Read Khiamniungan Naga Ezekiel 23 Bible Online

Ezekiel 23 - Khiamniungan Naga bible

Ezekiel 23

²“Khaiunia thso,” “atao tsak ko nuosinio nime noiküla.

³Tilai ngüne methso taoko Ijip goumchi ai kihküla, ngüne asangting aakih lotheanlokü meshen shesinyih jankü ajisiwop chhiau iula.

⁴Ashethso nou nian Ohola (apa Samaria liko), naiuso anio nou nian Oholiba (apa Yirusalem liko.) Ngo ngüne nemthso tsamsigoh yang, naiuso ngüneüh ngü hau thsoso chetkiu.

⁵Naiuso Ohola, jü tsammongnyiu noi lüko, apa ajisiwop tsülao Asiria hai apa ko tsüojine- tsünso hau apa shesinyih achinek nou miankü kiuküla.

⁶Ngüso nepat amei nou chiokü sheithotsün süpaihoi, memei naiuso nokpao nokshing yamai asonghoi, ngüso apem mokthso chiai noikü ehli montsün oum pühehoi noin.

⁷Apa Asiria hai asonghoi apem thaiutha ajisiwop chhitsün noiküla, naiuso apa shesinyih achinek nou meshen chija lochinyanlokü Asiria hai sotsom tü amkhamtsün yamai khuwan.

⁸Ijip nai noitaoko apaüh ajisiwop chhikü shitsün nung tsülaokü chhiji, nungüh apa asangting nou mowan. Apa menyiuthso tao ai yakü apako melohai kamhakü shin küta apa meshen shesinyih jankü ajisiwop kankeitsün tsak ta wesan.

⁹Nung- tiphe ngo apa, apaüh thatü tsüojinkü noitsün Asiria hai phamongai lethiowan.

¹⁰Ngüsoüh apa sheitho nouso khuowankiu, apa thso melothso si menyiuthso nouso thalouwan, küta apa lüko ngüso ko aikü salaiu nou loatkü wan. Menyiuhoi apem ainou apa akuo thawaotsün thaiutha kaokü chiteji.

¹¹“Apa nuo Oholibaüh nung eplüko, Oholaüh chhikü shitsün ajisiwop chiai apa tekkü tsaokü, iulashi.

¹²Apa lüko sheitho tsaklu thokü, mokthso chiai noikü süpai asonghoi naiuso pühemei oumhoi chikü naiuso Asiria hai memei naiuso asonghoi nouso apatü lüko chinekkü noiküla.

¹³Ngo nungko anio nouko naito anuo noubao phopkü tsaokü ajisiwop noitsün ep.

¹⁴“Apa ajisiwop chhi nai tekkü tsaokü iula. Babilon hai asonghoi nouso sotsom dioai nou tü aleng aseng nou tsomkü sailuttaiutsün, ngüso om nai omkhi nouso, naiuso khaiu nai alengyam kandio nouso tü apa chinekkü iula.

¹⁵

¹⁶Apaüh nung sotsom nouso epkü thunkü apa tü achinek nou shi, küta apaüh Babilon nai asonghoi nouso dongai ngiongem kantsünso hong.

¹⁷Naiuso Babilon hai apa ko ajisiwop chhiau shin. Ngüsoüh apa thatü thsüokü kankeikü lochinyan, aphiteng naito apa ngüso tü chinyankü iula.

¹⁸Apa ajisiwop chhitsün nung apin khako ngekü iula naiuso khaiunia pungkü nou apa ajisiwop chhitsün tsak ta ngela. Ngo apa nio tü chinyantsünli apa tü lüko thsüokü chinyankü iula.

¹⁹Apa menyiuthso tsaküh chhitsün khekkü Ijip nai ajisiwop chhitsün tsak noitao, tü tekkü phopshikü ajisiwop chhitsün tsak iula.

²⁰Gado tsüdekünai mokthso nouso ajisiwop thaiutha achinek nou miankü noitsünli, ajisiwop chhi thaiuthalu apa achinek nou miankü noiküla.”

²¹(Oholiba, khaiuniahoi nousoüh anyaolak nai mekü, ni nou asangting mowantsünli, ni Ijip goumchi nai menyiuthso tsak noitaoko ni ajisiwop phiotsün loüh laoshikü chhishiao aiuji.)

²²“Nungtiphe, Oholiba, nitü Ngo, Akhengting APAOU nou nung ngioji. Ni tsüojin netsünsoko ni oukiatkü noin, lüko ngo ngüso niko mongmati-e, naiuso ngüso ni lemkü niakame.

²³Ngo Babilon hai naiuso Kaldia hai, Pekod, Shoa, naiuso Koa ainou khaiuniahoi, naiuso Asiria hai apem nialoukü shi-e. Ngo pühemei asonghoi naiuso nokshing nai atenghoi naiuso mokthso chiai noikü ehlitsün asonghoi apem niakame.

²⁴Ngüsoüh ajenapki ainou ehli tsamkei naiuso ahok püle potsün tsamkei süpaihoi asong tsak hakü kankü shikü ni kome. Shikhao si kandio nou lokkü ngüsoüh ni lemlowane. Ngo ni ngüso phamongai lethio-e, küta ngüsoüh ni ngüso ngiokhem tsangkü mi kheme.

²⁵Tiautenai ngo nitü mongmatji, ngo ngüso amongmat nou ni kankei-e. Ngüsoüh angan naiuso anoukhan lamanne küta athsoso loatkü wane. Ah, ngüsoüh asam thso melothso naiuso menyiuthso nouso asam ainou lou-e naiuso ngüso in nai jekkat-e.

