Read Khiamniungan Naga Ezekiel 32 Bible Online

Ezekiel 32 - Khiamniungan Naga bible

Ezekiel 32

¹Sam thaloukü khuwantsün pon chekü nime alei chekü nime nou da chongting ajekhaiu nouko nai APAOU nou ngü ko chitekü ngiom.

²“Khaiunia thso” “Ijip hai nokpao hau alotsüo jenkü tsak lükiu. Apa hau ngü ainou nung ngiongem lükiu: Ni mele nouso ongko chongkhao tsak khekkü chhiji, lüko ni haiu ai noitsün chong chajiin bao tekkü khekkü noin. Ni ahoksoüh khiam longeiji naiuso haiu nouso lochinyanji,

³Tilai mele nouso kamshi-e, ngo ni nyao nai thalou-e naiuso haiukok nai tenshi-e.

⁴Ngo ni goh ai yakkane küta goumchi waio nouso si thainian nouso apem kamkü shikü ni he-ikü tsade.

⁵Ngo king naiuso tsamei nouso amea choiüh meankiu-e.

⁶Ngo ashe king nouso mothajeikün lektso naiuso haiungan nouso motha miankün lektso tsangi-e.

⁷Ngo tilai ni lothe-e, ngo maou nou khuolai-e naiuso kianthsüo nouso wanane Aje nou thengmia phiai sojei-e, naiuso alei awon tsükiushi-e.

⁸Ngo aün awon nouso apem lonyatkü wane küta goumchi nou anyakhem nai nappe, ta ngo, Apemshiotsün APAOU nou ngioji.”

⁹“Tilai ngo nung alotheantsün ngiongem shingkhannio thapekkü lopenge nung tsangkü mele piakü mongpem ngaongao-i-e.

¹⁰Ngo ni tü chhitsün nungüh mele piakü lekkat-e. Tilai ngo jü salaiu tensane, nokpao nouso lekkü hatate. Ni loiantsün ajekhaiu ko nai, ngüso apem meshen aa thaiutha hatkü ngaongao-e.”

¹¹Akhengting APAOU nou Ijip hai nokpao tü ngioji, “Ni Babilonhai nokpao ün salaiu waohe-e.

¹²Ngo atsaoting mele nouso ainou süpaihoi nouso hau ngüso salaiu tensankü akhaiuniaso apem loati-e. Akhaiu- niaso apem naiuso ni bülomtsün nou alum lotheane.

¹³Khiam piakü noitsün athang nouso alumai ngo athainianso chaoatkü wane. Loto khiam longeiau khaiunia lüko tsüdekünai thainian lüko ti tsünoishi-e.

¹⁴Ngo akhiam sangkü shikü sanglingkü iula-i-e naiuso ni ün haiu nouso tsamloukü tsangi-e, ta Ngo Akhengting APAOU nou ngioji.

¹⁵Tilai ngo Ijip nai kihtsün apem lomokü nung gohthang lotheane, ngüsoüh Ngo APAOU noin ta nge-e.

¹⁶Nung alotsüo jenkü kiutsün ngüso thaiutha apungeantsün jih tsak iula-e. Mele nouso menyiuhoi nou Ijip naiuso nungko kihtsün khaiuniahoi apem thaiutha amongsaiu jih hange ta Ngo, Akhengting APAOU, nou ngioji.”

¹⁷Sam thaloukü khuwantsün pon chekü nime chongting alei nou da ajekhaiu chekü pungonyi nouko nai, APAOU nou ngü ko chitekü ngiom.

¹⁸“Khaiunia thso,” ta apaüh ngiom, “Ijip khaiunia apem thaiutha lümongsaiu. Eanhai goumchi nai saokü noitsün amao akongting mele nousoko aikü lühong thiowan.

¹⁹Ngüso tü lüngio: “Ni amaohai chiai to ni tekkü alengmei ta yangji so? Ni lüko eanhai goumchi ai saowane naiuso nung goa tsüngekünso ongko ni sai-ane.

²⁰“Ijip hai ehli nai loattsünso ko aikü eane. Ngüso apem loatau salaiu tsak khemkü noin.

²¹Lengting nouso sauhai Ijip haiko hakü ehlikü noiküla, nungso eanhai goumchi nai monglingkü louji. Ngüsoüh vekü ngiom: ‘Goa tsüngekünso sauhai ehli nai ean ngüso lüko nungai shikü ta ekü noin!’

²²“Asiria naiuso apa süpaiso nungko noin, ngüso etam ngüso lemkü noin. Ngüso apem ehli nai loatkü noiküla,

²³naiuso ngüso etam so eanhai goumchi akheiting nai noin. Apa süpaiso apem ehli nai loi-an, naiuso ngüso etamüh apa etam lemkü noin. Külüko ngüsoüh loühjam aahai goumchi lekkat-i.”

²⁴“Elam naiuso apa süpaiso nungko noin, ngüso etam ngüso lemkü noin. Ngüso apem ehli nai loat, naiuso ngüso tsütippankü, eanhai goumchi ai saowan. Aakih tao ngüsoüh alekkat lousan lüko lo ngüso amiam nai ekü saikü noin.

²⁵Ehli nai loattsünao ongko elam lüko saikü noin, naiuso apa ün süpaihoi etam apem apa lemkü noin. Ngüso apem tsütippan, apem ehli nai loatkü wan. Aakih tao ngüsoüh alekkat lousan, lüko lo, nung ehli nai eantsünso akuo nai haoson thekü ngüso amiam nai ekü noin.”

²⁶“Meshek naiuso Tubal ne nungko noin, ngüso süpaiso etamüh ngüso lemkü noin. Ngüso apem tsütippan, naiuso apem ehli nai loat. Külüko loühjam ngüsoüh aah nouso lekkat-i.

²⁷Akeng vetaoko lenghoi sauhai eanhai goumchi ai dunsiyam apem sunkü ngüso hau asuhat kiutsün khanantsün khekkü, asuhat tsükiu ngüso ün salaiu nouso ngüso khaio ai taiukiu naiuso ngüso shii nouso ngüso pem chiai taiukiu. Nung leng nouso ataojam aah nouso lekkatiau oukong saiukü noiküla.”

²⁸“Nungti ehli nai tsütippankünso ongko Ijip hai loatkü wane.”

²⁹“Edom, apa nokpaoso naiuso ahei nousoko hakü nungko noin. Ngüso oukongting süpaihoi noiküla, lüko lo ngüso ehli nai loattsün tsütippankünso ean haiko aikü goumchi ai noin.”

³⁰“Ajenapki nai noitsün nokpao thso nouso apem, naiuso Sidon hai nungai noin. Ngüso oukongüh ataojam alekkat nou lousan lüko lo ngüso tsütippankü, ehli nai eantsünso ko aikü amiam nai napkü noin. Eanhai goumchi ai saowantsünso amiam nouko ngüsoüh haoson lohaji.”

³¹“Ehli nai loatsünso apem epnai Ijip hai nokpao naiuso apa süpaiso thaiutha mong aalou kiutsün tsak noi-e” ta Akhengting APAOU nou ngioji.

³²“Ngo Ijip hai nokpao hau aah noinso thatü lohat kiuao shan, lüko apa naiuso apa süpaihoi apem loatkü ta tsütippankü ehli nai sauhai ean ngüso ko aaloukü khananao wan.” Ta Akhengting APAOU nou ngioji.