Read Khiamniungan Naga Ezekiel 17 Bible Online

Ezekiel 17 - Khiamniungan Naga bible

Ezekiel 17

¹APAOU nou ngü tü ngiom,

²“Khaiunia thso,” “Israelhai hau nung ngio alat tsak

³nou Ngo, Akhengting APAOU nou ngiotsün lüngela-i. Letche asong tsak akoi alengmeikü ekok punkü sapengkü noiküla. Apa Lebanon kingai jeikü khuküta cedar pai atsokting nouso longek,

⁴naiuso nung apaüh kankü khukü chaile oule goh tsak ai chailehoi noknio nai taiukiu.

⁵Küta apaüh Israel hai goh ainou paisam tsak louküta nungh samsan-iau khiam asaita noitsün gohtsa goh tsak nai thomkü taiu.

⁶Naiuso nung paisam nyapkü saokü jungpekkü nungh sainaoshep auo tsak hau iula, Nung ajung nouso letche noitsün dongai halai samsan, naiuso a-iu nouso khankheiai aokü napkhu. Nung sainaoshep nou ajung nouso si ashah nousoüh sojeikü noiküla.

⁷“Loüh letche asongting tsak akoi punkü naiuso apun teikü samkü noiküla. Naiuso lo nung sainaoshep auo nou apa ün e-iu nouso apa dongai khukü, nungh samtsün aimong nai noitsün khiam tü tekkü piakü kiuao ayang nai nung ün ashah nouso apa dongai phoklekiu.

⁸Lüko nung sainao nou ashah naiuso shep nouso meikü eiukü hau khiam meikü kiutsün gohtsa nai thomankü noiküla.”

⁹“Nungtiphe, Ngo Akhengting APAOU nou sangkü ngiom, Nung sainao shingkü khu-e süne? Nung chongting letche nou e-iu saokü seksankü sainaoship nou seksan, naiuso akia nouso heankü nungso tsüwonani-e süne? Nung seksanao oukong tsüpo-e tsüdekünai akong mele tsüpo-e.

¹⁰Ah, nung thomaniu, lüko nung aakü samsane süne? Shingngan ahsheih nou thoikeinai nung wonkü tsükhuwane süne? Nung asamsanthang nouko tsüwonane süne?”

¹¹APAOU nou ngü tü ngiom,

¹²“Nung athatlu ngiolat ngüsoüh ngejimo ta nung akhengshihoi nouso tü lüsang. Babilon hai nokpao Yirusalem ai shikü nung nokpao naiuso apa khemko noitsün asonghoi nouso apako hakü Babilonnai kankü khuwaniu ta ngüso hau lüchite.

¹³Apaüh nokpao ün tsammong ongko tsak singlouküta, apa ko ngiomong- shing tsak shan, naiuso apa tü nokpao ngio angkü theao thaiutha shanlou-i.

¹⁴Mele nou loüh akhengshi tsüsungi shiao naiuso ngiomong- shing taiutsün atsüoting kankeiau, apaüh pohai atenghoi nouso nialoukü khuwan.

¹⁵Lüko Yihuda hai nokpaoüh khengshi naiuso Ijip ainou mokthso naiuso süpaihoi apiating louau apaüh tsamkei nouso hong. Nung apaüh shio-e süne? Apaüh ngiomongshinge tsülothekü naiuso angja tsüepküto khuau tsüshio-e!

¹⁶“Ngo aa Goa atsüoting,” ta Akhengting APAOU nou ngioji, “nung nokpao Babilon nai eane tiautenai apaüh meshen hau nokpao noikham kiutsün ko ngiomong shinge taiutsün naiuso athalou Babilon nokpao ko shantaiutsün tsükankei.

¹⁷Tilai Babilon haiüh Yihudahai noksong thalouau naiuso loatau koja lüko Ijip hai nokpao naiuso akong süpaihoi nousoüh lüko ehli nai hachuau tsüshio-e.

¹⁸Apaüh athalou naiuso ngiomongshingetsün lothean. Apaüh nungso apem chhin, loto apa tilaitso tsüthakhu-e.”

¹⁹Akhengting APAOU nou ngioji, “Ngo atsüoting aa Goa ta noitsünli apaüh jü nianko ngiomongshing thaloutaiutsün lothean thaiutha ngo apa hau angja kiu-e.

²⁰Ngo liuhom hai nyao sapenge küta nungko apa thalou-e. Ngo apa Babilon nai kankü khukü nungko apa hau angja kiu-e, tiautenai apa ngüko mongtsükiukü noiküla.

²¹Apa ün ameiting süpaihoi nouso ehlithang nai loatkü wane, naiuso apoisan nouso yam pungkü nai khupenge. Nungaih Ngo, APAOU, nou nung chiten ta ni ngela-e.”

²²Akhengting APAOU nou nungti ngioji: “Cedar pai alaiuting nou ngo lou-e naiuso paison nou lotheane; Ngo nung king atsok chiai thome,

²³nung Israel ün atsokting king chiai thome. Nung pai laiukü sunge, eiu nou eiu-e naiuso nung cedar pai asongting tsak iula-e waio in pungkü nung da kih-e. Naiuso nungsoh aaloutsün eppe.

²⁴Goh chiai samtsün pai chikü nou ngo APAOU ta nge-e. Ngo pai alaiu nouso sahong küta pai ehen nouso wonan-iji naiuso pai-e nouso pai aa ao iula-iji, ta Ngo, APAOU nou ngioji, Ngo ti chhi-e ta ngiom, nungh ngo chhi-e.”