Read Khiamniungan Naga Ezekiel 29 Bible Online

Ezekiel 29 - Khiamniungan Naga bible

Ezekiel 29

¹Sam thaloukü khuwantsün pon che alei che nou da chekü nime nyi nouko nai, APAOU nou ngüko chitekü ngiom.

²“Khaiunia thso,” “Ijip hai nokpao thako khapiam ngio lüngio. Apa naiuso Ijip hai goumchi apem tü mikhem kiu-e ta apa hau lüchite.

³Akhengting APAOU nou Ijip hai nokpao tü ti ngioji nung lüchite: haiunai saitsün ni ajeting chongchajiin, ngo athako noin. Nail Haiu nung ni ün naiuso ni shan ta ni ngioji.

⁴Ngü nguotai ao nou akop uo chatkü phanne naiuso haiu ainou nguo nouso apem ni tü sunlutkü tensane.

⁵Ngo ni naiuso nungko hakü nguo nouso apem singtso nai yakthiowane. Naiuso amia kengpun nai tsükhanankü le-ane. Ngo nung waio nouso si thainian nouso hau heani-e.

⁶Nungaih Ijip hai apemüh Ngo APAOU ta nge-e.” APAOU nou ngioji, “Israelhai ahalou thaiutha ni Ijip hai tü niolutkü noiküla, lüko ni pailai outsükongkün tsak chiai titso meikü tsünoi.

⁷Tilai ngüsoüh ni da niolut, ni ngekkan, naiuso phemthso nai chi, ngüso san longek.

⁸Nungtiphe lo, Ngo, Akhengting APAOU nou ni tü salaiu nou heau khaiuniahoi nialoukü shi-e naiuso ngüsoüh ni naiuso athainianso loatkü wane ta ngioji.

⁹Naiuso Ijip goumchi nung aodangkü leantsün tsak iula. Nungaih ni ngo APAOU noin ta nge-e.” “Tiautenai ni Nail nung ni ün naiuso ni shan ta ngiophe,

¹⁰Ngo, athako naiuso Nail thako eh noin. Ajenapki Migdol noknio ainou ajepekki Asawan noknio saokü, naiuso Sudanhai elung yam saukü akeng iula-i-e.

¹¹Nung yankü thainian naiuso khaiunia sau lüko tütsakei-e. Pon aopüle thaiutha nungko aathso titso tsükih-e.

¹²Ngo Ijip nung goumchi ko thatü thsüokü lotheantsün shingkhannio tsak iula-i-e. Pon aopüle nouko amao noknio tü tsaokü, Ijip hai noknioso alothe nai noi-e. Ngo Ijip hai akiploutsün khaiuniahoi au shane. Ngüso shingkhannio apemai pengpune naiuso amao khaiuniahoi nousoko kih-e.”

¹³Akhengting APAOU nou ngioji, “Pon aopüle phiai ngo Ijip hai pengpunkü noitsün mele nouso ainou nialoukü shishi-e,

¹⁴naiuso ngüso ün tengkam goh Ijip goumchi ajepekki nai ngüso kih-i-e. Nungko ngüso tsaosilao nokshing tsak noi-e,

¹⁵nung apem chiko tsaosilaoting nokshing noi-e, naiuso loto ngüsoüh tilaitso amao mele nouso chiai nokshing tsüshingshi-e. Ngo ngüso anyaoting au the-ikü amao mele nouso ngüso ngiokhem khemai tilaitso kankü shiao tsüshio-e.

¹⁶Loto Israel haiüh ngüso ahachu thaiutha tilaitso tsümonglam shi-e. Ijip hai akuoüh Israelhai hau ngüso da monglamtsün nung titi aphio noiküla ta yangshi-i-e. Nungaih Israel haiüh Ngo, Akhengting APAOU ta nge-e.”

¹⁷Sam thaloukü khuwantsün pon kheikü chinyat chongting alei nouko chongting ajekhaiu nai, APAOU nou ngüko chitekü ngiom.

¹⁸“Khaiunia thso,” “Babilonhai Nokpao Nebukad- nezarüh Tair komau tsalouwaniu. Apaüh apa süpaiso hau thsa lekü kan-i nou ngüso khaiopang naiuso ngüso sangdongkhaiu thakia-iu, lüko nokpao tsüdekünai apa süpaihoisoüh ngüso angjakü tannattsün thaiutha titso amai tsüeppe.

¹⁹Nungtiphe, lo, Ngo, Akhengting APAOU nou ngiotsün nung noin: Ngo Ijip goumchi Nebukadnezar Nokpao hau kiuwanji. Apaüh nung yampekkü naiuso kamhekü, Ijip hai chaiou tengkam nouso apem kankü khukü nung apa süpaihoi aleichai ao theane.

²⁰Ngo apa hau Ijip goumchi apa chhisiya mai kiuwanji, tiautenai apa süpaihoiüh jü thaiutha chhisiyaji, ta Akhengting APAOU nou ngioji.”

²¹“Tilai nungti thawao-e, ngo Israelhai khaiuniahoi lokonge, naiuso ni, Ezekiel, hau khaiunia apemüh lula ao shiokü hau singio-i-e, nungtiphe ngüsoüh Ngo APAOU nou noin ta nge-e.”