Read Khiamniungan Naga Ezekiel 3 Bible Online

Ezekiel 3 - Khiamniungan Naga bible

Ezekiel 3

¹Goa nou ngiom, “Khaiunia thso, nung thsamlai lühe; naiuso khuküta Israel khaiunia hoiko lüchite.”

²Nungtiphe ngo jüson kopengnai, naiuso apaüh ngü hau nung thsamlai heau kiu.

³Apaüh ngiom, “Khaiunia thso, ngo ni hau kiutsün thsamlai nung lühe; naiuso nungüh athai lümian.” Nungtiphe ngo nung henai jüsonkou ai liukhiam anyaothingli nyakü noiküla.

⁴Nungaih Goa nou ngiom, “Khaiunia thso, ni Israel khaiuniahoi dongai khukü ngo nitü tilüsong ngioau ngioji nung ngüso tü lüngio.

⁵Ngo ni gohmao khaiunia ngio achek ngiotsün mele tsak dongai tsüde, lüko Israel mele dongai hongji.

⁶Ngo ni mele asong ngio tsüngelakü chitetsün dongai hong naito, ngüsoüh ni tü ang-e.

⁷Lüko Israel haiüh to tsaküh tso angau tsümongchio-e ngüso si ngüso jetko lüko angau tsümongchio-e. Tiautenai Israel kau apem kha tsüwonkün jije naiuso mongkonghoi noin.

⁸Lo, ngo amongpem naiuso akhasinio ngüso li kongkü naiuso tsüokü shan-e.

⁹Ngo ni lungli mongkü, daimon chaiouli tsüokü shane; nungtiphe nung angio tsüangkün kau lun titso hatkü lanoi.”

¹⁰Goa nou tsülaokü ngioji, “Khaiunia thso, ngo ni hau chitetsün alum labean naiuso mongkiukü athe.

¹¹Küta agoumchi khaiunia sauhai akhothiotsün nai noin ngüsoüh ni tü ang lüko naiuso tsü-ang lüko, ngo Akhengting APAOU nou ngiotsün ngüso hau khukü lüchite.”

¹²Nungaih Goa onthso nou ngü loksan, naiuso jü phiai sang asong tsak nou, “Aün khengai APAOU ün ajinka lülomsan!” ta ngiotsün ngo lula.

¹³Naiuso akoi potsün thainian nouso tsaküh tsak tü thonetsün, naiuso ahok püle potsün tsamkei hok ngem nou gohhaiu ngem asong tsakli ngo lula.

¹⁴Apa onthsoüh ngü loksankü kankü khuwantsünko ngo thatü mongmatkü noiküla, naiuso APAOU oukong jü chiai shikü noiküla.

¹⁵Nungtiphe ngo akhothiotsünso khetsün Kebar Haiu shimkü Tel-Abib ai shin, naiuso ngüso ko nung athang nai ngo epkü naiuso lukü shitsün thaiutha ajekhaiu chinyatnyi ngalakü noiha.

¹⁶Chinyatnyi yankü phiai, APAOU ngü ko chite.

¹⁷“Khaiunia thso,” ta apaüh ngiom, “Ngo Israel mele thaiutha ni ehü tsak theao shanji. Ni ngüso, ngo ni hau kiutsün alotsüo nouso kiukü thaisane.

¹⁸Ngo nitü tsümeikün khaiunia tsak eane ta ngionai, ni apa aa kipsanao ayam tsühankünai apa loüh angei nailu noikü eane, nungaito apa eantsün thaiutha ko ni da sao-e.

¹⁹Ni khaiunia tsak lotsüoküta apaüh tsülaokü angei chhi chhikü apa mong tsüphoklekü ean naito, ni to nung ainou thakhu-iu!”

²⁰“Khaiunia amei tsaküh tsümeikün chhiao tsalounai ngo apa angja akuo nai thiowane, ni apa tsülotsüokünai nungko apa eane. Apa meshen angei shioko eane-ngo apa chhi amei tsüyangsane-lüko apa eantsün thaiutha to ni tü sao-e.

²¹Ni khaiunia amei tsak tü angei nou lachhi ta lotsüokü apaüh angio angkü angei tsüchhishi naito, apa aa noi-e, naiuso ni apem aa nou lüko kipsane.”

²²Ngo APAOU oukong hatsün ngesan naiuso ngü tü ngiotsün lula, “Achu küta tsamei nai lünap naiuso ngo niko nungai chite-e.”

²³Nungtiphe ngo tsamei nai nap, nai nungko ngo APAOU ün ajinka Kebar Haiu sai nai epkü shitsünli ep. Nungko jü kha thaothiokü goh ai loian,

²⁴lüko Goa Onthso ngü da napkü ngü tsakü chu. APAOU nou ngü tü ngiom, “Tsamai lükhu küta nungai kiapjeikü lünoi-an.

²⁵Khaiunia thso, ni ao nou kekü wane, naiuso ni ngüso ongko khakhakü tsakei ao tsüshio-e.

²⁶Ni nung akhengshitsünso tü lotsüoau tsüshiokü hau ngo alei keshikü wane.

²⁷Nungaih, tilai ngo niko müjam chiteshi-e naiuso ni hau ngio chiteshiao oukong laokü kiushi-e, nungai ni Akhengting APAOU nou ngiotsün ngüso hau chite-e. Ngüso ajantsoüh to tsüang-e tititenai ngüso angio tsü-angkün mele tsak noin.”