Read Khiamniungan Naga Ezekiel 2 Bible Online

Ezekiel 2 - Khiamniungan Naga bible

Ezekiel 2

¹“Ngü nung epnai, jü kha thaothio, nungai sang tsak nou nungti ngiom, Khaiunia Thso, atsa, ngo niko chite-e,”

²Naiuso apa sangüh ngü ko chitekü noitaoko, Goa onthso ngü da napkü, ngü tsakü noinai loüh sangh tsak nou ngüko tsülaokü chitetsün lula,

³Khaiunia Thso, ngo ni Israel khaiuniahoi dongai hongji. Ngüso paosiposo khekkü ngüsoüh jüthako loüh khengshiji.

⁴Ngüso mongkong, ngü tü asuhat tsünoi, nungtiphe ngo Apemshiotsün APAOU nou ngüso tü ngiotsün chiteau ni ngüso dongai hongji.

⁵Nung akhengshi nousoüh ni tü angba tsüangba, ngüso ongko e-po tsak hakü noiküla ta ngüsoüh nge-e.

⁶“Lüko ni, Khaiunia Thso, ngüsoüh ti ngiolünou, ngüso lun tsühatkü lüthe. Ngüsoüh asam lochi lotsao-e; nungüh asam aliule sunkü noitsün mekhakhanio ongko kihtsün khekkü noi-e. Nungti lüko nung akhengshihoi tsüdekünai ngüsoüh ngiotsün lon titso hatkü lanoi.

⁷Ngüsoüh to angba tsüangba ngo tilüsong ni tü ngioji nung ngüso tü ngioau ngioji, nung lüngio. Ngüso nung angio tsülukün khaiuniaso ta lüyangshi.

⁸“Khaiunia Thso, ngo ni tü ti ngioji anglu. Ngüsoli angio tsülukü lathe. Ason koupengküta ngo ni hau ti kiuji nung lühe.”

⁹Nungai thsamlai tsak semkü pha tsak jü dongai kankü shitsün ngo ep.

¹⁰Nung pha nou thsamlai sokpek nai, nung thsamlai khup nemthso ai amongkia naiuso amongsaiu anget nou shaptsün satkü noiküla.