Read Khiamniungan Naga Ezekiel 25 Bible Online

Ezekiel 25 - Khiamniungan Naga bible

Ezekiel 25

¹APAOU nou ngüko chitekü ngiom,

²“Khaiunia thso,” “Ammonhai shingkhannio thako khapiam ngio lüngio.

³Ngo, Akhengting APAOU nou ti ngioji nung tü anglu ta ngüso tü lüngio: Jü Amkham Tsam lochinyantsün tü, Israel hai goumchi lotheantsün tü, naiuso Yihuda hai khaiunia thaloukü khuwantsün tü thapau ni mong- lingatkü noiküla.

⁴Ni monglingtsün shioko, ajepek ainou mele nouso hau ngo ni shiolou-i-e. Ngüsoüh agoumchi ko ngüso saothang shankü nungko kihlouwane. Ngüsoüh ni shiuao noi- tsün jangnyao naiuso ni heau noitsün shep heane.

⁵Ngo Rabba noknio ut hoi taiutsün athang tsak hau, naiuso Ammon hai shingkhannio athum onnemok hoi taiutsün athang tsak hau ta iula-i-e, nungtiphe asamüh Ngo, APAOU noin ta nge-e.”

⁶“Akhengting APAOU nou ngiotsün nung noin: Ni apha patdekü amongling nou hane. Ni Israel hai goumchi lochilotsao.

⁷Nung chhi nou shioko, ni ja-atkü naiuso kauatkü theau ngo ni amao mele nouso phamongai lethiowane. Ni mele tsak ta tsünoishiao tsüdekünai ni atengkhaio shingkhannio tsak ta tsütaiuao ni moisemkü lomowane. Nungai ni ngo APAOU nou noin ta nge-e.”

⁸Akhengting APAOU nou ngiom, “Moabüh Yihuda lüko amao mele nouso khekküluphe, ta ngio nou shioko,

⁹ngo Moab goumchi elung jimkiutsün noknio nouso ameiting noknio- Bet Jeshimot, Baal Meon, naiuso Kiriathaim so saokü mongthiokü komheani-e.

¹⁰Ngo, Ammon ko aikü, ajepek nai kihtsün mele nouso hau Moab komheani-e; nungtiphe loto Moab nung mele tsak ta tsünoishi-e.

¹¹Ngo Moab khako mi kheme, naiuso ngüsoüh Ngo APAOU nou noin ta nge-e.”

¹²Akhengting APAOU nou ngiom, “Edom haiüh Yihuda hai ta thatü thsüokü phaosanphe, nung phaosan nou Edom chiai asaita aphio nou kankü shin.

¹³Nungtiphe lo, ngo Edom hai thako mi kheme ta welutji, nungko noitsün khaiunia naiuso thainian apem loatkü wane. Ngo nung Teman noknio ainou Dedan noknio saokü aodangkü iula-i-e naiuso ehlithang nai khaiuniahoi nouso loatkü wane.

¹⁴Jü khaiunia Israel haiüh jü thaiutha Edom hai ta phaosane, naiuso ngüsoüh Edomhaiüh jü mongkia mongthe ngela-i-e. Edom haiüh ti ayang noikü ngo phaosan nung nge-e,” ta Akhengting APAOU nou ngioji.

¹⁵Akhengting APAOU nou ngiom, “Filistia haiüh ngüso vetao ngoikü ngüso niovei kia-etsün nou athsüoting phao sankiukü kankeiphe,

¹⁶nungti ngo Filistia hai ta pha pokü ngüso moisemkü lomowane ta welutji. Ngo nung Filistia hai Tsamei nai kihtsünso apem lomo-e.

¹⁷Ngo ngüso thatü thsüokü lohatkü naiuso thomkü ngüso thako phaosane. Ngüsoüh jü amongmat nge-e. Nungaih ngüsoüh Ngo APAOU nou noin ta nge-e.”