hau lüchite naiuso lüngio: Israel hai pungkü sauhaiüh ngüso mong sotsom hau kiuwan küta angei nai nialükhunikütün phiai e-po tsak ta sangluao shiji apaüh sotsom piakü nou epau maitsün-athala ngü ainou eppe!

⁵Nung sotsom nousoüh Israel hai ngü ainou phoklekü khuwan-i, lüko ngü thalatsün tsangkü ngüso mong laokü shiolou-e ta ngo yangji.

⁶“Nungtiphe lo, ngo, Akhengting APAOU nou ti ngioji nung Israel hai hau lüchite: Asam ün achinyan sotsom nouso leankü ta jüdongai laokü ashi.”

⁷“Tilai Israel hai ongko tsak tsüdekünai Israel hoikam ongko kihakü noitsün gohmaohai tsak ngü ainou laokü khukü ta sotsom nouso amkhamji, naiuso loüh e-po nouso tü sangji, nungaih ngo APAOU, nou apa hau athashitsün kiu-e!

⁸Ngo apa thako tsa-e. Ngo amaohai khako alatau shane. Ngo, apa jü khaiuniaso hoikam ainou wanane, nungti ngo APAOU noin ta asamüh nge-e.”

⁹“E-po tsaküh atsüotsüdekün athala tsak kiutsün tsangkü kausai- at nai, nungüh amao tsüde lüko ngo APAOU, nou kausaiatji. Ngo apa Israel khaiuniahoi ainou wanane.

¹⁰E-po nou naiuso sauüh apa tü sangkü noiküla ngüne nemthsoüh angja wekü eppe.

¹¹Israel haiüh ngü leankü khuwantsün ainou naiuso ngüso chija ngüso angei tsangkü lochinyantsün ainou lolaokü taiuao ngo nung chhin. Ngüso jü khaiunia theao noin naiuso ngo ngüso Goa noi-e” ta Akhengting APAOU nou ngioji.

¹²APAOU ngio jüdongai shikü ngiom,

¹³“Khaiunia thso,” “Shingkhannio tsaküh ngü tü mong tsükiukün shioko angei sunnai, ngo jüpha lolu-e naiuso eheshiu shiyam nou lophangane. Nungko ngo naiusile tsak hongküta khaiuniahoi si thaininan tsakhaulu loatkü wane.

¹⁴Nungh khaiunia süme nouso Noa, Daniel, naiuso Yob so nungko kihkü latha lüko, ngüso amei nou ngüso pemlu kipsane.” Ta Akhengting APAOU nou ngioji.

¹⁵“Tsüdekünai ngo liu thainian nouso khaiunia loatau hongkü, nung gohthang yankü khuau sauüh tsüshiokü,

¹⁶naiuso nung khaiunia süme nouso nungko kihnoi lüko ngo, Akhengting APAOU Goa ngü noin, ta ngüso süme nou lüko ngüso thsoso kipsanao tsüshio-e, lüko ngüso süme aa lu kipsanau shio-e, lüko gohthang aodangkü iula-e.”

¹⁷“Tsüdekünai ngo nung shingkhannio nou chiai ehli kankü shiküta alotheantsün chonsiyam nou khaiunia naiuso thainianhoi aikülu soilepkü lomowanao honge,

¹⁸naiuso nung khaiunia süme nouso nungko kihkü noilüko-ngo, Akhengting APAOU, aa Goa, noin, ta ngüso süme nou lüko ngüso thsoso kipsanao tsüshio-e, lüko ngüso pemlu kipsanao shio-e.

¹⁹“Ngo nung shingkhannio nou chiai imkia tsak hongkü jü among- mat nou khaiunia naiuso thainian piakü aa lowan nai,

²⁰nungko Noa, Daniel, naiuso Yob so kihkü noilüko-ngo Akhengting APAOU, Goa noin- ta ngüso süme nou lüko ngüso thsoso kipsanao tsüshio-e. Ngüso chhi meitsün nou ngüso pemlu kipsanao shio-e.”

²¹Akhengting APAOU nou ngiotsün nungti noin: “Ngo Yirusalem khaioko atsaoting angja püle-Ehli, Naiusile, Liu thainian nouso, naiuso akiasiya, khaiunia naiuso thainian nouso wekü lotheanao honge.

²²Nungko ajantso poisankü naiuso meshen thsoso kipsankü noi naito- ngüso tilai asam dongai shi-e, ta lüthap. Ngüso titi tsümeiting nung lüthap, naiuso Yirusalem chiai ngo angja kankü shitsün nung atsüo noin ta penkiu-e;

²³nungaih ngo chhikü shitsün alum thaiutha ayam thakü noin tü ngela-e.” Ta Akhengting APAOU nou ngioji.