Read Khiamniungan Naga Ezekiel 34 Bible Online

Ezekiel 34 - Khiamniungan Naga bible

Ezekiel 34

¹APAOU nou ngü ko chitekü ngiom.

²“Khaiunia thso,” “Israel hai onnemok jimhoi thako khapiam ngio lüngio. Ngüso tü Ngo Akhengting APAOU nou ngiotsün lüchite, ngüso tü khapiam ngio lüngio: Asam Israel hai onnemok jimtsünso, asam inyate! Asamüh asam pem tsadlu, lüko onnemok hoi nouso tilaitso tsüjim.

³Asamüh onnemok nyao shiuji, onnemokpon emok ainou shankü neshe nouso thoji, naiuso onnemok hoi ongko ameiting nou loat küta heji. Lüko asamüh tilaitso onnemok hoi tsüjim.

⁴Asamüh atsaosilao nouso tsüpaotsang, akia nouso tsülomeikiu, atawai muo nai tsükekiu, yam phiokü khuwantsünso nialoukü tsüshi, tsüdekünai amowanso ta tsüyam. Nungliko, asamüh ngüso tü thangmangkü kankei.

⁵Tiautenai onnemok hoi ajimtsün tsünoiphe, ngüso pengpunkü khuwan, naiuso liuthainian nousoüh nungso loatküta heanji.

⁶Nungtiphe jü onnemok hoiso king nouso si choi nouso atsok nai penglükhun. Ngüso goumchi apemai pengkeikü khuwan, naiuso sauüh tso ngüso tsüyam tsüdekünai ngüso yamsanao tsükowe.”

⁷“Nungtiphe asam onnemok jimtsünso, lo Ngo ti ngioji anglu:

⁸Ngo atsüoting aa Goali, asamüh ngü ta angau noiküla. Jü onnemokso tü liu thainian nouso pokü ngüso loatkü hean, tiautenai onnemok jimtsün sau tsünoi. Jü onnemok jimtsünsoüh onnemok hoi yamsanao tsükowe. Ngüsoüh onnemok hoi tsüdekü ngüso pemlu paotsangluji.

⁹Nungtiphe asam onnemok jimtsünso ngü tü anglu.

¹⁰Ngo asam eh noin ta Ngo, Akhengting APAOU nou welutji. Ngo jü onnemokso asam ainou kankü khuwane naiuso loto asam pemlu tsüpaotsangi shi-e. Ngo jü onnemok hoi asam ainou kipsane naiuso asam hau ngüso tsühe-ishi-e.”

¹¹Ngo jü pemüh jü onnemok hoi yamkü paotsange ta Akhengting APAOU nou asam tü ngioji,

¹²onnemok jimtsün tsaküh apenglükhuntsün kamloukü nialoukü shiküta apa onnemok hoi paotsangtsünli, ngo nungh anyakhem akuothe ajekhaiu nouko ngüso pengpunkü khuwan- tsün athang ainou niakame.

¹³Ngo ngüso aikü kamlouküta gohmao shingkhannio nouso ainou niasane, küta ngüso tengkam goumchi ai nialoukü shi-e. Ngo ngüso Israel hai king nouso naiuso haiuthso nouso dongai nialoukü khuküta khenglio

¹⁴thsan amei nou tsade, naiuso Israel hai kingkhaio nai ngüso saitsün tsam noi-e, nungko ngüso tsam amei aaloukü sai-e, naiuso thsan amei chiai, ngüso tsade.

¹⁵Jü onnemok jimtsün ngo jüpem noi-e, naiuso ngo ngüso hau aalou au athang tsak kiu-e ta Akhengting APAOU nou ngioji.

¹⁶“Ngo amowan nouso tü yame, yam phiowankü khuwantsünso nialoukü shi-e, atawai nouso da muo nou kekiu-e, naiuso akia nouso lomeikiu-e, lüko atsahoi naiuso akong onnemok nouso ngo lomowane, tiautenai ngo ayam thakü chhitsün onnemok jimtsün tsak noin.”

¹⁷Nungtiphe, jü onnemok hoi, lo ngo, Akhengting APAOU nou asam chikü ta mi kheme naiuso onnemok jimtsün nou onnemok ainou wonhoi janthattsünli, amei nouso tsümeikü ainou janthat-e.

¹⁸Asam ajantsoüh thsan ameiting tsamhe lüko among- tsam tsünoi, asamüh tsütsamhe lüko asam hoküh ngamthiokü lean! Asamüh asangling khiam shiuküta apoi nouto longeikü wane süne!

¹⁹Jü onnemok amao nousoüh asamüh ngamthiowantsün thsan naiuso alongeian nou khiam heshiuao noin.

²⁰Nungtiphe lo ngo, onnemok akonghoi si tsaosilaohoi jekko mi kheme ta Akhengting APAOU nou asam tü ngioji.

²¹Asamüh akia nouso thoianküta nungso khaiu nou keianji.

²²Lüko ngo jü onnemokso kipsane, naiuso loto ngüso tü amongkia titso tsü chhi-ishi-e. Ngo jü onnemok chikü thaisan küta amei nouso tsümeikü ainou janthat-e.

²³Ngo ngüso hau jü tsamki David khekkü ngüso tü jimao nokpao tsak kiu-e, naiuso apaüh ngüso paotsange.

²⁴Ngo APAOU nou, ngüso Goa noi-e, naiuso ngüso nokshingau jü tsamki David khekkü nokpao tsak noi-e, ta gioji.

²⁵Ngo ngüso ko athalou-e tsak shane, naiuso nungüh ngüso mongtsame. Jü onnemok hoi liutsa khengtaiu nai aaloukü kih au naiuso saiao ngo nung gohthang ainou ou nouso apem lowane.

²⁶Ngo ngüso oukiu-e naiuso ngüso jü asio king lemkü kih-i-e. Nungko ngüsoüh potsün tao ngo ngüso hau ouk ah-uo nou honge.

²⁷Pai nousoüh eiu nou eiuwao-e, chihsikhiam nou sungi-e naiuso khaiunia pungkü meshen goh tengkam nai aaloukü kih-e. Tilai ngo jü khaiuniaso ngüso son auo nou ketsün ainou sokke, küta ngüso sua ainou khaiuniatsüo nou kiu-e, nungai ngüsoüh ngo APAOU noin ta nge-e.

²⁸Loto ngüso goumchi, goa tsüngekünsoüh tilaitso tsükamheshi-e, naiuso liu thainian nousoüh ngüso loatkü tsühe shi-e. Ngüso tiüh tsülohatkü aaloukü kih-e.

²⁹Ngo ngüso hau gohmei nou kiu-e, naiuso goumchi nai naiusile nou lothonkü wane. Amao mele nousoüh loto ngüso tü tsünyailutshi-e.

³⁰Israel hai ngo kiplou naiuso ngüso jü khaiuniaso ta Ngo, Akhengting APAOU nou ngioji.

³¹“Asam, ngo tsadtsün jü onnemok hoi, naiuso Ngo asam Goa,” ta Akhengting APAOU nou ngioji.