Read Khiamniungan Naga Ezekiel 20 Bible Online

Ezekiel 20 - Khiamniungan Naga bible

Ezekiel 20

¹Sam thaloukü khuwantsün pon chinyat nou da alei pungo ajekhaiu chenyi nouko nai, Israel hai hoikam nouko ahei ajantso APAOU ün amongchio nou thaiutha sangluao jü dongai shiküta jü khako moknoi.

²Nungaih APAOU nou ngüko chitekü ngiom,

³“Khaiunia thso,” nung khaiunia nousoko chitekü ta Akhengting APAOU nou ngiotsün ngüso hau lüchite: “Asam jü amongchio nou tü sangluao shin tsüdeso? Ngo atsüoting aa Goa li, asam hau ngü tü titso tsüsangi-e, ta Akhengting APAOU nou ngioji.

⁴“Ni ngüso thako mikhem kiuao khemkü noin süne, khaiunia thso? Nungaito lüchhi. Ngüso paosiposoüh achinyan chhikü shitsün ngüso hau lüngela-i.

⁵Ngo ti ngioji ngüso hau lüchite. Tilai ngo Israel chosan, ngo ngüsoko athalou-e tsak shan. Ngo APAOU asam Goa noin ta Ijip nai ngo ngüso dongai atsangshei sung naiuso ngüso tü ngiom:

⁶Nungh ngo ngüso Ijip ainou nialoukü khu-e ta thalou naiuso apem ongko ameiting goh memei ngüso thaiutha chosantsün gohthang ai niakü khu-e.

⁷Ngo ngüso tü achinyan sotsom ngüsoüh tsüojintsün yakkanao naiuso Ijip hai yaang goa nouso ko tsüsiokün tsüchhiao ngiom, tiautenai Ngo ngüso Goa, APAOU noin.

⁸Lüko ngüsoüh ngü lochi naiuso angio tsü-ang. Ngüsoüh ngüso ün achinyan sotsom nouso tsüwanan tsüdekünai Ijip hai goa nouso tsülean. Ngo ngüso hau Ijip nai jü amongmat oukong kanloukü thawao-i.

⁹Lüko ngo nung tsüchhi, tiautenai nungüh ngü hau asuhat tsükiu, tititenai ngüso kihatsün khaiuniahoi nouso khako ngo Israel hai tü ngüso Ijip ainou niasane ta ngiowaniu.”

¹⁰“Nungtiphe ngo ngüso Ijip goumchi ainou niasan.

¹¹Sauhaiüh angio angji nungso hau aa kiutsün ngo, ngüso hau athoilut nouso kiu naiuso jü ngiokhem nouso tsande.

¹²Ngüso asio shankiutsün ngo, APAOU nou noin ta yangsani-au sam jetko athalou-e ii tsak taiuao ngo Yihuda Anounyi nou uosankü kankeiau shan.

¹³Lüko liutsa nai tsakeitsün taokoüh ngüsoüh ngo lochilotsao. Angio angtsünso hau aakih kiutsün jü ngiokhem ngüsoüh naiuso jü athoilut nouso tsülokü lean. Ngüsoüh Yihuda Anounyi nou lochinyan. Ngo ngüso hau jü among- mat oukong thumkü ngesani-au naiuso liutsa nai ngüso lomowanao khemkü noiküla.

¹⁴Lüko ngo nung tsüchhi, tiautenai nungüh mele nousoüh Ijip goumchi ainou Israel hai ngo niansantsün ep, ngüso ongko jü nian awesan tsünoikü shin.

¹⁵Nungtiphe ngo apem chiko amei- ting goumchi, memei naiuso gohtsah goh sübao ngüso hau kium nungh goumchi nai nialokü tsükhu-e ta liutsa nai noitaoko ngo athalou-e tsak shan.

¹⁶Ngo nung athalou-e shaniu, tiautenai ngüsoüh jü athoilut nouso lean, jü ngiokhem nouso lothean, naiuso Yihuda Anounyi nou lochinyan, ngüsoüh ngüso ün sotsom nouso amkhamao mongchio.

