Read Khiamniungan Naga Ezekiel 37 Bible Online

Ezekiel 37 - Khiamniungan Naga bible

Ezekiel 37

¹APAOU Onthso nou ngü nialoukü khukü uo-keng nou miankü noitsün tsamei tsakko noi-i, nungko ngü APAOU oukong hatsün ngesan.

²Ngü hau uo-keng piakü noitsün hanau Apaüh ngü tsamei thapekkü niakei.

³Apaüh ngütü ngiom, “Khaiunia thso, nung uo-keng nouso ahshiau shio-emo?” Nungaih ngü, “Akhengteng APAOU, nung thaiutha thalaau nilu shio-e ta thashi!”

⁴Apaüh ngiom, “Nung uo-keng nouso tü APAOU ngio a-anglu ta khapiam lüngio.

⁵Ngüso tü, Ngo Akhengteng APAOU nou: ii nou matthio küta lo aa-e ta ngioji tü lüngio.

⁶Ngo asam hau oukong naiuso tsaphan nouso thiokiu-e, küta khun nou lopokkü taiu-e. Ngü asam da ii nou matthio-e, küta asam aa noi-e. Nungaih asamüh Ngü APAOU nou noin ta nge-e.”

⁷Nungtiphe ngü tü ngiotsünli ngü khapiam ngio ngiom. Ngü chitetsün taoko ngü sangngem tsak lula, naiuso nung uo nouso aikü kamshiau yaloutsün noiküla.

⁸Ngü thapkü noitsün ko, uo nouso tsaphan naiuso tsah nousoüh meanlou naiuso nungphiai khun pohkü iula. Lüko ilo nou tsülouha.

⁹Goa nou ngü tü ngiom, “Khaiunia thso, ahsheih nou tü khapiam lüngio. Nung ou-keng nouso da ii matthiokü, ngüso ahküshi-iau ahsheih tü aniokun pungkü ainou shiau lüngio ta Akhengteng APAOU nou thoilutkü ngioji.”

¹⁰Nungti ngü tü ngiotsünli ngü khapiam ngiom. Nungaih ilo nouso nung uo-keng nouso da shinapkü ngüso ashiküta tsakü chu. Nungko ngüso süpaihoi asong tsak iulaau saiukü noiküla.

¹¹Goa nou ngü tü ngiom, “Khaiunia thso, Israel hai nung uo nouso khekkü, ayangtaiu naiuso ashiau nou akuo tsünoikü nungti wailakü noin ta ngüso tü ngioji.

¹²Nungtiphe jü khaiunia Israel hai tü, Ngo Akhengteng APAOU nou ngüso etam soppe ta lüchite. Ngü ngüso niasan küta Israel hai goumchi nai müjam niajikan shi-e.

¹³Tilai ngü jü khaiuniaso khanantsün etam sopsatkü ngüso niaküshi-e, nungaih ngüsoüh Ngo APAOU noin ta nge-e.

¹⁴Ngü ngüso da jü i matthio-e, küta ngüso ah-ishi-e, naiuso ngüso goumchi ai noi-ishi-e. Nungaih ngüsoüh Ngo APAOU noin ta nge-e. Ngü nung chhiau thalouwaniu naiuso nungh chhi-e, ta Ngo APAOU nou ngioji.”

¹⁵APAOU nou ngüko loüh chitekü ngiom,

¹⁶“Khaiunia thso,” “pailai tsak loküta nung chi-ai, ‘Yihuda hai Nokshing,’ ta ngio nou lüsatlut. Loüh amao pailai tsak loküta nung chi-ai, ‘Israel hai Nokshing,’ ta ngio nou lüsatlut.

¹⁷Nungai nung pailai nime nou tsaklilu epau meikü apha nou pailai akhaiu nemtso jippekkü lühelo.

¹⁸Tilai akhaiuniasoüh nung athat ti nungh ngüso hau achite ta ni tü sange,

¹⁹nungai ngü Israel hai pailai naiuso Yihuda hai pailai tsak hau jippe-e, ta Ngo Akhengteng APAOU nou ngiotsün ngüso hau lüchite. Nung pailai nime nou ngü tsak hau shane küta nung jüpha nai seme.

²⁰“Pailai nime nou aphamongko semküta nung khaiuniahoi hau lüthapi.

²¹Küta jü khaiunia mele nouso tilüsongai khothiokü noin, ngüso aikü kamshikü, ngüso goumchi nai niakamshi-e ta Ngo Akhengteng APAOU nou ngiotsün ngüso hau lüchite.

²²Naiuso Israel king nouso chi-ai Ngü ngüso mele tsak hau jeiai-i-e. Ngüso khako nokshingau ngüso nokpao tsaklu noi-e, ngüso loto mele nime hau tsüjane shi-e, tsüdekünai nokshing nime hau tsüpai-shi-e.

²³Loto ngüso achinyan sotsom nousoüh tsülochinyan shi-e, tsüdekünai angei nouko ngüso tsülothe shi-e. Ngü ngüsoüh sunhetsün angei yam apem ainou naiuso ngü kausaiattsün ainou ngüso tsülothe-i-shi-e. Ngü ngüso losangh-e; ngüso jü khaiuniaau the-e, naiuso ngo ngüso Goa au the-e.

²⁴Jü tsamki David khekkü nou nokpao tsak ngüso nokpao the-e. Ngüso apem nokpao tsak khemko jeiai-e, küta jü ngiokhem nouso mongkiukü ang-e.

²⁵Ngüso paosi- poso kihtsün, jütsamki Yakob hau ngü kiutsün goumchi nai ngüso kih-e. Naiuso ngüso nungko thsaosithsoso apem hakü athon tsüyangkü kih-e. Jü tsamki David khekkü nokpao tsak nou ngüso athontsüyangkü nok- shing-e.

²⁶Athontsüyangkü aaloukü kih-au ngü ngüso ko athalou-e tsak shane. Ngü ngüso haowe singkü iula-i-e, naiuso jü Amkham Tsam ngüso goumchi ai asaita noitsün tü jime.

²⁷Ngü nungko ngüso ko kih-e; Ngü ngüso Goa the-e, naiuso ngüso jü khaiunia au the-e.

²⁸Tilai ngü jü Amkham Tsam ngüso ongko asaita taiu-e, nungai mele nousoüh Ngo APAOU nou, Israel nung jü khaiunia hau chosan-iu ta nge-e.”