Read Khiamniungan Naga Ezekiel 26 Bible Online

Ezekiel 26 - Khiamniungan Naga bible

Ezekiel 26

¹Sam khuthiokü noitsün pon chikü tsak, chongting alei ajekhaiu tsak nouko nai, APAOU nou ngüko chitekü ngiom.

²“Khaiunia thso,” “Tair hai noknio nai noitsün khaiuniahoi nousoüh uoluttsün nung noin. ‘Yirusalem paithiowaniu! ta ngüsoüh ngioji. Apa chaile oule oukong khuwaniu! Apa loto samko tsaotsün tsünoishi-e!’”

³“Nungtiphe lo, Ngo, Akhengting APAOU nou ngiotsün nung noin: Tair hai noknio, Ngo, a-eh noin. Ngo ni komau mele piakü niakü shi-e, naiuso ngüso khiamnok nai khiampek khekkü shi-e.

⁴Ngüsoüh anoknio lungpe nouso lotheane naiuso ni nou ehüpuo nouso laopengane. Nungaih ngo pukhao nouso apem kaiane küta lungje leane.

⁵Ngouphek hoi nousoüh ngüso nyao khiamnok sai nai noitsün lung chiai yamwailo-e, ta Ngo, Akhengting APAOU nou ngioji.

⁶Mele nousoüh Tair kamheane, naiuso ngüso salaiuüh nung goh nai naiuso noksong nouso ai kihtsün khaiuniahoi nouso loatkü wane. Nungaih Tair haiüh Ngo APAOU nou noin ta nge-e.”

⁷Akhengting APAOU nou ngioji, “Tair komao Babilon hai nokpao Nebukadnezar apem ongko asongting nokpao nou ngo nialoukü shi-e. Apa ajenapki ainou mokthso nouso, ehli tsamkei nouso naiuso mokthso chiai noikü ehlitsün süpaihoi nouso, naiuso süpaihoi asongting tsak hakü shi-e.

⁸Nung taoko aketaiutsünso noksong nouso ai kihtsünso ehli nai loatkü wane. Ehoi nousoüh khan thaiu-e, puo nouso saisane, naiuso ni ponai solouau pe nou deikü pesane.

⁹Ngüsoüh ni nou pe lotheao kheam alaiuting nouso kankü shikü thio-e naiuso ni nou ehüpuo nouso son pailai nou thiopekke.

¹⁰Ngüso ün mokthso nousoüh lopengtsün pukhao nou ni loijei-e. Ngüso alotheantaiu nou noknio bekhan nouso yankü khunai ngüso mokthsoüh tenkeitsün tsamkei, ehli tsamkei nouso ngemüh pe noutü saiusaiu-e.

¹¹Ngüso mokthso chiai noitsün süpaihoi ni nou yamkheng nouso ai nappe, küta ngüso salaiuüh akhaiuniaso loatkü wane. Ni nou akongting kheam nouso goh ai yakkane.

¹²A-memei jengtsaiu tsangkü eh nouso tsade naiuso ni nou chaile jengtsaiu nouso aplowane. Ngüsoüh alungpe nouso lotheane naiuso tsam ameiting nouso thionekü wane. Ngüsoüh lung nouso pai nouso naiuso lungtso nouso kankü khukü khiamnok nai yakthiowane.

¹³A-jihang ngo lolaowane, naiuso apoipoiüh matkü hangtsün jihang tsühangshi-e.

¹⁴Ngouphek hoi nousoüh ngüso nyao yamwaiao shiokü lungje wan-e. Nung noknio tilaitso tsülashanshi-e ta Ngo, Akhengting APAOU nou ngioji.”

¹⁵Tair hai noknio tü Akhengting APAOU nou ngioau ngio nung noin: “Tilai ni shiolou-e, khiam sai nai kihtsün khaiuniahoi chaoattsün ngem lulanai khaiunia nouso lekkate.

¹⁶Khiamnok sai nai noitsün nokpao nouso chikü ngüso ün phalaiu phakhut naiuso ewoi nou chiolutkü thetsün neshe nouso ngiowankü ngaongaokü gohai saowane. Ni nou akuo epküta ngüso angaongao ainou laoloau tsüshiokü thatü lekkat-e.

¹⁷Ngüsoüh athaiutha nung apungeantsün jih hange: Niansong noknio mowaniu! Apa ün kheng nouso khiamnok nou kankü khuwan. Nung noknio nousoüh khiamnok chiai nokshingkü noiküla. Naiuso haiusai nai kihtsünso apem lekkatiu.

¹⁸Lo, ni loiantsün ajekhaiu ko nai, khiamjet goh nouso ngaongaoji. Naiuso nung lotheantsün epnai khiamjet khaiuniahoi nouso lekkat.”

¹⁹Akhengting APAOU nou ngioji: “Ngo ni sautso kih-au tsüshiokü alothean noknio nai aodangkü wanane. Ngo ni khiamnok a-auoting ainou khiam nousoüh limpok-e.

²⁰Pe taoko nai kihtsün ean hai goumchi nai kihtsün khaiuniahoi nousoko ha-iau ngo ni hongthiowane. Ean haiko athontsüyangkün alothe goumchi goh kheiai ngo ni taiuwane. Athon nai ni nung aa-hai goumchi nai kihashi au tilaitso athang tsüepshi-e.

²¹Ngo ni alekkat ao alat tsak iula-i-e, nungh ni athonan noi-e. Khaiuniahoi nousoüh ni tü yame, lüko ni tilaitso tsüepshi-e.” Ta Akhengting APAOU nou ngioji.