Read Khiamniungan Naga Ezekiel 36 Bible Online

Ezekiel 36 - Khiamniungan Naga bible

Ezekiel 36

¹APAOU nou ngiom, “Khaiunia thso, Israel hai ün king nouso tü.

²Ngo, Akhengting APAOU nou ngüso thaiutha khapiam ngiongem kantsünso tü anglu ta lüngio: Israel ün ehoi nousoüh ngiom, kümei ainou king nouso lo sam ün noin!”

³Nungtiphe Ngo, Akhengting APAOU nou khapiam ngio ngiotsün welutkü lüngio. Tilai chenpa mele nousoüh Israel hai ün king nouso thaloukü kamhean, ngüso apemüh ngo lochi lotsaokiu.

⁴Nungtiphe asam king naiuso choi, haiuthso naiuso tsamei, lothekü leantsün athang, naiuso chenpa mele nouso chikü kamhekü lochi lotsaoküta aodangkü leantsün noknio nouso ta Ngo, Akhengting APAOU nou ngiotsün tü lo a-anglu ta lüngio.

⁵“Ngo, Akhengting APAOU nou, jü amongmattsün chenpa mele nouso naiuso mothikü Edom thako, ngüsoüh jih hangkü lochi, küta jü goumchi thalouwan naiuso nungko thsanyan noitsün hakü lowankiu” ta ngioji.

⁶“Nungtiphe Israel hai goumchi thaiutha khapiam ngio lüngio: King nouso, choi nouso, haiuthso nouso, naiuso tsamei nouso tü Ngo, Akhengting APAOU nou mongkiakü ngioji, tiautenai mele nousoüh ngüso lochi lotsaokü lomiamkiu.

⁷Nungtiphe, Ngo Akhengting APAOU nou chenpa mele nouso lomiame ta mongkü thalouji.

⁸Lüko Israel hai king goumchi nouso ai pai nouso da ashah nyimsankü jü khaiunia Israel thaiutha pai-eiu nou eiu-shi-e. Asam tsamai shiao lo atao shimkü noin.

⁹Ngo asam ko noin, naiuso ngo asam gohthang loüh ah-ishiküta nungko lelo nou shiothio-ishi-e.

¹⁰Ngo asam mepemwe lopia-e. Asam noknio nousoko kihloshi-e naiuso lotheankü noitsün alum shanshi-e.

¹¹Ngo khaiuniahoi naiuso thainianhoi haowe nai singkü khu-i-e. Asam nung khako nou ta phopkü noi-e, naiuso asam methsoso piakü chetsane. Ngo asam kihkü shitsünli nungko asam kih-i-e, naiuso ngo pe nai kihtsün tü simkü tsüomeikü iula-i-e. Nungaih asamüh Ngo APAOU nou noin ta nge-e.

¹²Jü khaiunia Israel, ngo ni goumchi nai müjam kihshiao laokü nialoukü shi-e. Nungh asam thaiutha tengkam goh noi-e, naiuso asam thsoso loto tilaitso tsünaiushi-e.

¹³“Ngo, Akhengting APAOU nou ngioji, khaiuniahoi nousoüh nungtü khaiunia heantsün gohthang ta jonji, naiuso ngüso nung mele nousoüh nung gohthang nai kihtsün methso- hoi kaolowanji ta ngioji.

¹⁴Lüko loyaküto asam thsoso kauwantsün naiuso khaiunia heantsün tsüdeshi- e; ta Ngo Akhengting APAOU nou ngioji.

¹⁵Loto nung goumchi nou mele nousoüh lochi lotsaotsün tü tsüanglu shi-e tsüdekünai khaiu- niahoi nousoüh lochitsün tsüepshi-e. Nung goumchi nou loto mele nouso ün thsoso tsükaushi-e, ta Ngo, Akhengting APAOU nou ngioji.”

¹⁶APAOU nou ngü ko chitekü ngiom.

¹⁷“Khaiunia thso,” “Tilai Israel hai ngüso gohthang ai noiküla, ngüsoüh saisile naiuso chhi nou nung lochinyan. Ngo ngüso saisile nung menyiu tsak apa achinyan khutsün taokoli amkham yamko tsüyan- thsüokün saisileli taiu-e.

¹⁸Ngo ngüso hau jü amongmat oukong ngesan-i tiautenai nung goumchi nai ngüsoüh she lopengtsün chhin, naiuso ngüsoüh sotsom nouso tsangkü lochinyan.

¹⁹Ngüso chhisiya yam tsangkü ngo ngüso wanan, naiuso ngo ngüso gohmao shingkhannio nouso ai pengpun-i.

