Read Khiamniungan Naga Ezekiel 27 Bible Online

Ezekiel 27 - Khiamniungan Naga bible

Ezekiel 27

¹APAOU nou ngü tü ngiom,

²“Khaiunia thso, Tair thaiutha apungeantsün jih tsak lühang.

³Nung noknio khiamnok sai nouko noikü khiamnok sai nai kihtsün khaiunia pungkü ko chaile leji. Akhengting APAOU nou ti ngioji nung apa hau lüchite:” “Tair, nai alengmei thaiutha ni bülomji.

⁴Khiamnok nung atsam noin. Ni shantsünsoüh ni kheng aleng ameiting tsak khekkü shan.

⁵Ni lahsanao ngüsoüh Hermon King ainou Fir pai nouso khiopun ao shan. Naiuso athaiutha kheng kheam shanao Lebanon ainou cedar pai kankei.

⁶Ngüsoüh khengshi pai nouso shanao Bashan ainou lampai nouso kankei; Ngüsoüh khengtham nai thioau Cyprus ainou tson-pai nou shan. Naiuso shenpok hou thiokü puo shan.

⁷Akheng niakei ao Ijip ainou ashethop ne nou chiolutkü shantsün, nungüh laiukü ai yakü iloutsün noiküla. Ni nou kheng tsamkhaio Cyprus khiamjet ainou ashethop ne ameiting nou shantsün noiküla.

⁸Akheng niakeitsünso Sidon naiuso Arvad noknio nouso ainou khaiuniahoi noiküla. Kheng shitsünso ni nou amonting khaiunia nouso noiküla.

⁹Kheng saisantsünso Byblos (Gebal) ainou waimon khaiuniahoi noiküla khiamnok nai kheng akhu ashi pungkü ainou ashitsünsoüh ni nou chaijan tsam nai chaile oule shan.

¹⁰“Persia, Lydia, naiuso Libya ainou süpaihoi nousoüh ni nou süpaihoi chhisiya yathsüo. Ngüsoüh ngüso shikhao naiuso kandio nouso ni nou süpaihoi kihtsün tsamai taiu. Athaiutha ajinka kankü shitsün khaiunia nouso ngüso noin.

¹¹Arvad ainou süpaihoi nousoüh alungpe tü hü, naiuso Gamad ainou khaiuniahoi nousoüh atsamthong nouso tü hükü noi. Ngüsoüh ngüso shikhao alungpe tü phanlut. Ni aleng meikü iula-itsün khaiunia nouso ngüso noin.”

¹²“Ni Spain nai chaile oule chhi küta achai mai jengtsaiu piakü eptsün shioko tangkason, son, dun, naiuso son shhi tuhlou.

¹³Ni Greece, Tubal, naiuso Meshek nai achaile oule yangtsün jengtsaiu nung sua hai naiuso daoson jengtsaiu nouso thaiutha chaile.

¹⁴Ni ajengtsaiu atentsün mokthso, ehli mokthso naiuso gado nouso Togarma ainou thaiutha chaile.

¹⁵Ni Rhodehai khaiunia ko chaile; haiusai nai kihtsün khaiuniahoi nousoüh ni hau ajengtsaiu liko shenpok hou naiuso ebony pai li-ekiu.

¹⁶Siria haiüh achai naiuso ni losantsün jengtsaiu nouso piakü tuhlou. Ngüsoüh emeral lung ashethop ne sotsom chioluttsün ne, anyaching ne, Koral naiuso rubi lung nou chaile nou le.

¹⁷Yihuda naiuso Israelüh ni ko chaile, ngüsoüh niko wheat tso, liukhiam, olip-khiam, naiuso alumeiao thetsün mose tsangkü chaile.

¹⁸Damaska haiüh achaisiou naiuso ajengtsaiu tuh, nungso liko ngüso hau Helbon ainou theng, naiuso Shar ainou emok kiu. Ngüsoüh ajengtsaiu thaiutha son naiuso alumei ao thetsün mouse kium.

²⁰Dedan haiüh ni nou jengtsaiu liko sangai khitsün nepat chaile.

²¹Arab hai naiuso Kedar hai nokpao nousoüh ni ko onnemok, onnemok apong, naiuso won nouso chaile.

²²Sheba si Rama hai chaile nousoüh ni ün jengtsaiu liko chaiou, chaiou lakkeng, naiuso angannyam- tsün ameiting chaile.

²³Haran Kanneh, naiuso Eden noknio nouso, Sheba hai chaile oule hoi, Ashur naiuso Kilmad-noknio nouso chikü nou niko chaile.

²⁴Ngüsoüh ni hau neshe apia mai, ashethop neshe, achioluttsün neshe, sham aleng amei nouso, naiuso aochan auo nouso jankiu.”

²⁵Ni chailetsün jengtsaiu nouso jengtsaiu kantsün kheng asongting nousoüh kan. “Ni khiamnok nai thsa alethsang nou meankü noitsün kheng asong tsak khekkü noin.

²⁶Tilai ni nou khengshi khaiunia nousoüh ni khiamnok nai shiloukü khu, goh ainou laikü khukü khiamnok awemting nouko nai shingngan ahsheih nou ni lotheankiu.

²⁷Tilai akheng khiamnok awemting nai lothean! Ni chailesantsün jengtsaiu apem, Kheng mong nai ashihoi naiuso ahoi nouso, akheng shansantsün waimonhoi naiuso chaile oule hoi, kheng mongai noitsün süpaihoi apem khiamnok nai mowan.

²⁸Kheng niakeitsünso sangh asong nou wetsün, alangtha nou haiusai nai shin.

²⁹“Lo, nung kheng pungkü nou lean, naiuso ashihoi chikü haiusai nai khuwan.

³⁰Ngüso khaio ai pu tsomlutkü loh nai chinkü ngüso apem athaiutha thsüokü mongsaiu.

³¹Ngüsoüh ngüso khaiu athaiutha eiuwan naiuso nethe nou tenlou. Ngüsoüh athaiutha mongkiakü thsüokü shap.

³²Khiamnok nai angem tsüngemkü iulawantsünli ‘Tair ko sau welu-e ao shio-e? ta ngüsoüh athaiutha apungeantsün jih hangkü we-e.

³³Tilai ni chailetsün khiamnok ainou khu, ni mele pungkü nou potsün thapemkiu. Ajengtsaiu piakü naiuso ni chaile oule nou nokpao nouso memei iula-i.

³⁴Lo ni khiamnok kheiai nappan; ni khiamnok athanting nai limthiowan. Ajengtsaiu naiuso athaiutha chhikiutsünso chikü niko aikü khiamnok nai mowan.’

³⁵“Ni nou akuo epküta haiusai nai kihtsünso apem ngawan. Ngüso ün nokpaohoi lüko lekkat, naiuso ngüso athapao ayangelat nou miankü noin.

³⁶Ni khuwanphe khuwaniu, asaita thaiutha khuwaniu, naiuso chailehoi goumchi apem ainou lekkat, ngüso lüko ni nou akuo haoson ephakü hatate.”