Read Khiamniungan Naga Ezekiel 16 Bible Online

Ezekiel 16 - Khiamniungan Naga bible

Ezekiel 16

²“Khaiunia thso” Yirusalemüh achinyan tilüsong chhisiyakü noin nung lüchite,

³Akhengting APAOU nou apa tü ti ngioji nung Yirusalem hau lüchite: “Ni Kananhai goumchi nai chet. Apo Amor hai, naiuso anyiu Hit hai noiküla.

⁴Ni chet taoko, sauüh ali auo tsülamthatkiu, sauüh ni tsüpengankiu, sauüh ni tü jem khiam nou tsütsomkiu, naiuso sauüh ni niothom ne nou tsücheploukü noi- küla.

⁵Athaiutha nungso chhikiuau sauühtso niovei nai atsüojin tsüyangsan. Tilai ni chet, sauüh ni tsütsüojin. Ni kengpun tsak ko yakkankü noiküla.”

⁶“Nungaih ngo yankü khunai, ni ashe ko lao-ekü noikü ep. Ni she nou thapukkü noiküla, lüko ngo ni tsü-e-i-e.

⁷Ngo ni paisam amei tsak khekkü samsan-i. Ni menyiuthso tsak khekkü kongkü naiuso laiukü sungkü iula. Ni nyao meikü pokü naiuso khaiuo nouso samkü iula, lüko ni pem tsosa noiküla.”

⁸“Naiuso loühjam ngo yankü khushinai, ngo ni tü thapnai ni atsüojineao lümeikü ep. Ngo jü phakhutüh apem tsosa noitsün tenpok küta ni tü tsüojinao thalou. Ah, ngo niko tsamsigoh shanao athalou-e tsak shan, naiuso ni ngü ün iula.” Akhengting APAOU nou ngiotsün nung noin.

⁹“Nungaih ngo khiam nou ashe tsawankiu. Naiuso ngo apimai olip-khiam nou tsomkiu.

¹⁰Ngo ni hau phakhut alaiu alengmei chiulutkü noitsün, nyikhun ameiting nou shantsün hokphop, ne amatchai nou shantün kandio naiuso ne amatchai nou shantsün phakhut nou thokiu.

¹¹Ngo ni da chaiou nou kongwoi woikiu naiuso lakkom nouso tholutkiu.

¹²Ngo ni hau ngan dao, nuodao, naiuso kandio alengmeiting nou kiu.

¹³Ni chaiou lakkeng, tsangkason daosilak taim, naiuso ewoi amatchai nou alengyamlutkü taiutsün neshe ni asaita tenji, wonne ameiting ainou shantsün themtsai, naiuso liu-khiam, naiuso olip-khiam nouso ni heshiuji. Ni ün alengmei nung uokü noiküla, naiuso ni menyiu nokpao tsak iula.

¹⁴Ni nou alengmei thapemkü noitsün shioko ni mele pungkü nai ateng iula; tiautenai ni nungti alengmeiting shankiutsün nung ngo noiküla.” Ta Akhengting APAOU nou ngiotsün nung noin.

¹⁵“Lüko ni alengmei noutü monglingkü yangkü ashitsün apem kamha-ikü ni ajisiwop chhin.

¹⁶Ni aneshe ajantsoüh amkhamthang nouso tü alengyam lolut au kankei, naiuso ajisiwop mai hetsün tsak khekkü, ni apem khaiunia pungkü hau kiuwan.

¹⁷Nihau ngo kiutaiu- tsün tangkason, chaiou lakkeng nouso ni loküta, nungüh pohai sotsom shankü, ngüsoko tsütsamtsü- tsüo kankei.

¹⁸Nihau kiutsün alengmei chiolutkü taiutsün neshe ni nung sotsom nouso tü salut naiuso ngo ni hau kiutaiutsün olip-khiam naiuso angannyamtsün nung sotsom nouso hau kiuwan.

¹⁹Ngo nihau chih-wonne ameiting olip-khiam, naiuso liukhiam kiu, lüko ni nungso sotsom nouso ainou amongmei tailouau chaithio kiuwan.” Ta Akhengting APAOU nou ngiotsün nung noin.

²⁰“Nungaih asamüh jü thaiutha chetkiutsün asam thso melo si menyiu nouso nung sotsom nouso hau chaithio kiuwan. Ngü ko mong- tsükiukü noitsün nungüh tsüom süne?

²¹asam thsoso lokü sotsom nouso hau chaithio kiuwantsün noiküla,

²²asam meshen shesinyih mai hetsün ajisiwop chhitsün achinyan aakih amethso tao ni jam lüko tilaitso tsüyangsan süne?”