²⁰Ngüso khutsün pungkü nai ngü- soüh ngo lomiamkü kankei, tiautenai khaiuniahoi nousoüh ngioji, ‘Nungso APAOU ün khaiuniahoi noin, lüko ngüsoüh apa goh leanao sungküla.’

²¹Israel haiüh ngüso khutsün pungkü nai jünian khaioko amiam kanküshiphe, nungüh ngü yangelatkü noiküla.

²²“Nungtiphe, Ngo Akhengting APAOU nou ngüso thaiutha ngiongem taiutsün nung lo Israel hai hau lükiu: Israel hai, ngo ti chhi au noin nung asam shioko tsüde, lüko jü asio nian nou shioko, asamüh asam khutsün shingkhannio pungkü nai ngo hau amiam kiukü noiküla.

²³Tilai ngo jü asio nian asong nou mele nouso hau han-ngüso ongko asamüh lomiam kiutsün jünian han-e, nungai ngüsoüh Ngo APAOU noin ta nge-e; ta Akhengting APAOU nou ngioji. Mele nouso hau Ngo asio ta hanau asam kankei-e.

²⁴Ngo asam mele naiuso shingkhannio pungkü ainou nialoukü asam tengkam goumchi ai niakü shi-e.

²⁵Ngo asangling khiam asam tü satlut-e naiuso sotsom nouso apem naiuso asam lochinyantsün alum ainou asam yanthsüokü shankiu-e.

²⁶Ngo asam hau mongpem ayan naiuso mong ayan kiu-e. Ngo asam mong lungli jüokü noitsün lowane küta angio angtsün mongpem kiu-e.

²⁷Ngo jü onthso asam da thiokiu-e naiuso asam jü ngiokhem nouso si jü athoilut nouso tü hoilutji süne tsüde ta thappe.

²⁸Nungaih ngü asam paosipo hau kiutaiutsün goumchi nai asam kih-e. Asam jü khaiuniaso the-e, naiuso Ngo asam Goa the-e.

²⁹Asam lochinyantsün alum ainou Ngo asam kipsane. Ngo be-eiuyam meikü yami-e, nungti asam loto naiusile titso tsünoi shi-e.

³⁰Ngo asam hau pai-eiu ao-eiu oukkiu-e, mele nouso ongko asam miamau loto naiusile ti tsünoishi-e.

³¹Asamüh asam tsümeikün chhisiya yangshi-e, naiuso asamüh chhisantsün aphio nouso yangsan-e, naiuso asam angei aphio nouso thaiuthako asam chija yangelatkü chinyankü noi-e.

³²Israel hai, ngo nungso chikü asam shioko tsüchhiji ta asam hau yang-iau aiuji. Asamüh ti chhiji nung thaiutha asam miamkü naiuso lochikü yangsan-iau ngo mongchioji, ta Akhengteng APAOU nou ngioji.”

³³Akhengteng APAOU nou ngioji, “Tilai ngo asam angei nouso ainou yanthsüokü shankiu-e, ngo asam noknio ko asam kih-ishi-e, naiuso asam hau alothe-an nou shanlou- ishi-e.

³⁴Asam eiu yankü akhu ashi tsakeitsün pungkü nousoüh asam le-ankü epitsün, ngo loühjam ngüso hau eiu a-shikü epi-shi-e.

³⁵Khaiunia pungkü nou nung gohthang ataojam liutsa le-ankü noiküla, nung Eden Aimong khekkü titi iulashin ta ngio-e, naiuso nung noknio nouso nyomankü, kamhe- ankü alothe nai le-ankü noitsün, titi lo kihloushikü naiuso pe lomong- loshikü noin ta ngio-e.

³⁶Ashim noknio nai apoitaiu khaiuniahoi nousoüh alothean athang nouso naiuso eiu nouso ngü müjam shanshiau shio-e ta nge-e. Nung ngo APAOU nou thaloutsün chhiji loüh chhi-e.”

³⁷Akhengteng APAOU nou ngioji, “Ngo loühjam Israel hai hau ahachu ngü tü sangi-e, naiuso ngo ngüso onnemok hoi asong tsak khekkü haowe nai singkü khu-i-e.

³⁸Nung lo alothean nai noitsün noknio nouso ataojam sümai nai aloat chaithio kiutsün onnemok hoi nou Yirusalem miankü noitsünli ngü nung noknio nouso khaiuniahoi nousoüh miankü shanshi-e. Nungaih ngüsoüh Ngo APAOU nou noin ta nge-e.”