Read Khiamniungan Naga Ezekiel 33 Bible Online

Ezekiel 33 - Khiamniungan Naga bible

Ezekiel 33

¹APAOU nou ngü ko chitekü ngiom.

²“Khaiunia thso,” ta apaüh ngiom, “Tilai ngo goumchi tsak dongai ehli kankü shiji nungai ti thawaoji nung akhaiuniaso hau lüchite. Nungaih khaiuniahoi nouso ong ainou tsak, ehü theao chosankü taiuji.

³Tilai apaüh eh shitsün epji, phyan thiotsün sang nou khaiunia pungkü atsüolouau kiuji.

⁴Ajantsoüh nung lulakü lüko tsütsüolokü naito eh nou apa loate, apa eantsün nung tengkhaio thsale,

⁵tiautenai e-pung kiutsün tao apa tsütsüolo. Apaüh mongkiutünto, apa ee ainou thakhu-ela.

⁶Naiuso ehü nou eh shitsün epkü eh-pungsangh tsüwelutkü naito, ehoi nouso shikü nung angeihoi nouso loate, nungaih ngo ngüso eantsün thaiutha ehü tü aphio ta thalou-e.”

⁷“Khaiunia thso, lo ngo ni Israel mele thaiutha ehü tsak taiukiuji. Ngo ni tü alotsüo kiutsün ni ngüso hau thunkiuaolu noin.

⁸Ngo khaiunia tsümeikün tsak eanau noin ta welutnai ni apa kipsanau shiokü noikü apa yam phokleau tsülotsüokü angei nailu noikü ean-i naito, apa eantsün thaiutha ngo ni aphio ta thalou-e.

⁹Ni tsümeikün khaiunia tsak hau alotsüo kiukü lüko apa angei chhi tsülaokü chhikü apa angei nailu ean nai, ni apem aa aphio ainou kipsane.”

¹⁰APAOU nou ngü ko chitekü ngiom. “Khaiunia thso,” “Israel thsoso tü ngüsoüh ngiotsün nung laoshikü lüngio: ‘Sam angei naiuso sam aphio chhi nouso sam chiai noin. Nungüh sam oukiakü shi-anji. Naito sam titi aakih au shio-e?’

¹¹Ngüso hau, Ngo Akhengting APAOU, nou aa Goa noitsünli, angei khaiunia tsak eankü epnai ngo monglingkü tsünoi ta lüchite. Apa angei ainou laolokü aakih nou ta ngo thapao aiuji. Israel, ni tsümeikü chhitsün lülaolo tiauta ni eanau aiuji?”

¹²“Khaiunia thso, tilai khaiunia amei tsaküh angei sunji, apa chhi amei nou apa tsükipsane ta Israel thsoso hau lüchite. Tsümeikün khaiunia tsak tsümeikü chhitsün laolonai, apa mikhem nai tsüshi-e, naiuso khaiunia amei tsak angei chhi tsalounai, apa aa nou tsükipsane.

¹³Asio khaiunia tsak tü, atsüoting ni aa noitaoko amei chhitaiu nou saiu-e ta yangkü, angei chhi-au tsalounai, ngo apaüh amei chhitaiutsün tsaktso tsüyangsankiu-e. Apa meshen angei shioko eane.

¹⁴Eanao noitsün tsümeikün khaiunia tsak, apa angei chhitsünko laolokü ayamtha nou chhinai,

¹⁵Athatlu, apaüh chailaiu lotaiutsün laokiushinai, tsüdekünai apaüh kaokü noitsün laokiushinai, apa angei chhitsün laolokü aa kiutsün ngiokhem tü hoilutnai, apa tsü eane, lüko aa kih-e.

¹⁶Apaüh sunloutsün angei nouso ngo wankiu-e, naiuso apa aa kih-e, tiautenai apaüh ayamtha nou naiuso amei nou chhin.”

¹⁷“Naiuso akhaiuniasoüh ngo ti chhiji nung tsütha ta ngioji! Lüko ayam tsüthakü nou nung ngüso yam noin.