²³Akhengting APAOU nou ngiom, “Asam inyate! Inyate! Asamüh angei ta ngiotsün apem chhin, naiuso nungthanko

²⁴asamüh yamtsai pungkü sotsom nouso amkhamao tsam nou lahsan naiuso ajisiwop chhiji.

²⁵Nung ni nou alengmei achinyan au iula-i. Nungko ayanlü- khuntsünso apemko asam ajekhaiu pungkü ajisiwop chhi tekkü shingkü khuji.

²⁶Ni aphaosipo Ijip hai shesinyih nai chinekkü noitsün niko aikü then nai saiha-i, küta ni ajisiwop chhi kankeitsün nou ngü mongmat-i.”

²⁷“Nungtiphe ngo ni hau angja kiuao naiuso ni nou ouk tengkam kankü khuwanao akhütha ai jüpha loksaniu. Asam ajisiwop chhi ta chinyantsün naiuso asam tü niovei kiatsün Filistiahai hau ngo asam kiuwaniu.”

²⁸“Tiautenai ni amao haiüh mongtsam tsüthasangkiu nou shioko ni Asiria hai phiai ajisiwop chhi ao jingkü khuji. Ni ngüso ün ajisiwop chhitsün noiküla, loüh ngüsoüh lüko ni mongtsam tsüthasangkiu.

²⁹Ni loüh chaile oule mele Babilon hai ün ajisiwop chhitsün tsak noiküla, loüh ngüsoüh lüko ni mongtsamtsün tsüthasangkiu.”

³⁰Akhengting APAOU nou nungti ngioji: “Asamüh nung chikü nou amiam tsülepkün ajisiwop menyiu tsaküh chhitsün khekkü chhianiu.

³¹Yam pungkü nai ni sotsom nouso tü amkhamtsün tsam lahshan naiuso nungko ajisiwop chhisiya nou chhin. Lüko ni chai lokü ajisiwop chhitsün tsak khekkü to tsüde.

³²Lüko ni meshen tsammongpo wankü mesan haiko tsütsamtsütsüo chhitsün menyiu tsak khekkü noin.

³³Shesinyih jankü ajisiwop chhitsün tsak to amai kiukü taiuji, lüko asamüh to asamko ajisiwop chhiau alum ainou shitsünso hau nekhem paopei kiuji.

³⁴Nungtiphe asam to ajisiwop chhitsün mothikü tsak noin. Pohai sauüh ni nungtili noiau tsükoja. Ni sauühtso amai kiukü tsütaiu; ni bao ngüso hau amai waokü noin! Ah, nungüh amao ajisiwop chhitsün konai ni amomo.”

³⁵Nungtiphe lo, ni tsütsam- tsütsüokün Yirusalem! APAOU nou ti ngioji nung anglu:

³⁶“Ni ajisiwop chhitsün tsak khekkü, asheitho nouso khuowan küta ni nou atsüojintsünso naiuso asam ün achinyan sotsom nouso hau athsoso aloat chaithio kiuwan ta APAOU Akongteng nou ngioji.

³⁷Nungshioko asamüh tsüojintsün naiuso chinyantsünso, ngo asam ün aya tsüojintsünso apem niakame. Ngo ngüso asam lemkü kamshikü niakame, küta asam ün sheitho nouso khuowankü ngüso hau asam tsosa epi-e.

³⁸Ni tsütsamtsütsüo chhitsün naiuso aloattsün thaiutha ngo ni tü mi kheme, naiuso jü amongthe mongmat naiuso ngo ni eantsün nou angja kiu-e.

³⁹Ngo ni ngüso oukong nai taiu-e, naiuso ni ajisiwop chhitsün naiuso sotsom amkhamtsün athang nouso ngüsoüh laopengkü wane. Ngüsoüh ni nou sheitho naiuso chaiou jengtsaiu nouso kankü khuwane naiuso ni moisemkü tsosa lokkane.”

⁴⁰“Ngüsoüh ni tü lung nou yakkau hoi asong tsak taikame, naiuso ngüso sahüh ni nelangkü tapne-e.

⁴¹Ngü- soüh asam ün tsam nouso jekthio wane naiuso menyiuhoi kamthiotaiu- tsünso hau asam angjatsün epi-e. Ngo ni ajisiwop chhitsün lolao-e naiuso ni tsüojintsünso hau paopei kiutsün laolo-i-e.

⁴²Nungai jü amongmat laowane, naiuso ngo tsamloukü iula-e.

