Read Khiamniungan Naga Ezekiel 18 Bible Online

Ezekiel 18 - Khiamniungan Naga bible

Ezekiel 18

¹APAOU nou ngüko chite

²kü ngiom, “Israel goumchi nai khaiuniahoi nousoüh nung ngio thanshidekü ngiotsün ti athat? ‘Posinyiuhaiüh sainaoshep ehejek he nou thsaosithsohai tü hou hamji.’

³“Ngo atsüoting aa Goa,” “asamüh Israel nai nung ngiopung ngiothi ngiothan tsükankei shi-e ta Akheng- ting APAOU nou ngioji.

⁴Posinyiu hoi naiuso thsohoi khaiunia chikü ün aa nou ngü noin. Angei suntsün khaiunia to eaolu noin.

⁵“Lüko ngiotsüo ngiotsün khaiu- nia amei tsak, asio naiuso saitha noikü

⁶apaüh Israel hai ün sotsom nouso tü tsü-amkhamkü, liutsa lang nai aloat chaithio kiutsün tsühekü, amaohai tsammongnyiu tsülochinyankiukü, menyiu tsak apa alei pungkü achinyan khutsün taoko emkamkü tsünoikü,

⁷apaüh amaohai kausaiatkü naiuso kauatkü tsüthekü, amaohaiüh apahau chailaiu nai anu kiuhatsün laokiu- wanshikü thenai, naiuso apaüh naiusilekü noitsünso chih nou tsadkü, pem tsosa nouso hau atenao neshe kiukü,

⁸apaüh anu loshiao chailaiu tsükiukü, tsümeikü chhiau nankü apülai sungtsün taoko saitha ngiothon kiutsün noikü,

⁹jü athoilut nouso angio angkü naiuso jü ngio- khem nouso mongkiukü kankeikü thenai, apa ngiotsüo ngiotsün khaiunia, apa aa kih-e,” ta Akengting APAOU nou ngioji.

¹⁰“Naito, nung khaiunia thso tsak meda aplo-ekeikü, apa poüh tilaitso tsüchhikün nungso chhikü,

¹¹liutsa langnai aloat chaithio kiutsün hekü, amaohai tsammongnyiu lochinyan kiukü,

¹²tsosilu hai kausaiatkü, naiuso kauatkü, chailaiulotsünsoüh apa hau amonglamao thiotaiutsün lokü, apa liutsa lang sotsom amkhamthang nouso ai khukü achinyan sotsom nouso tü amkü,

¹³naiuso anu epshiao chai laiukiukü, theji. Naito apa aa kih-e süne? Apa aa tsükih-e. Apaüh nung achinyan chhi nouso apem chhi-aniu, nungtiphe apa e-ane. Apa eantsün thaiutha apalu aphio noi-e.”

¹⁴“Lüko lo nung khaiunia nou melothso tsak hakü, apaüh apa poüh chhikü shitsün angei nouso epkü, lüko apaüh nung tü tsühoilut,

¹⁵apaüh Israel hai ün sotsom nouso tü tsüam, naiuso liutsalang nai amkhamtsün sotsom nouso dongai khukü aloat chaithio nouso tsüheji. Apaüh amaohai tsammongnyiu tsü- lochinyankiukü,

¹⁶naiuso tsosiluhai tsüthangmang tsüdekünai sau lüko tsükauat. Naiusilekünso hau tsadkiukü naiuso pem tsosa nouso hau tenkiukü,

¹⁷Apaüh jü ngiokhem naiuso jü athoilut nouso angio angkü kankeiji. Apa to apa po angei shioko to tsü eane, lüko apa to atsüoting aa kih-e.

¹⁸Apa poüh to kausaiat naiuso kauatkü chhin, naiuso khaiunia pungkü ta tsümeikü chhin. Nungti lüko apa to apa meshen angei sunhe nou shioko ean.

¹⁹“Lüko asamüh sangji, ‘Tiauta thso nou po nou angei nou tsükane?’ tsüangja-e lüko thso nou to ayamtha naiuso amei nou chhin. Apaüh jü ngiokhem nouso da paotsangkü hoilutkü kankei, nungtiphe apa to aa kih-e.

²⁰Eao nou to angei sunhetsün tsangkü noin. Apa po ün angei shioko thso nou to tsüsappate; tsüdekünai po nou meshen thso ün angei shioko tsüsappate. Khaiunia amei tsak nou apa chhi amei thaiutha alesan eppe, naiuso tsümeikün khaiunia tsak nou apa chhi tsümeikün thaiutha asappat eppe.

²¹“Tsümeikün khaiunia tsak apa angei chhitsün ainou laolokü, jü ngiokhem nouso kankeinai, naiuso apaüh ayamtha nou naiuso amei nou chhi nai, apa tsü eane, apa atsüoting aa kih-e.

²²Apa angei apem wankiu- e, küta apa aa kih-e, tiautenai apaüh ayamtha nou chhin.

²³Tsümeikün khaiunia tsak eantsün epnai ngo monglingate ta yangji süne?” ta Akhengting APAOU nou sangji. “Tsüde, ngo apabao mongphokleküta aa kih epau bao yangji.

²⁴“Lüko asio khaiunia tsak chhi amei chhitsün laolokü tsümeikün achinyan chhitsün, apem chhiao tsalounai, apa aakiletkü noi-e süne? Tsüde, apaüh chhikü shitsün amei tsaktso tsüyangsanshi-e Apa meshen mongtsülamkün naiuso angei shioko eane.”

²⁵“Lüko asamüh ngioji, ‘APAOU nou chhitsün ayam tsütha’ Asam Israel hai, ngü tü anglu. Ngü chhitsün chhisiya yam tsütha ta asamüh yangji süne? Ayam tsüthakü nou to asam chhi yam noin.

²⁶Tilai asio khaiunia tsak apa chhi amei chhitsün laolokü chhi tsümeikü chhishikü ean-e, apa chhi tsümeikü chhitaiu nou shioko apa eanji.

²⁷Tilai tsümeikün khaiunia tsaküh apa angei chhitsün laoloküta ti ayam thakü noin nung chhiji, apaüh me- shen aa kipsanji.

²⁸Apaüh chhitsün apaüh yangsankü angei chhi nou laoloji, nungtiphe apa atsüoting tsü-eane, lüko aakihkü khu-e.

²⁹Asam Israel haiüh ngioji, ‘APAOU nou ti chhiji nung ayam tsütha.’ Asamüh jüyam tsütha ta yangji, süne tsüde? Ayam tsüthakü nou nung asam yam noin.

³⁰“Nungtiphe lo, asam Israel hai, asam, khaiunia pungkü meshenüh chhitaiutsün lingkü ngo asam tü mi kheme ta Akhengting APAOU, nou ngioji. Asamüh chhitsün tsümeikün apem ainou asam lüpokle, naiuso asam angei hau asam lalothean-i.

³¹Asamüh tsümei chhikü shitsün apem lüwanan, naiuso asam mong naiuso mongpem ayan lü-iula. Israel hai, asam tiauta eanao aiuji?

³²Ngo saulünou ean-iau tsüaiu” ta Akhengting APAOU nou ngioji. “Nungtiphe asam angei ainou lüphokle küta aa lükih.”