¹⁸Tilai asio khaiunia tsaküh amei chhitsün laolokü, tsümeikün chhi tsaloushi-e, apa nung thaiu- thako eane.

¹⁹Tilai angei khaiunia tsaküh angei chhitsün leankü ayam tha nou chhi-e, apaüh apa aa kipsaniu.

²⁰Lüko Israel, ngo ti chhiji nung ayam tsütha ta ni ngioji. Ni chhitsün tsangkü ngo ami khemao noin.”

²¹Sam thaloukü khuwantsün pon chekü nime alei che nou da ajekhaiu pungonyi nouko nai khaiunia tsak sau Yirusalem ainou thakhukü noiküla apa shikü ngü hau Yirusalem noknio loiantsün thaiutha chiten.

²²Apa shitsün khako, ngo APAOU hatsün oukong ngesan. Tilai nung khaiunia nou nungthan ahom shingoi, APAOU nou ngü hau ngio chiteau oukong laokü kiushi.

²³APAOU nou ngü ko chitekü ngiom,

²⁴“Khaiunia thso,” ta apaüh ngiom, “Alotheantsün Israelhai goumchi noknio nousoko kihtsün khaiuniahoi nou ngioji; ‘Abraham khaiunia tsaklu noiküla, naiuso apa hau nung goumchi athum kiuwan. Lo sam piakü noin, nungtiphe lo nung goh sam ün noin.’

²⁵“Ngo Akhengting APAOU nou ti ngioji, nung ngüso hau lüchite: Asamüh nyih nou ashe sunkü heji. Asamüh sotsom nouso amkhamji. Asamüh she nou lopengji. Naito, nung gohthang asam ün nou ta ti tsangkü yang-iji?

²⁶Asamüh asam salaiu da monglamji. Asamüh achinyanao nou chhiji. Asam chikü nou tsütsamtsütsüokü chhiji. Naito, nung gohthang asam ün nou ta ti tsangkü yang-iji?

²⁷“Ngo, Akhengting APAOU atsüoting aa Goa noitsünli, nung alothean noknio nouso ko kihtsün khaiuniahoi loatkü wane ta ngüso hau lüchite. Nung shingkhannio nai aa kihtsünso liu thainian nousoüh he-ane. King naiuso ken nouso ai pamkü noitsünso imkia nou eane.

²⁸Ngo nung shingkhannio atheao tsümeikü lotheane, naiuso ngüso bülomtsün oukong nung lothonane. Israel hai king nouso nung yankü khuau sauüh tsüshiokü thatü tsaokü noi-e,

²⁹Tilai ngo khaiuniahoi nouso ngüso angei shioko angja kiu-e, naiuso shingkhannio nou atheao tsümeikü wane, nungaih ngüsoüh Ngo APAOU noin ta nge-e.”

³⁰APAOU nou ngiom, “Khaiunia thso, akhaiuniaso tilai noknio lungpe dongko tsüdekünai ngüso tsam koukhan nouso dongko eppeji nungko athaiutha chiteji. Ngüso tsaküh tsak tü ngioji, ‘APAOU ainou ti ngio shikü noin sam nung angluao lo khuko.’

³¹Nungtiphe jü khaiuniaso ni ngiotsün tü angau hoi asong kamshi, lüko ni ngüso tü lüchhi ta ngiotsün ngüsoüh tsüchhi. Ngüso sonkou nai atsüojin ngio nouso noin, lüko ngüso mongpem alesan yamai khuwanji.

³²Ngüso thaiutha to ni atsüojine jih kokiang khongkiukü hangtsün tsüdekünaito nung chiai titso tsüde. Ngüsoüh angio apem ta angji lüko nungso ongko ngiopem tsak lüko tsüchhiji.

³³Lüko tilai angio nouso apem shithawao-e naiuso nungso atsüo shi-e nungaih ngüso mongko e-po tsak noiküla ta nge-e.”