Read Khiamniungan Naga Ezekiel 21 Bible Online

Ezekiel 21 - Khiamniungan Naga bible

Ezekiel 21

¹APAOU nou ngüko chitekü ngiom,

²“Khaiunia thso,” “Yirusalem hau aphio lükiu. Khaiuniahoi nousoüh amkham athang nouso lülean. Ngo, APAOU nou lotsüotsün nung noin.

³Israel goumchi tü lüngio: Ngo asam eh noin. Ngo jüsalaiu kankeikü asam amei si tsümei wekü, apem loatkü wane.

⁴Ajenapki ainou ajepekki saokü khaiunia chikü thako ngo jüsalaiu kankei-e.

⁵Ngo, APAOU nou, jüsalaiu saisantsün khaiunia pungkü nou nge-e naiuso loto nung müjam tsülaoloshi-e.

⁶“Khaiunia thso, amongpem lopekau lümeikü lünget. Khaiunia chikü hao epikü amongkia nou lünget.

⁷Tilai ngüsoüh ni tiauta mongetji ta sange, ngiongem shiao noitsün shioko mongetji ta ngüso hau lüchite. Tilai nung shisao-e, ngüso mong ahat nou miane, ngüso pha taokü saowane, ngüso mongsong mowane, naiuso ngüso singkao ngaongao-e. Nung atao nou shiji;” ta Akhengting APAOU nou ngioji.

⁸APAOU nou ngü tü ngiom,

⁹“Khaiunia thso, e-po nouso ngio lüchite. Ngo APAOU nou ti ngioji, nung khaiuniahoi nouso hau lüchite: Salaiu tsak, loüh salaiu tsak nung ahou monkü shimoniu naiuso meikü shetchu-iu.

¹⁰Nung aloat au thaiutha shimoniu, nung ahsalap khekkü laplapao shetchu-iu. Nungko monglingekü noishiao tsüshio-e, tititenai jü khaiuniasoüh alotsüotsün naiuso alohattsün apem tsüwesan.

¹¹Nung aloat au khemloukü taiuao salaiu nou shetchukü taim. Aloattsün salaiu nou phamong nai kiuao thaiutha shimonkü taim.

¹²Mongsaiukü lüwe, khaiunia thso, tiautenai nung salaiu jü khaiunia naiuso Israel hai ahei apem thaiutha noin. Ngüso jü khaiunia apoi nouso chikü ko aikü loate. Nungtiphe amongkia nou akongai lülalou!

¹³Ngo jü khaiuniaso theluji, naiuso ngüso mongphokleau nan naito, nungso chikü ngüso chiai thawao-e.”

¹⁴“Nungtiphe lo, khaiunia thso, e-po nouso ngio lüchite. Apha lüpate, naiuso salaiu nou lühe-e. Nung salaiu aloattsün, alekkatitsün, naiuso achaoattsün salaiu tsak noin.

¹⁵Nungüh jü khaiuniaso mongsong mowan-i naiuso ngaongao-iji. Salaiu ahsalapli laplapkü noitsün nou ngo ngüso noknio lohatji.

¹⁶Ni amonting salaiu, ni uai naiuso tsatai lühe! Tiai ngüso phokle-e nungai lühe!

¹⁷Ngo lüko jüpha nouso pate-e, naiuso jü amongmat nou laolou-e, ta APAOU nou ngioji.”

¹⁸APAOU nou ngüko chitekü ngiom.

¹⁹“Khaiunia thso,” “Babilon hai nokpao apa salaiu lokkü shiao noitsün yam nime nou tü lü-ii taiu. Nung yam nemtso nou shingkhannio tsak ainoulu tsalouau noin. Naiuso nung yam khutsün nai yamshi-i tsak lütaiukiu.

²⁰Nung yam tsak nou Babilon hai nokpao hau Ammon hai nokpao Rabba nai khutsün hane, naiuso amao yam tsak nou Yihuda nai noknio mongkü pejeikü taiutsün Yirusalem ai khutsün hane.

²¹Babilon hai nokpao nung yamshi-i shantaiutsün dongko tsakü, sübao yam tü khu-e nung ngelouau apaüh uokopchon nouso tü saiukeiji; apa ün sotsom nouso tü sangluji; naiuso thainian aloat chaithio kiutaiutsün asan nou tü theluji.

²²Nungtiphe lo! apa pha uai nou ‘Yirusalem’ tü chulutkü i taiutsün tü helouji! Nungüh apatü khaai khukü kheam alaiu tsak kikü taiuao, ehkhong khongau, koukhan nouso thako nung kheam alaiu nouso kihtaiuao, paisilung yakau, naiuso goh thaiuwankü ehü thang shanao khu-i.

²³Tiautenai ngüso jetko ngiomong- shinge taiutsün shioko Yirusalem haiüh nungtü tsümonglame. Lüko nung to ngüso angei yangsan-iau naiuso ngüso shiolouwanau atsang- shei kiutsün noin.

²⁴Nungti Ngo, Akhengting APAOU nou ngioji, Asam angei nouso achiai sungiu. Asam titi aphio nai noin nung khaiunia pungkü nou ngeji. Asamüh asam chhisiya alum ko asam angei hanji. Asamüh phiowankü noin, naiuso ngo ehoi nouso phamongai asam kiuwane.

²⁵“Ni akausai, tsüsiokün Israel hai nokpao, athaiutha athon mikhem ajekhaiu nou shikü noin;

²⁶ta Ngo, Akhengting APAOU nou ngioji. Anokpao kandio naiuso akandio lüngiowan. Yanküshitsün titso tsüthawaoshi-e. Tsosilu nouso oukong nai aloksan! Sauhai oukong nai noin ngüso lonyap!

²⁷Alothe, alothe! Ah, ngo noknio nou lotheane. Ngo chosantsün tsak nou noknio lotheau moshikün lektso nung tsüthawao-e. Lüko ngo nung apa hau lethiowane.”

²⁸“Khaiunia thso, e-po ngio nou lüchite. Israelhai lotsaotsün Ammonhai tü Ngo Akhengting APAOU nou ngiotsün lüwelut. Ngüso tü nung lüngio: ‘Aloat au thaiutha salaiu tsak khemkü noin; Nung laplapkü shetchukü taim.

²⁹Asamüh eptsün atsangshei nung atsüotsüde, naiuso asamüh shanluttsün nung yaang. Asam akausai naiuso tsümeikün, athon mikhem ajekhaiu, nungh asam ajekhaiu shiji. Nung salaiu asam sang da thanlutau noin.

³⁰“‘Salaiu nou lüsuplou! Ni saitsün athang nai naiuso ni chet- tsün goumchi nai ngo ami kheme.

³¹Tilai ngo jü amongmat innyaili asam sa da kheplute asamüh ngü mongmattsün ngesane. Naiuso ngo asam alothean ao amonting nouso phamongai lethiowane.

³²Asam in nou mowane. Asam she asam shing- khannio nailu khiamane, naiuso asam tilaitso sauüh tsüyangsanshi- e.’” Ta APAOU nou ngioji.