Read Khiamniungan Naga Ezekiel 19 Bible Online

Ezekiel 19 - Khiamniungan Naga bible

Ezekiel 19

¹APAOU nou ngütü Israelhai nokpao thso nime thaiutha nung amongsaiu jih hangau ngiom:

²Apa meshen thsoso chongkhao apong atsaoting ongko paotsangkü thashesantsün amongling chongkhao nyiu tsak noila!

³Apaüh meshen thso thashe küta apa hau ahomhetsün tsande; naiuso apa khaiunia heantsün tsak iula.

⁴Mele nousoüh apa thaiutha ngio lula küta apa khanthop tsak nai nap-i. Jin nou ngüsoüh apa thalou küta Ijip ai kankü khu.

⁵Ayang apem momowankün lektso apaüh taiukü noi. Naiuso apaüh loüh athso nou tsak thashesanshi, naiuso apa chongkhao thatü ajeting tsak sungjikan.

⁶Tilai nung sungkü iula, apa amao chongkhao nousoko tsakeiha. Apaüh lüko ahomheau ngelou küta khaiunia heantsün tsak iula.

⁷Apaüh akongting pe nou lothean, apaüh noksong nouso lothekü wan. Apa ngaotsün pungkü nungko kihtsün khaiuniahoi nouso hatat.

⁸Khaiuniahoi alum ainou shikü mele nouso apako lihe-au kamshin. Ngüsoüh ngüso liuhom nyao nouso sukpeng naiuso apa ngüso jin nai thalou.

⁹Ngüsoüh apa akhotsam nai taiu küta apa Babilon hai nokpao dongai kankü khu. Ngüsoüh apatü ehükü wan nungtiphe loto Israel hai king nouso ai apa ngaotsün tilaitso tsülulashi-e.

¹⁰Anyiu haiusai nai thomtsün sainaoshep tsak khekkü noiküla. Nungko khiam saiukü noin shioko, nung sainao nou ahsha naiuso shep nou pokü noiküla.

¹¹Apa ün ajung nouso thatü mongkü iulaküta, nokpao ün pailai au iula. Nung sainao nou thengmia yapkü hau lümeikü laiukü samsan; nung titi ahsha pokü naiuso laiukü noin ta khaiunia pungkü nou epküla.

¹²Lüko amongmat pha nou nung e-iu saokü seksan küta nung goh ai yaktaiu. Shingngan ahsheih nou nung shep nouso wonan. Naiuso nungh ajung nouso ngeksanan; küta nungso jahwan.

¹³Lo nung liutsa awai naiuso khiam tsünoikün gohthang tsak nai thomkü noin.

¹⁴Naiuso nung sainaoshep aokia nai in nou nyai; küta ajung naiuso tilaitso kongkü tsüiulashi-e, naiuso tilaitso nokpao pailai ao tsütheshi-e. Amongsaiu jih tsak nou nung noin; naiuso nung asaita hangji.