²⁶Ngüsoüh aneshe chipekkiu-e naiuso asam ün chaiou nouso lowane.

²⁷Ngo ni nou shesinyih achinek nou lolaowane naiuso nungti ni Ijip nai yakü achinek sunhekü shitsün lolaowane. Ni loto sotsom titso tsüthapshi-e tsüdekünai Ijip thaiutha tsüyangsan shi-e.”

²⁸Akhengting APAOU nou ngiotsün nung noin: “Ngo ni, ni chinyantsün khaiunia naiuso nitü niovei kiatsün hoiso hau lethiowane.

²⁹Naiuso ngüsoüh ni chinyan shioko, ngüsoüh ni chhisantaiutsün alum kankü khuwane, küta ni tsosa ajisiwop chhitsün tsak khekkü leane. Ni nou shesinyih achinek naiuso ajisiwop chhitsün

³⁰tsangkü nung ni da shisaom. Ni mele nouso thaiutha ajisiwop chhitsün naiuso ngüso ün sotsom nousoüh ni lochinyankü noiküla.

³¹Ni anuo saisile tü hoilutphe, nungti ngo ni hau lüko nunglu angja thengkam shiu ao kiuji.”

³²Akhengting APAOU nou ngioji, “Ni anuo thengkam ainou shiu-e; nung songkü naiuso aokü noin. Khaiunia chikü nou ni lochi lotsao-e; thengkam nou miankü noin.

³³Anuo Samaria ün thengkam, ahat naiuso alotheantsün thengkam, nou ni mongkiakü naiuso tukkatkü taiuwan-e.

³⁴Ni shiu-e naiuso tsangkü khukü wai-ane, nungaih ni anelang nouso tü thio-e küta anyaolak chipai-e ta Ngo, Akhengting APAOU nou ngioji.”

³⁵Lo, Akhengting APAOU nou ngiotsün nung noin: “Tiautenai ni ngo be-anphe naiuso ngü tü aphi sheilutphe, ni achinek naiuso ajisiwop chhi thaiutha ko angja-e.”

³⁶APAOU nou ngü tü ngiom, “Khaiunia thso, ni Ohola naiuso Oholiba netü mikhem kiuao khemkü noimo? Ngüso achinyan chhi thaiutha ngüso hau aphio lükiu.

³⁷Ngüsoüh tsütsamtsütsüo naiuso shelopengtsün chhianiu sotsom nousoko tsütsamtsütsüo kankei naiuso ngo ngüso hau chetkiutsün thsoso she lopeng-iu. Ngüsoüh jü thsoso sotsom nouso hau aloat chaithio kiuwan.

³⁸Naiuso nunglu ngüsoüh tsüchhi. Lüko ngo shankü taiutsün ngüsoüh jü Amkham Tsam lochinyaniu naiuso Yihuda Anounyi nou lotheaniu.

³⁹Nung ajekhaiuko ngüsoüh sotsom nouso hau jü thsoso loatkü chaithio thiowan, ngüso jü Amkham Tsamai shiküta nung lochinyankiu!

⁴⁰“Loüh loüh ta ngüneüh laiukü ainou khaiuniahoi tü jonau hongpeng, naiuso khaiunia nouso shin. Nung nuosinio nime neüh khiampeng küta niovei nai aleng lolut naiuso chaiou sheitho tholou.

⁴¹Naiuso ngüso aleng amei then tsakko moknoikü, ngüso khako ameiting jengtsaiu sapokkü puo tsak taiu, nungh ngo ngüso hau kiutaiutsün angannyamtsün naiuso olip-khiam lüko mongthiohakü noiküla.

⁴²Nungko khaiunia piakü alonyai-e sang ngemli lula, naiuso khaiuniahoi tsak liutsa ainou niajikankü noiküla. Ngüsoüh nung menyiuhoi nouso pha nai lak nouso ngiothio naiuso ngüso khaio ai aleng amei kandio nouso kelut.

⁴³Naiuso ngo jü mongai yangkü ngiom, ngüsoüh menyiuhoi tsütsüotsütsam chhi nou mongngei lüko ngüsoüh ajisiwop chhiao mongchiukü kankeiküla.

⁴⁴Ngüso nung ajisiwop chhitsünso dongai tsülaokü shiji. Ngüso nung ajisiwop menyiu Ohola naiuso Oholiba ne dongai laokü khu.

⁴⁵Asio khaiuniahoi nousoüh ngüso da tsütsamtsütsüo naiuso ngüso pha da she lepkü noin ta wanne.”

⁴⁶Akhengting APAOU nou ngiotsün nung noin: “ngüso lotheau naiuso kauat au hoi asong tsak nialoukü ashi.

⁴⁷Nung hoi asong nouso hau ngüso tü salaiu naiuso pha nou pokü lung nou lüyak; naiuso ngüso thsoso loatküta ngüso tsam lüjekthiowan-i.

⁴⁸Ngüneüh chhikü shitsün ajisiwop tsüchhiau menyiuhoi tü alotsüokiuao ngo nung goumchi thapekkü ajisiwop chhitsün tsüchhi-i-e.

⁴⁹Naiuso anuosinio aje ajisiwop chhitsün thaiutha naiuso sotsom nouso amkhamtsün angei thaiutha angja kiu-e. Nungaih ni Ngo, Akhengting APAOU noin ta nge-e.”