Read Khiamniungan Naga Ezekiel 31 Bible Online

Ezekiel 31 - Khiamniungan Naga bible

Ezekiel 31

¹Sam thaloukü khuwantsün pon chekü tsak alei süme nou da chongting ajekhaiu nouko nai, APAOU nou ngü ko chitekü ngiom.

²“Khaiunia thso,” “Ijip hai nokpao naiuso apa khaiuniaso chikü tü nung lüngio: Ni titi oukongting noin! Ngo niko tiüh welu-eao shio-e?

³Ni Labanon nai, aleng amei pai akia nouso ah-khemsoh sunkü, thengmia sungyapkü laiutsün cedar pai tsak nou khekkü noin.

⁴Nung samsaniau nungko khiam, gohkhei ainouso noiküla. Pai samtsün athang nou da ngüsoüh khiam thsalut naiuso liutsa pai apem dongai haiungan nouso hong.

⁵Khiam meikü thsaluttsün tsangkü, nung amao pai nouso chiai laiukü samsan. Nungh paikia nouso kongkü naiuso laiukü iula.

⁶Waio in pungkü nou nung paikia nouso da ap-nou ap; Liu thainian nousoüh nung paikhemsoh ko athso nouso ponlou; naiuso goumchi mele nousoüh nung ah-khemsoh ko aalou.

⁷Nung pai titi alengmei, naiuso akia nouso laiulaiukü noiküla. Nung eiu nousoüh gohkheiting haiungan nouso yapkü napji.

⁸Goa ün aimong ainou cedar pai nung tikotso welu-au tsüshio. Fir pai nou da nungtili tilaitso atsong tsünoiküla, naiuso plane pai da apa tüli eiu tsünoiküla. Goa aimong nai apa li alengmei tsünoiküla.

⁹Ngo nung paikia nouso pengpunkü aleng meikü shan. Nung Goa ün Eden aimong nai pai pungkü nou apa tü chinek.

¹⁰“Nungtiphe lo, Ngo Akhengting APAOU nou nung thengmia moyapkün lektso samsantsün pai da ti thawao au noin nung ni hau chite-e. Nung pai titithatso laiukü sungh nungtithatso bülomkü iula;

¹¹nungtiphe ngo nung gohmao nokpao tsak hau thean-iau wanan. Apaüh nung pai nou tsümeikü chhitsün mai apa hau kiu-e,

¹²Atsüojin tsülepkün gohmao khaiunia nousoüh nung sahongkü leane. Nung paikia naiuso atsong nouso shingkhannio nai king naiuso tsamei pungkü nai loithio-e. Nung ah-khemsoh ko kihtsün mele nouso apem khuwane.

¹³Waio nouso shikü nung pai aloiantsün chiai hü-e naiuso liu thainian nouso nung paikia nouso chiai yankei-e.

¹⁴Nungtiphe lo nai yaküto, ti pai lünou khiam titi thsalutkü noilünou, nungli laiukü tsüsamsanshi-e, tsüdekünai nung thengmia atsokting sungnyapkü tsüyanlükhunshi-e. Ngüso apem e-eantsün khaiuniahoi khekkü eane inyate, naiuso nung eantsün goumchi ai saowantsünso ko hatsün iula-e inyate.”

¹⁵Akhengting APAOU nou ngiotsün nung noin: “Nung pai nou eantsün goumchi nai khuwantsün ajekhaiu konai, ngo gohkhei khiam nouso hau nung amongsaiu ii tsakli hankü lunlou-i-e. Ngo haiu nouso tsangtsün lolaowane, naiuso haiungan piakü tsüchetsani-e. Tiautenai nung pai eanphe, ngo Lebanon king nouso chiai anyakhem nou kankü shikü langpai apem wonan-i-e.

¹⁶Tilai ngo eantsün goumchi ai hongan-e, nung hongthiowantsün angem nou mele nouso tü saiukei-e. Eden pai nouso apem naiuso achosan nouso, Lebanon pai nung khiam nou meikü tsakü taiutsün eantsün goumchi ai sauhai saowankü noin nungso nung loiantsün ko monglinge.

¹⁷Nungso eantsün goumchi nai sauhai loian nungso ko haau khu-e. Naiuso nungsoh ko sauhai kihkü noiküla nungso apem mele nouso ongai penge.”

¹⁸“Nung pai nou Ijip hai nokpao naiuso apa khaiuniaso apem. Eden nai lüko nung pai nouli laiukü naiuso asuhatkü tsünoiküla. Lüko lo, Eden pai nouso khekkü, nung eantsün goumchi nai saowane küta goa tsüngekünso naiuso ehli nai loattsünsoko ha-e.” Ta Akhengting APAOU nou ngioji.