¹⁷“Lüko ngo ngüso tü atsüojin yangkiu. Ngo ngüso liutsa nai loatkü tsüwanao thatlou.

¹⁸Nungliko ngo ngüso ongko oum khaiunia nouso tü lotsüokiu: Asam paosiposoüh shantsün ngiokhem nouso lakankei; ngüso saisile tü lahoilut naiuso ngüso sotsom nousoüh asam lalochin- yanlou.

¹⁹Ngo APAOU asam Goa noin. Jü ngiokhem naiuso jü athoilut nouso angio lü-ang.

²⁰Yihuda Anounyi nung asio ajekhaiu tsak lütaiu, nungtiphe nungüh samüh shantsün athalou-e ii tsak noi-e, naiuso ngo APAOU asam Goa ta asam hau yangsan-i-e.”

²¹“Loüh nungh vetaoüh lüko ngü lochi-iu. Angio angtsün tsangkü sauhau lünou aa kiutsün jü ngiokhem ngüsoüh lothean naiuso jü athoilut nouso tsükankei. Ngüsoüh Yihuda Anounyi nou lochinyan. Ngo ngüso hau jü amongmat oukong liutsa nai yangsaniküta ngüso apem loatkü wanao khemloukü noiküla.

²²Lüko ngo nung tsüchhi, tiautenai Ijip goumchi ainou Israel hai ngo niasantsün mele nousoüh ep, nungso ongko jünian thako asutsühatkü kankü shi-e.

²³Nungtiphe ngo liutsa nai amao athalou-e tsak shan. Ngo ngüso goumchi apemai pengpuni-e ta ngiomongshing shan.

²⁴Ngo nung chhitsün tiautenai ngüsoüh jü athoilut nouso le-an, jü ngiokhem nouso lothean, Yihuda Anounyi nou lochinyan, naiuso ngüso paosiposoüh yathsüotsün sotsom nousolu amkham.”

²⁵“Nungaih ngo ngüso hau tsümeikün ngiokhem naiuso aa tsükiukün athoilut nouso kium.

²⁶Ngo ngüso chaithio tsangkü ngüso lochinyan-i, naiuso ngüso thsoyam- chong melothso nouso aloat chaithio ngüso hau thio-i. Nung ngüso hau angja kiutsün naiuso APAOU ngo noin ta hanao chhiküla.”

²⁷“Nungtiphe lo, khaiunia thso, Ngo Akhengting APAOU nou Israelhai tü ti ngioji, nung ngüso hau lüchite. Nungli ayam tsakai ngüso posoüh mongtsükiukün tsangkü ngo lochitsün noin.

²⁸Ngo ngüso hau kiuao thaloutaiutsün goumchi nai ngüso niathio. Tilai ngüsoüh king atsok naiuso pai asangnya nouso ep, nungso chikü dongko ngüsoüh aloat-chaithio kiu. Ngüsoüh chaithio jahtsün naiuso chaithio au theng kankü shitsün tsangkü ngü mongmat-i.

²⁹Ngo ngüso tü sang: Asam khutsün nung athang atsok nouso ti-in? Nungti ngüsoüh ‘Athang Atsok nouso’ ta pe nai yakü jonkü shikü noiküla.

³⁰Nungtiphe lo Ngo, Akhengting APAOU nou ngiotsün Israel hai hau lüchite: Asam posoüh sunloutsün angei noulu asamüh tiauta chhiji naiuso ngüso sotsom phiai khuji?

³¹Lonyi lüko asamüh nung paopei nousolu thioji naiuso asam thsoso in nai jahkü aloat chaithio nung sotsom haulu kiutsün tsangkü asam chija lochinyanlou-iu. Naiuso asam Israel hai jü mongyang ngeluao losaokü shiji! Ngo Akhengting APAOU Goa nou atsüoting aa noinli, ngo asam hau ngü tü titso tsüsangi-e.