⁴³Tilai ni methso tao noiküla, ngo ni titi kankei ni nung be-an, naiuso achhi nouso tsangkü ngü mongmat-i. Nungshioko ngo ngüso chikü thaiutha asam hau amai kiu-e. Asamüh amao achinyan chhitsün nouko aikü asamüh tiauta shesinyih tsütsamtsütsüo chhisiya nou chhin?” ta Akhengting APAOU nou ngioji.

⁴⁴APAOU nou ngiom, “Yirusalem, khaiuniahoi nousoüh athaiutha nung ngiopung ngiothi kankeikü ngio-e. ‘Nyiu nou titi, thso menyiuthso nou lüko nungtilu.’

⁴⁵Ni atsüoting anyiu thso. Apaüh meshen tsammongpo naiuso meshen thsoso chinyanji. Anouso sauüh ngüso tsammongpo naiuso ngüso thsoso tü chinyan nungso khekkü. Ni naiuso anuoso ün nyiu Hit hai naiuso apo Amor hai noiküla.

⁴⁶“Anou ashe nou Samaria noin, nungko ajenapki apa nok nouso hakü, Anio menyiutso nou ajenapki nai apa nok nouso hakü Sodom noin.

⁴⁷Ngüso hok ngamthang tü hoilutkü ngüso ün achinyan chhisiya nousoüh ni mongtsam thasangmo? Tsüde, asam atao laiukü tsükhukü ngüsoüh tsümeikü chhitsün alum khengai saisile atsaoting noiküla.”

⁴⁸“Ngo atsüoting aa Goa ta noitsünli,” “anuo Sodom naiuso apa nok nousoüh tilaitso anoküh chhitsünli tsümeikü to tsüchhi ta Akhengting APAOU nou ngioji.

⁴⁹Ngüsoüh aheau saiukü naiuso aaloukü si tsamloukü kihau noi nou shioko apa naiuso apa menyiuthsoso bülomji, lüko ngüsoüh tsosilu hai naiuso titsüepdehakünso tü tsüpao- tsang.

⁵⁰Ngüso mongkong naiuso bülom nou ngo chinyantsün chhin, nungtiphe asamüh ngetsünli ngo ngüso lomowan.”

⁵¹“Samariaüh ni chhitsün angei apaitso lüko tsüchhi. Ni apa chiai achinyan thsüokü chhin. Awe-elunai niko naito anouso aphio tsüsunkünli eppji.

⁵²Naiuso loto ni meshen ün amiam kanao noin. Niko naito anuoso aphio tsüsunli ni nou angei thatü tsümeiteng. Nungtiphe ni nou amiam thsale ni lükan tiautenai niko naito anouso sanglingküli epiji.”

⁵³APAOU nou Yirusalem tü ngiom, “Ngo Sodom naiuso Samaria akuo lomeikiushi-e. Ah, ngo ni lüko lomeikiushi-e.

⁵⁴Ni achija miame, naiuso ni nou amiam nou anuoso ngüso titengkü meithso ta epsanshi-e.

⁵⁵Ngüso loüh tsüomeikü iulashi-e,

⁵⁶Ni bülomtsün ajekhaiu ko nai

⁵⁷ni chhitsün tsümeikün nung achiai moshithsatkün khako ni Sodom thaiutha tsülouchi süne? Lo, ni lüko Edom hai khako, Filistia hai khako, naiuso asam tü chhinyantsün chenpa nouso khako alonyai tsak khekkü tsüde süne?

⁵⁸Ni achinyan ajisiwop naiuso chhi tsümeikün mai angja nou louau noin” ta APAOU nou ngioji.

⁵⁹Akhengting APAOU nou ngioji, “Ni epau maikü noitsünli ngo ni kankei-e tiautenai ni thaloutaiutsün ni tsüwesan naiuso athalou-e nou lothean.

⁶⁰Lüko tilai ni methso tao noiküla nung taoko ngo niko shantsün athalou-e nou wesankü kankei-e, naiuso athontsüyangkün athalou-e tsak ngo niko shan-e.

⁶¹Tilai ni anou si anio ne laokü epshi-e, ni titi chhisanhekü noiküla nung thaiutha ni miamkü yangshi-e. Nungto athalou-e ngü nou niko haoson tsak tsüde lüko ngo ngüso niko apa menyiutsosoli, noi-i-e.

⁶²Ngo jü athalou-e niko lomongshi-e, naiuso ni ngo APAOU nou noin ta nge-e.

⁶³Ni chhitsün aphio apem ngo wankiu-e, lüko ni nung yangshinai asun sopsatao lüko ni thatü miam-e” ta Akhengting APAOU nou ngioji.