Read Khiamniungan Naga Ezekiel 30 Bible Online

Ezekiel 30 - Khiamniungan Naga bible

Ezekiel 30

¹APAOU nou ngüko chitekü ngiom.

²“Khaiunia thso,” “Ngo Akhengting APAOU nou ngiotsün khapiam ngio lüngio naiuso lüwelut. Ni nung ngio nouso songkü weao noin: Alekkat ajekhaiu tsak shiji!

³Nung ajekhaiu shimkü noin, APAOU nou chhi chhiao nou ajekhaiu. Mele thaiutha angja naiuso thengmia ajekhaiu nou.

⁴Nungaih Ijip nai ehli noi-e Naiuso Sudan nai amongkia asong noi-e. Ijip nai piakü loattane; naiuso nung shingkhannio kamheküta lothekü le-ane.

⁵“Naiuso nungh ehli nou Sudan, Lydia, Libya, Arabia naiuso Kub ainou amai kiukü taoshitsün süpaihoi nouso loattane naiuso jü khaiunia ongai nouso lüko loattane.”

⁶APAOU nou ngioji, “Ajenapki Migdol ainou ajepekki Aswan saokü, Ijip hai kiploutsünso apem ehli nai eane. Ijip ün abülom süpaihoi nouso lomowane, ta ngo, Akhengting APAOU nou ngioji.

⁷Nung gohthang aodangkü leantsün ongko athsüoting noi-e, naiuso nungün noknio nouso moisemkü lothekü leane.

⁸Tilai ngo Ijip da in jeklute apa kiploutsünso apem loatkü wane naiuso nungaih ngüsoüh Ngo, APAOU noin ta nge-e.”

⁹“Tilai nungh ajekhaiu nou shikü Ijip lothean-e, ngo Sudan hai titsü- yangkü noinso lothsümonao kheng nouso nai ngiongem kantsünso honge, naiuso ngüso lekkate; nungh ajekhaiu nou shiji!”

¹⁰Akhengting APAOU nou ngioji, Ijiphai ün memei tengkam lothonanau, “Ngo Babilonhai nokpao Nebukadnezar kankei-e.

¹¹Apa naiuso apa ün atsüojin tsülepkün süpaihoi shikü nung gohthang lotheane. Ngüsoüh Ijip tü salaiu nousoüh po-e, naiuso goumchi nou mea nou meane.

¹²Ngo Nail Haiu lo-ap-e naiuso Ijip nung khaiunia tsümeikünso oukong ai thiowane. Gohmao khaiuniahoi nousoüh shingkhannio athum lotheane ta Ngo APAOU nou ngioji.”

¹³Akhengting APAOU nou ngioji, “Memfis nai noitsün atsüotsüdekün goa sotsom nouso ngo lomokü wane. Nungko Ijip chiai nokshingau sau tsünoi-e, naiuso ngo khaiunia apem lolekke.

¹⁴Ngo ajepekki nai noitsün Zoan hai noknio da in nou jeklute. Naiuso Ngo Thebes hai noknio ateng nou ta mi kheme.

¹⁵Ngo Pelusium hai noknio sübao Ijip ün asoloutsün asongting noin, nung hau jü amongmat yangsani-e, naiuso ngo Thebes hai tengkam lomokü wane.

¹⁶Ngo Ijip tü in nou jeklut-e, naiuso Pelusium hai mongkiakü ngettsün nai noi-e, naiuso noknio nou shelei nou meane.

¹⁷Heliopolis naiuso Bubastis noknio nouso pühehoi ehli nai eane, naiuso amao khaiuniahoi nouso sua au thaloukü khuwane.

¹⁸Tilai ngo Ijip oukong ngüso bülomtsün oukong lomoau atao kankü shi-e, Tahpanhes thako anyakhem nou shi-e. Thengmia tsaküh Ijip khuopokke, naiuso apa ün noknio nouso khaiuniahoi chikü sua au thaloukü khuwane.

¹⁹Tilai ngo Ijip tü nungti mi kheme, ngüsoüh Ngo APAOU noin ta nge-e.”

²⁰Sam thaloukü khuwantsün pon chekü tsak chongting alei nouda ajekhaiu chinyat noukonai, APAOU nou ngü ko chitekü ngiom.

²¹“Khaiunia thso,” “Ngo Ijip nokpao phemthso longekkaniu. Nung sauüh tsülepkiu tsüdekünai loüh jam salaiu dun shikü oukongkü khushiao meikü hau nung mo nou da sauüh mose tsüloulut.

²²Nungtiphe, lo, Ngo Akhengting APAOU nou ngioji: Ngo Ijip hai nokpao eh noin. Ngo apa pha nemthso-alothean nou naiuso amei nou nemthso longekke- naiuso salaiu nou apa pha ainou sali-ane.

²³Ngo Ijip hai goumchi apemai pengkü khu-i-e.

²⁴Nungaih ngo Babilon hai nokpao phem oulokonge naiuso jü salaiu apa phamongai thio-e. Lüko ngo Ijip hai nokpao pha longekke, naiuso apa meshen eh khako ngetkü eane.

²⁵Ah, ngo Ijip nokpao oukong lohen-e naiuso Babilonhai nokpao oulokonge. Tilai ngo jü salaiu apa hau kiu-e, naiuso apaüh nung Ijip dongai sheikü loksane, khaiunia pungkü nou Ngo APAOU ta nge-e.

²⁶Ngo Ijip hai goumchi thapekkü pengpun-i-e. Nungaih ngüsoüh Ngo, APAOU noin ta nge-e.”