³²Asamüh amao mele nouso khekkü thehaau asam mongyang noin, amao shingkhannio nouso ai kihtsün khaiuniahoi nousoüh pai naiuso lung nouso amkhamao yangji. Lüko nung tilaitso tsü-iula-e.

³³“Ngo, Akhengting APAOU nou atsüoting aa noitsünli, jü oukong chikü nou ngü mongmattsün asam chiai nok-shing-e.

³⁴Asam pengpunkü noitsün shingkhannio chikü ainou ngo asam lokamloukü shikü ngo jü oukong naiuso jü amongmat asam hau hane.

³⁵Ngo asam ‘Mele nouso singtsogoh’, nai nialoukü shiküta nungko ngo asam khasikha epekü janthat-e.

³⁶Sinai liutsa nai asam posoüh ngü wanantsünli, ngo lo asam lotsaokü wan-e,” ta Akhengting APAOU nou ngioji.

³⁷“Ngo asam mongkü thalou-e küta asam hau jü athalou-e nou da angio ang-i-e.

³⁸Ngü akhengshi- tsünso naiuso angeihoi nouso ongai kankü khuwane. Ngo ngüso lo kihtsün goumchi ainou niashi-e, lüko Israel hai goumchi ai ngüso laokü tsüya-ishi-e. Nungaih asamüh Ngo APAOU noin ta ngela-e.”

³⁹Akhengting APAOU nou ngiom, “Loto asam Israelhai apemüh asam mongchio lüchhilowan! Asam sotsom nouso tsülaokü lüyathsüo! Lüko ngo asam tü nung ngioji, nungphiaito asam sotsom nouso hau paopei chaithio nouso kiutsün tsangkü jü asio nian lochilotsaotsün laokü asamüh ngü tü angio angaolu noi-e.

⁴⁰Nungh gohthang asio king nou chiai, Israel hai ün king atsok nouso ai, asam Israel hai chikü nou ngü amkhame. Ngo asam Israel tü monglinge. Naiuso asam ün ameiting chaithio nouso, naiuso asam ün asio paopei nouso, jüdongai kankü shiao ngo yange.

⁴¹Ngo asam pengpunkü noitsün shingkhannio nouso ainou aikü kamshi-ikütünphiai, asamüh ajah chaithio kiutsün lou-e, naiuso mele nousoüh ngo asio ta eppe.

⁴²Ngo asam paosiposo hau kiuao thalou- taiutsün goumchi Israel nai asam tilai nialoukü shi-e, nungai asamüh ngo APAOU ta nge-e.

⁴³Nungaih asamüh amiam chhitsün apem naiuso asam chija titi lochinyanlo nungso chhisiyatsün thaiutha asam chija asam chinyanate.

⁴⁴Tilai ngo jü asuhat solouau chhi-e, asam Israel haiüh ngo APAOU ta nge-e, tiautenai ngo asam tü tsümeikün akausai chhisiya thamaikü tsükankei,” ta Akhengting APAOU nou ngioji.

⁴⁵APAOU ngü ko chitekü ngiom.

⁴⁶“Khaiunia thso,” “Ajepekki dongai lüthaplu. Ajepekki thako lüngio naiuso ajepekki hai liutsa thako khapiam ngio lüngio.

⁴⁷Akhengting APAOU nou ti ngioji anglu ta ajepekki liutsa hau lüchite: Athaplu! Ngo in jahji, naiuso nung in nou ni da noitsün pai aa tsüdekünai pai ee nouso apem chetheane. Nungtiüh lonyatau tsüshio-e. Nung in nou ajepekki ainou ajenapki saokü khu-e, naiuso khaiunia pungkü nou nung in nyai nou jektsün ngesane.

⁴⁸Ngüso apemüh nung in nou Ngo, APAOU nou jeklut naiuso nungh sauüh lonyatau tsüshio ta eppe.”

⁴⁹Ezekielüh ngiom, “Akhengting APAOU, nung ngü hau lachhi-i khaiunia pungkü nou ngo asaita ngio athatlu nailu chiteji ta namnamji.”