Read Khiamniungan Naga Ezekiel 28 Bible Online

Ezekiel 28 - Khiamniungan Naga bible

Ezekiel 28

¹APAOU nou ngü ko chitekü ngiom,

²“Khaiunia thso,” “Ngo, Akhengting APAOU nou Tair hai nokpao tü ngioau noitsün nung apa hau lüchite: Ni abülom nou putsan, naiuso ni ngioji, ni goa tsak noin. Khiamnok nou lemjeikü, nokpao noikham nai ngo moknoi ta ni ngioji. Ni, goa tsak ta tamdeau shiom, lüko goa tsüde, ni eantsün tsak noin, goa tsüde.

³Ni ainou ti tsangpokkü taiuao tsüshio, ni Daniel chiai ange amon noin ta ni yangji.

⁴A mongyangüh naiuso ni ngelatsün nou ajengtsaiu chaiou lakkeng naiuso tangkason kankü shikü ni memei iula-i.

⁵Ni achaile kausaikü shan- küta alesan tsülaokü shi-iji, Ajengtsaiu da ni titi bülomkü noin!”

⁶“Nungtiphe lo Ngo, Akhengting APAOU nou nung ngioji: Tiautenai ni goa tsakli angelatsün noin ta yangphe.

⁷Ngo, ni komheau atsüo- jinyang tsülepkün eh kankü shi-e. Ngüsoüh ni ange amon tsangkü jengtsaiu thaloutsün alengmei chhi- siya nouso apem lotheane.

⁸Ngüsoüh ni loat-e küta etam khan akheiting nai, hongane.

⁹Tilai ngüso ni loatau shi-e, nungtao saokü ni goa tsak ta ngio-e süne? Tilai ni ashe lopengtsünso phete-e, ni lüko goa tsüdekü eantsün khaiunia tsak iula-e.

¹⁰Ni goa tsüngekün gohmao khaiunia nouso phamongai jii tsak khekkü ean, ta Ngo Akhengting APAOU nou ngiowaniu.”

¹¹APAOU nou ngü ko loüh chitekü ngiom.

¹²“Khaiunia thso,” “Tair hai nokpao akuo shiao taiukü noitsün thaiutha lümongkia. Akhengting APAOU nou ti ngioji apa hau lüchite: Atao tsak ko ni thapemkü noitsün athat tsak noiküla!

¹³Ni Goa ün aimong Eden nai kihkü, Chaiou lung nouso: Rubi naiuso daimon, topaz, beryl, karnelian, jasper, safir, emeral, naiuso garnet nousoüh thojeikü noiküla. Ni chaiou lakkeng taosilak nouso taiuküla. Ni shantsün ajekhaiu nai, nungso athaiutha shan.

¹⁴Ni tü ehü ao ngo nungko ahatau lümeikün aünhong tsak taiukiu. Ni jü asio king nai kih naiuso outsün chaiou lung nouso ongko tsakei.

¹⁵Ni tsümeikü chhiau moyalokün lektso to ni shantsün ajekhaiu ainou asaisile thakü noiküla.

¹⁶Ni chaile oule nai tsükengtingkü noiküla, naiuso nungüh ni alothe naiuso angei nai nialoukü khuwan. Nungtiphe ngo ni jü asio king ainou khuwanao kom, naiuso honghoi sauüh ni hüjeikü noiküla apaüh ni chaiou lung outsün ainou koman.

¹⁷Ni pühemei nou bülom-i, naiuso ni nou niansongüh ni mainga haili chhisiyakü khu-i. Nungshioko ngo ni goh ai thsüokü thoi-i-an küta ni amaohai nokpao nouso thaiutha alat au le-an.

¹⁸Ni nung chaile oule tsümeikün chhiphe ni nou amkham thang nouso alothe nai noin. Nungtiphe ngo noknio noutü in jeklut küta nung jekthiowan. Sauhaiüh ni tü thapkü noiküla ngüso apemüh ni lou au iulakü epji.

¹⁹Ni mowaniu, asaita hau mowaniu, naiuso ni lekkatkü noin ta ngelatsün mele apemüh, ngüsoüh lüko ni nou akuo ephakü hatate.”

²⁰APAOU nou ngü tü ngiom,

²¹“Khaiunia thso, Sidonhai noknio thako khapiam ngio lüngio.

²²Nung khaiunia nouso tü Akhengting APAOU nou ngiotsün ngüso hau lüchite: Sidon, ngo a-eh noin; ngo ni tü ti chhiji, nung tsangkü khaiuniahoi nousoüh ngü lomsane. Tilai ngo niko kihtsünso angja kiutsün tsangkü ngo ti asio Goa noin ta hane, ngüsoüh ngo APAOU ta nge-e.

²³Ngo adongai imkia honge naiuso asonkeng nouso she nou miane. Ni tü yampungkü nai eh po-e, naiuso akhaiuniaso loatkü wane. Nungaih ni ngo APAOU noin ta nge-e.”

²⁴APAOU nou ngiom, “Israel lemkü noitsün mele nouso tsaktso tsao naiuso akhojeitsün tilaitso tsünoishi- e. Naiuso ngüsoüh Ngo Akhengting APAOU nou noin ta nge-e.”

²⁵Akhengting APAOU nou ngioji, “Ngo pengpun-ikü noitsün mele nouso ainou ngo Israel müjam laokü nialoukü shi-e, nungaih mele apem nou Ngo asio ta nge-e. Israel hai, ngo jü ayathsüotsün Yakob hau kiutsün ngüso tengkam goumchi nai kih-e.

²⁶Ngüso nung goumchi nai aaloukü kih-e. Ngüsoüh tsam nouso lahshane naiuso sainaoshep eiu nouso ah-e. Ngo ngüso chenpaso sauhaiüh ngüso lochi lotsaoji nungso hau angja kiu-e, naiuso Israel to aaloukü noi-e. Nungaih ngüsoüh Ngo APAOU ngüso Goa noin ta nge-e.”